नाशिक विधान परिषदेची जागा आधी भाजप आणि शिवसेनेनं अतिशय प्रतिष्ठेची केली. शिवसेनेनं जागावाटपात पटकावलेली जागा भाजपच्या गोकुळ गितेंच्या बंडखोरीनं गोत्यात आली. गोकुळ गितेंची समजूत काढता काढता भाजप आणि शिवसेनेच्या संकटमोचकांचा घामटा निघतोय. तरीही गोकुळ गिते भूमिकेवरून मागे हटायला तयार नाहीत.
नाशिक विधान परिषद निवडणुकीत शिवसेनेचे उमेदवार नरेंद्र दरांडेंविरोधात बंडाचा झेंडा फडकवणाऱ्या प्रशांत हिरेंचं बंड शमवण्यात महायुतीच्या नेत्यांना यश आलं आहे. मात्र गोकुळ गितेंची मनधरणी करण्यात अद्यापपर्यंत तरी यश आलेलं नाही. नाशिकमध्ये तळ ठोकून असणारे भाजपचे संकटमोचक गिरीश महाजन आणि शिवसेनेचे संकटमोचक उदय सामंत यांची गोकुळ गितेंसोबत चर्चाही झाली. या चर्चेनंतर सकारात्मक निर्णय होईल असा दावा गिरीश महाजन करत असले तरी पाच दिवसानंतर गोकुळ गिते आपल्या बंडाच्या पवित्र्यावर कायम आहे.
कुणाल दराडेंनी आपला बाप काढण्याचा आरोप करत तसेच आपल्याला मतदारांचा पाठिंबा असल्याचा दावा करत गोकुळ गिते उमेदवारीवर ठाम आहेत. तर दुसरीकडे गिते कुटुंबाची नाराजी दूर करण्यासाठी शिवसेनेचे उमेदवार नरेंद्र दराडेंचे बंधू किशोर दराडे हे गोकुळ गितेचे बंधू गणेश गितेंच्या भेटीसाठी गेले होते. गोकुळ गिते उमेदवारीवर ठाम असल्यानं नरेंद्र दराडेंचे बंधू किशोर दराडे मुख्यमंत्र्यांच्या भेटीसाठी थेट मुंबईत दाखल झाले.त्यांनी या प्रश्नी मुख्यमंत्र्यांची भेटही घेतली आहे.
गोकुळ गितेंनी पाठिंबा द्यावा यासाठी शिवसेनेचे प्रयत्न सुरू आहेत. महाजन आणि सामंत या दोन संकटमोचकांच्या प्रयत्नांन आतापर्यंत तरी अपयश आलं आहे. एकूणच गोकुळ गितेंच्या बंडाला हवा देण्यामागे जिल्ह्यातील कुरघोडीचं राजकारण तर नाही ना याची चर्चा राजकीय वर्तुळात सुरू झाली आहे.
