…जागा आणि इमारत महापालिकेची! मात्र ताबा आणि मालकी व्यक्तिगत ठेवून राजकीय व आर्थिक पोळी भाजण्याच्या विरोधात काँग्रेसच्या निष्ठित कार्यकर्त्याने संविधानिक मार्गाने पुणे महापालिका प्रशासनाकडे तक्रार, पाठपुरावा केला; पुणे महापालिकेत सत्तेत असलेल्या पक्षाकडूनच संबंधित गोष्ट घडत असल्याने रस्त्यावर उतरून आंदोलने केली पुणे महापालिका आयुक्तांसह सर्वच संबंधितांना निवेदनेसुद्धा दिली. तरीही पुणे महापालिका प्रशासन प्रशासन दाद देईना म्हणून या गांधीवादी तरुण कार्यकर्त्याने थेट महापालिका आवारात उपोषणाचा मार्ग अवलंबला आहे. पुणे महापालिकेत सध्या मित्र पक्ष असलेल्या राष्ट्रवादीकडेच विरोधी पक्ष नेते पद असल्याने तेथील विरोधकांना रस्त्यावर उतरण्याचा एकमेव पर्याय राहिल्याचे या निष्ठावान कार्यकर्त्याला वाटत आहे.
पुणे महापालिकेच्या वतीने आंबील ओढा परिसरातील नागरिकांसाठी कै. भानुदास गेजगे व्यायामशाळा बांधण्यात आली होती. पुणे महापालिकेच्या वतीने संबंधित इमारत पूर्ण झाल्यानंतर पुणे महापालिकेच्या मालकी त हक्कांमध्ये ठेवणे आवश्यक असताना या भागातील राजकीय नेत्याच्या ताब्यामध्येच संबंधित इमारत असून या इमारतीचा अनधिकृतपणे व्यावसायिक वापर सुरू करण्यात आल्याने काँग्रेसचे निष्ठावान गांधीवादी कार्यकर्ते सागर धाडवे सरचिटणीस- युवक काँग्रेस पुणे शहर यांनी या विरोधात आवाज उठवण्याचे काम केले असून पुणे महापालिकेच्या मुख्य प्रवेशद्वारावर उपोषणाला आरंभ करण्यात आला आहे .
या उपोषणाच्या माध्यमातून पुणे महापालिका आयुक्तांकडे करण्यात आलेल्या मागण्या पुढील प्रमाणे-
सविनय निवेदन असे की, पुणे महापालिकेच्या मालकीची असलेली कै. भानुदास गेजगे व्यायामशाळा व कार्यालय या संदर्भात गंभीर स्वरूपाच्या अनियमितता व अनधिकृत करारनाम्याद्वारे पुणे महानगरपालिकेची फसवणूक झाल्याची बाब निदर्शनास आली आहे. सदर प्रकरणाबाबत दिनांक ४/८/२०२५ रोजी लेखी तक्रार देखील करण्यात आलेली आहे. तथापि, अद्यापपर्यंत त्यावर समाधानकारक कारवाई झालेली दिसून येत नाही.
सदर बाब अत्यंत गंभीर स्वरूपाची असून सार्वजनिक मालमत्तेचा गैरवापर तसेच प्रशासनाची दिशाभूल करण्यात आलेली असल्याने या प्रकरणाची सखोल चौकशी करून दोषींवर कडक कारवाई करण्यात यावी, अशी आमची मागणी आहे.
त्यानुसार आमच्या पुढील मागण्या आहेत :
१) अनधिकृत पद्धतीने पुणे महानगरपालिकेची फसवणूक करून कै. भानुदास गेजगे व्यायामशाळा व कार्यालय हे सानेगुरुजी मंडळाकडे देण्यात आले आहे. सदर जागा तात्काळ त्या मंडळाकडून काढून प्रशासनाने आपल्या ताब्यात घ्यावी.
२) दिनांक ४/८/२०२५ रोजी करण्यात आलेल्या तक्रारीवर प्रशासनाने नेमकी कोणती कारवाई केली याचा संपूर्ण तपशील लेखी स्वरूपात देण्यात यावा.
३) तत्कालीन क्रीडाउपायुक्त किशोरी शिंदे यांनी सदर प्रकरणातील कायदेशीर बाबींची पडताळणी न करता, मा. नगरसेवक धीरज घाटे यांच्या मंडळास मनपाच्या मालमत्तेबाबत उपनिबंधक कार्यालयात जाऊन रजिस्टर करारनामा केल्याचे समजते. या संपूर्ण प्रकरणाची सखोल चौकशी करून दोषी आढळल्यास त्यांच्यावर कठोर कारवाई करण्यात यावी व चौकशी पूर्ण होईपर्यंत त्यांना सेवेतून निलंबित करण्यात यावे.
४) सदर व्यायामशाळा येथे “Maharashtra State Electricity Distribution Company Limited”, (महावितरण) यांनी कारवाई करून ₹९५,००० इतका दंड आकारला असून तो कॅश स्वरूपात पुणे महानगरपालिकेच्या नावे भरल्याची बाब समोर आलेली आहे. या व्यवहाराची सखोल चौकशी करण्यात यावी.
५) ज्या सानेगुरुजी तरुण मंडळास व्यायामशाळा भाडेतत्वावर देण्यात आली आहे, त्या मंडळावर अनियमित व्यवहारांमुळे “Charity Commissioner of Maharashtra”, पुणे विभाग यांच्या कार्यालयामार्फत ₹५००० दंड करण्यात आलेला आहे. त्यामुळे अशा अनियमित मंडळाकडून पुणे महानगरपालिकेची मालमत्ता तात्काळ परत ताब्यात घेण्यात यावी.
६) सदर व्यायामशाळा सुमारे ३५०० चौ.फुट क्षेत्रफळाची असून तिचे कार्यालय अंदाजे ५०० चौ.फुट आहे. साधारणपणे कोणत्याही व्यायामशाळेचे कार्यालय इतक्या मोठ्या क्षेत्रफळाचे नसते. सदर कार्यालयाचा वापर हा राजकीय स्वार्थासाठी राजकीय पक्षाच्या कार्यालयाप्रमाणे केला जात असल्याची तक्रार आहे. त्यामुळे या प्रकरणाची चौकशी करून संबंधित जागा पुणे महानगरपालिकेने तात्काळ ताब्यात घ्यावी.
७) सदर व्यायामशाळा मागील सुमारे ११ वर्षे संबंधित नगरसेवकांनी ताब्यात ठेवली होती. आमच्या सातत्यपूर्ण पाठपुराव्यानंतर मागील वर्षी ती पुणे महानगरपालिकेच्या ताब्यात आली आहे. त्यामुळे मागील ११ वर्षे अनधिकृत ताबा ठेवणाऱ्या नगरसेवकांवर तसेच त्यांना सहकार्य करणाऱ्या तत्कालीन विश्रामबाग वाडा क्षेत्रीय कार्यालयातील अधिकाऱ्यांवर चौकशी करून योग्य ती कारवाई करण्यात यावी.
सदर प्रकरण हे आयुक्त पुणे महापालिका यांच्या कार्यालयात अंतिम निर्णयास असून वरील सर्व बाबींचा गांभीर्याने विचार करून आयुक्त नवल किशोर राम साहेबांनी तात्काळ चौकशी करून कारवाई करण्यात यावी.
