पुणे : पुणे महानगरपालिकेच्या मुख्य कार्यालयासह महापौर कार्यालयाला ई-मेलद्वारे बॉम्बस्फोटाची धमकी मिळाल्याने बुधवारी प्रशासनात एकच खळबळ उडाली. या पार्श्वभूमीवर महापालिका आयुक्त श्री. नवल किशोर राम यांच्या सूचनेनुसार मुख्य इमारत तातडीने रिकामी करण्यात आली असून संपूर्ण परिसरात सुरक्षा व्यवस्था वाढविण्यात आली आहे.
धमकीचा ई-मेल प्राप्त झाल्यानंतर पुणे पोलिसांच्या बॉम्ब शोधक व नाशक पथकाला पाचारण करण्यात आले. पथकाकडून महापालिकेच्या मुख्य इमारतीत आणि परिसरात कसून तपासणी व शोधमोहीम सुरू आहे. शोधकार्य पूर्ण होईपर्यंत मुख्य इमारतीतील नियमित कामकाज स्थगित ठेवण्यात आले आहे.
सुरक्षेच्या कारणास्तव नागरिकांना आणि कर्मचाऱ्यांना महापालिका मुख्यालय परिसरात प्रवेश करण्यास मनाई करण्यात आली आहे. शोधमोहीम पूर्ण होऊन पोलिसांकडून परिसर सुरक्षित असल्याची खात्री झाल्यानंतरच मुख्य इमारतीतील कामकाज पूर्ववत सुरू करण्यात येणार असल्याची माहिती प्रशासनाने दिली.
दरम्यान, धमकीचा ई-मेल कोठून पाठविण्यात आला याचा तपास पोलीस यंत्रणांकडून सुरू असून, या घटनेमुळे महापालिका प्रशासन आणि सुरक्षा यंत्रणा सतर्क झाल्या आहेत. अधिकृत तपास पूर्ण झाल्यानंतरच या प्रकरणाबाबत अधिक माहिती समोर येण्याची शक्यता आहे.
