राजकीय जाणकारांच्या भाकितानुसार नाशिक स्थानिक स्वराज्य संस्था विधान परिषद निवडणुकीचा अत्यंत धक्कादायक आणि राजकीय समीकरणे बदलून टाकणारा निकाल समोर आला आहे. महायुतीची मोठी ताकद असतानाही, संकट मोचक मंत्री यांचे अत्यंत जवळचे कार्यकर्ते अपक्ष उमेदवार गोकुळ गीते यांनी या निवडणुकीत ऐतिहासिक विजय मिळवला आहे. विशेष म्हणजे नाशिक जिल्ह्यामध्ये महायुतीचे सर्वाधिक लोकप्रतिनिधी आहेत. त्यामुळे या निवडणुकीत उपमुख्यमंत्री एकनाथ शिंदे यांच्या शिवसेनेचे अधिकृत उमेदवार नरेंद्र दराडे हेच सहज विजयी होतील, असा ठाम विश्वास महायुतीच्या नेत्यांना होता; परंतु खायचे दात वेगळे आणि दाखवायचे दात वेगळे अशी प्रवृत्ती राजकीय क्षेत्रामध्ये वाढत असल्यामुळे भल्या मोठ्या मनाने काल दुपारी शिवसेनेच्या वतीने झालेला पराभव मान्य करण्यात आला.
नाशिक प्रमाणेच सातारा सांगलीतील महायुतीच्या मतफुटीचा प्रकार लक्षात आल्यानंतर यावरच जास्त खल करण्यापेक्षा शिवसेनेच्या वतीने नाशिकचे अपक्ष उमेदवार यांना आपल्या गळाला लावण्याचा प्रयत्न करण्यात आला. मुळात शिवसेना आणि भाजपचे सर्व मतदार ठाण्यात स्थलांतरित केलेले असताना सुद्धा निवडणुकीतून माघार घेतलेल्या अपक्ष उमेदवार विजयी झाल्याने महायुतीतील युतीधर्म किती शाबूत आहे याची चर्चा दिवसभर रंगली होती. मुळात संकट मोचक मंत्री यांचा जवळचा माणूस संध्याकाळी शिवसेनेच्या व्यासपीठावर सहयोगी आमदार म्हणून माध्यमांसमोर आल्यावर हे शिवसेनेचे कर्तुत्व की भाजपाचे दातृत्व अशी चर्चा नव्याने सुरू झाली आहे. मुळात पक्षप्रवेशाची तयारी सुरू झाली असतानाच तांत्रिक अडचणीची जाणीव पक्ष नेतृत्वांना झाल्याने सहयोगी हा मध्यम मार्ग निवडण्यात आला आहे; परंतु ज्या काँग्रेसच्या भरोशावर राज्यसभा खासदार झालेले संजय काकडे पुन्हा भाजपाचे सहयोगी बनले यावरून या उमेदवाराचे सख्य कुणाशी राहील हे सांगण्यासाठी कोणत्याही ज्योतिषाची गरज लागणार नाही.
जागा वाटपाच्या चर्चेत महायुतीमध्ये ही जागा आपल्या पारड्यात पाडून घेण्यासाठी भारतीय जनता पक्षाकडून (BJP) प्रचंड प्रयत्न करण्यात आले होते. मात्र, दीर्घ तडजोडीनंतर अखेर ही जागा उपमुख्यमंत्री एकनाथ शिंदे यांच्या शिवसेनेला सुटली. शिवसेनेकडून अपेक्षेप्रमाणे नरेंद्र दराडे यांना महायुतीचे अधिकृत उमेदवार म्हणून रिंगणात उतरवण्यात आले. मात्र, भाजपमधील काही इच्छुकांनी पक्षाच्या या निर्णयाविरोधात बंडखोरीचा झेंडा फडकावला. यामध्ये गोकुळ गीते हे आघाडीवर होते.
