इराणचा मुद्दा मिटला आहे, आता युक्रेनवर लक्ष केंद्रीत करणार असल्याचे मोठे विधान अमेरिकेचे राष्ट्राध्यक्ष डोनाल्ड ट्र्म्प यांनी केले आहे. फ्रान्स येथे सुरू असलेल्या जी-७ बैठकीत डोनाल्ड ट्रम्प यांनी केलेल्या विधानावरून त्यांचे पुढील टार्गेट युक्रेन असल्याचे म्हटले जात आहे. अमेरिका आणि इराण यांच्यात युद्ध समाप्त करण्यासाठी आणि होर्मुझची सामुद्रधुनी पुन्हा खुली करण्यासाठी अंतरिम करार झाला आहे. या करारावर स्वित्झर्लंड येथे स्वाक्षरी होण्याची शक्यता आहे. मात्र, करारातील अनेक बाबी अद्याप अस्पष्ट असून काही मुद्द्यांवर दोन्ही देशांमध्ये मतभेद कायम आहेत.
इराणसोबत प्राथमिक कराराची घोषणा केल्यानंतर अमेरिकेचे अध्यक्ष डोनाल्ड ट्रम्प म्हणाले की, आता त्यांचे लक्ष युक्रेनवर असेल. युक्रेनचे राष्ट्राध्यक्ष झेलेन्स्की आणि रशियाचे राष्ट्राध्यक्ष व्लादिमीर पुतिन यांच्याशी चर्चा केली आहे. युक्रेनमधील युद्ध संपवणे हे त्यांचे पुढील प्रमुख ध्येय असेल, असे डोनाल्ड ट्रम्प यांनी म्हटले आहे. फ्रान्सचे राष्ट्राध्यक्ष इमॅन्युएल मॅक्रॉन यांच्याशी बोलताना ते म्हणाले की, जगातील सर्वांत महत्त्वाच्या ऊर्जा मार्गांपैकी एक असलेल्या होर्मुझच्या सामुद्रधुनीतून वाहतूक आधीच पुन्हा सुरू झाली आहे. इराणसोबतचा करार आता औपचारिक अंमलबजावणीच्या दिशेने वाटचाल करत आहे.
आता इराणचा प्रश्न मिटला आहे, आता युक्रेनवर लक्ष केंद्रित करू
रशिया-युक्रेन युद्धासंदर्भात बोलताना ट्रम्प म्हणाले की, राष्ट्राध्यक्ष झेलेन्स्की आणि राष्ट्राध्यक्ष पुतिन यांच्याशी आमची खूप चांगली चर्चा झाली. मला वाटते की कदाचित आपण तिथे काहीतरी करू शकतो. मला खरोखरच तसे वाटते. मला वाटते की ते दोघेही त्यासाठी तयार आहेत. आता इराणचा प्रश्न मिटला आहे, त्यामुळे आम्ही त्यावर लक्ष केंद्रित करू, असे त्यांनी सांगितले. रशियाचे हल्ले सुरूच असल्याने युक्रेन लष्करी मदतीची मागणी करत आहे. शिखर परिषदेत सहभागी होणारे अनेक नेते, येत्या काही दिवसांत रशिया आणि युक्रेनसोबत थेट संवाद साधण्याची ट्रम्प यांची तयारी आहे की नाही याकडे लक्ष ठेवून असतील.दरम्यान, रशिया-युक्रेन युद्ध संपवण्याचे सर्व राजनैतिक प्रयत्न वारंवार अयशस्वी ठरले असताना ट्रम्प यांचे वक्तव्य आले आहे. पाश्चात्य राष्ट्रांकडून अधिक राजकीय आणि लष्करी पाठिंबा मिळवण्याच्या आशेने झेलेन्स्की जी-७ परिषदेत आले होते. शांतता चर्चेला गती देण्यासाठी शिखर परिषदे दरम्यान पुतिन यांना भेटण्याचा प्रस्ताव ठेवल्याचे झेलेन्स्की म्हणाले. रशियाने अशा भेटीस सहमती दर्शवली नाही.