मनधरणीचे प्रयत्न ठरले अपयशी
शिवसेनेच्या वतीने भाजपच्या या बंडखोरांचे बंड शमवण्यासाठी शेवटच्या क्षणापर्यंत शर्थीचे प्रयत्न करण्यात आले होते. यामध्ये गोकुळ गिते यांनी आपली उमेदवारी मागे घ्यावी यासाठी विशेष दबाव आणला गेला. मात्र, गिते आपल्या भूमिकेवर ठाम राहिले आणि त्यांनी माघार घेण्यास स्पष्ट नकार दिला. राज्याचे उच्च व तंत्रशिक्षण मंत्री उदय सामंत आणि भाजपचे नेते तथा मंत्री गिरीश महाजन यांनी गोकुळ गीते यांची मनधरणी करण्याचे अनेक प्रयत्न केले. या प्रचंड राजकीय प्रयत्नांनंतर अखेर गोकुळ गीते यांनी आपण निवडणुकीच्या अधिकृत प्रक्रियेतून तांत्रिकदृष्ट्या माघार घेत असल्याची घोषणा केली होती. मात्र, छुप्या राजकीय हालचालींमुळे प्रत्यक्ष निकाल हा त्यांच्याच बाजूने लागला. बंडखोर अपक्ष उमेदवाराचा हा विजय अनेकांच्या भुवया उंचावणारा ठरला आहे.
विशेष विमानाने नाशिकहून मुंबईत दाखल
विधान परिषद निवडणुकीत विजयी गुलाल उधळल्यानंतर गोकुळ गीते यांनी तातडीने मंत्री उदय सामंत यांनी संपर्क साधला. यानंतर राजकीय घडामोडींना वेग आला आणि ते विशेष विमानाने नाशिकहून मुंबईत दाखल झाले. मुंबईत पोहोचताच त्यांनी तत्परतेने खासदार श्रीकांत शिंदे यांची भेट घेतली. यानंतर गोकुळ गीते यांनी मंत्री उदय सामंत आणि खासदार श्रीकांत शिंदे यांच्यासोबत एकत्रित पत्रकार परिषद घेतली.
भविष्यात पक्ष संघटनेची जबाबदारी दिली तर…
या पत्रकार परिषदेत गोकुळ गीते म्हणाले की, “माझ्या मित्रांनी आणि कार्यकर्त्यांनी निडणूक पुढे नेली. मंत्री उदय सामंत, मंत्री गिरीश महाजन, मंत्री दादा भुसे आणि बाकीचे आमदार आले होते. मी त्यांना सांगितलं होतं की, माझ्यावर कार्यकर्त्यांचा प्रचंड दबाव आहे. कारण त्यांना आपला भविष्यातील विजय दिसत होता. मी इच्छा व्यक्त केली की, मी निवडून आलो आहे. या मतदारसंघाच्या मतदारांनी माझ्या बाजूने कौल दिला आहे. मी आपल्या पक्षामध्ये सहयोगी सदस्य म्हणून काम करायला तयार आहे. मग त्यांनी मला आज संध्याकाळी या, असं सांगितलं. मी एकनाथ शिंदे यांच्यासोबत प्रदीर्घ चर्चा केली. मतदारांनी माझ्यावर जो विश्वास टाकला, त्या मतदारांचे भविष्यात कामे करण्यासाठी, त्यांच्या काही अडचणी सोडवण्यासाठी शिवसेना पक्षाचा सहयोगी म्हणून काम करण्यास परवानगी दिलेली आहे. भविष्यात पक्ष संघटनेची जबाबदारी दिली तर ती सुद्धा मी पार पाडेन,” असा शब्द त्यांनी यावेळी दिला.
शिवसेनेचा सहयोगी सदस्य म्हणून काम करणार
“मी एकनाथ शिंदे यांच्या कामांनी पूर्वीपासून प्रभावित आहे. आमचे गणेश गीते स्थायी सभापती असताना अनेकदा एकनाथ शिंदे यांच्यासोबत माझी गाठभेट झालेली आहे. त्यांच्या कामाची पद्धत पाहून मी प्रभावित असून माझी आधीपासून त्यांच्यासोबत काम करण्याची इच्छा आहे,” असं गोकुळ गीते म्हणाले. तर या पत्रकार परिषदेत बोलताना त्यांनी आपण उपमुख्यमंत्री एकनाथ शिंदे यांच्या शिवसेनेचे सहयोगी सदस्य म्हणून काम करणार असल्याची अधिकृत घोषणा केली.
नाशिक विधान परिषद निवडणूक अंतिम निकाल
नाशिक एकूण मतदान – 618
अवैध मतदान – 13
वैध मतदान – 605
फायनल कोटा – 303
अपक्ष गोकुळ गीते – 357
शिवसेना नरेंद्र दराडे – 248
निकाल – गोकुळ गीते विजयी
