पुणे महापालिकेतील स्वीकृत नगरसेवक पदासाठीच्या 10 पैकी 7 जागा सत्ताधारी भाजपच्या वाट्याला आल्या आहेत. या 7 ही जागांवर भाजपने पराभूत उमेदवारांना संधी न देता निष्ठावंतांना संधी दिली असली तरी सुद्धा पुणे लोकसभा मतदारसंघातील पाच विधानसभा मतदारसंघातीलच कार्यकर्त्यांना संधी देण्यात आल्याने अंतर्गत राजकारणाला सुरुवात झाली आहे. अत्यंत गुप्त पद्धतीने राबविण्यात आलेली ही प्रक्रिया काल भाजपाकडून ७ जणांनी अर्ज दाखल केल्यानंतर जाहीर झाली असली तरी सुद्धा ७ नावांवर शिक्कमोर्तब होताच आता भाजपमधील अंतर्गत राजकारणावरही जाहीर चर्चा सुरु झाली आहे.
संपूर्ण पुणे शहरात पुणे महापालिकेची सत्ता पुन्हा मिळवण्यासाठी वरिष्ठ नेत्यांनी अनेक इच्छुकांना दिलेला शब्द म्हणजे ….स्वीकृत सदस्यपदी तुमचा नक्की विचार केला जाईल! हा शब्द पाळला जातो की नाही ही या नियुक्तीच्या दरम्यान शहरभर चर्चा सुरू होती. भाजपच्या वाट्याला आलेल्या 7 जगांसाठी तब्बल 400 जण इच्छुक होते. या प्रचंड इच्छुकांतून 7 जणांची निवड करण्याची जबाबदारी लोकसभा व विधानसभा स्तरावर नेतृत्व करणाऱ्या स्थानिक नेत्यांवर होती. शेवटच्या क्षणापर्यंत या निवडीत स्थानिक नेत्यांनी आपल्या निकटवर्तीयांसाठी ताकद लावल्याचे पाहायला मिळाले; परंतु भारतीय जनता पक्षाचे विचारसरणी असलेल्या समाजाला व भागाला नेतृत्व मिळावं या तत्त्वावर पर्वती आणि कसबा मतदारसंघातून प्रत्येकी 2 आणि पुणे कॅन्टोन्मेंट, शिवाजीनगर आणि कोथरूड या मतदारसंघातून प्रत्येकी १ कार्यकर्त्याला संधी देऊन वरिष्ठ पातळीवर समतोल राखण्याचा प्रयत्न करण्यात आला आहे.
खडकवासला मतदारसंघात सलग चौथ्यांदा भाजपचाच आमदार असूनही त्या ठिकाणी कार्यकर्त्याला संधी मिळालेली नाही. कदाचित महिला बालकल्याण व शिक्षण समिती अशा दोन प्रमुख पदी खडकवासला मतदारसंघातीलच पदाधिकारी असल्याने या विधानसभा मतदारसंघातील कार्यकर्त्यांचा विचार करण्यात आला नाही अशी चर्चा सुरू झाली आहे. याशिवाय विधानपरिषदेचे आमदार योगेश टिळेकर यांच्याही कार्यकर्त्याला डावलल्याची चर्चा आहे; परंतु आमदार टिळेकर यांचे प्राबल्य असलेल्या हडपसर विधानसभा मतदारसंघांमध्ये विरोधी गटातीलच लोकप्रतिनिधी जास्त प्रमाणात विजयी झाल्यामुळे विधानपरिषद आमदार योगेश टिळेकर यांची शक्ती कमी पडली असल्याची ही शक्यता न करता येत नाही.
कसबा विधानसभा मतदारसंघांमध्ये असंख्य निष्ठावान कार्यकर्त्यांना संधी देणे पक्षाला शक्य झाली नाही. या विरोधात काही लोकांनी बंड केले तर काही कार्यकर्त्यांनी पक्षकार्य थंड केले. कसबा विधानसभा मतदारसंघात भारतीय जनता पक्षाला भूतपूर्व यश मिळाले असले तरी या भागातील जुन्या कार्यकर्त्यांना संधी देण्याची भूमिका नेतृत्वाने घेत कसबा विधानसभा मतदारसंघातून उदय लेले यांना संधी देण्यात आली आहे. लेले हे ३५-४० वर्ष पक्ष संघटनेत सक्रिय आहेत. त्यांना यंदा उमेदवारी देण्यात येणार होती. मात्र दिवंगत मुक्ता टिळक यांचे सुपुत्र कुणाल टिळक यांना उमेदवारी जाहीर केल्याने त्यांना उमेदवारी मिळाली नसल्याचे सांगितले जाते. लेले यांना आता स्वीकृत सदस्य म्हणून महापालिकेत आणले आहे. कसब्यातीलच राजेंद्र काकडे यांनाही स्वीकृत सदस्य करण्यात आले आहे. काकडे यांच्या पत्नीला भाजपने एबी फॉर्मसह उमेदवारी दिली होती. मात्र ऐनवेळी उमेदवाराची समीकरणे बदलल्याने त्यांची उमेदवारी मागे घेण्यात आली. त्यामुळे आमदार हेमंत रासने यांनी दोन्ही नेत्यांचे नाव लावून धरलं. अखेर त्यांना स्वीकृत नगरसेवक पदी संधी मिळाली असल्याचे बोलले जात आहे.
पुणे महापालिकेच्या सार्वत्रिक निवडणुकीमध्ये कायमच भारतीय जनता पक्षाबरोबर राहिलेल्या पर्वती विधानसभा मतदारसंघात स्वीकृत सदस्य निवडताना अन्य समीकरणांचा विचार करता झुकते माप देण्यात आले आहे. स्थायी समिती या प्रभागात दिलेली असतानाही मंत्री माधुरी मिसाळ यांच्या आग्रहास्तव पक्षासोबत एकनिष्ठ पद्धतीने काम करणाऱ्या २ भाजप कार्यकर्त्यांना स्वीकृत नगरसेवक पदी संधी देण्यात आली आहे. त्यातील विश्वास ननावरे हे भाजपला प्रतिकूल असणाऱ्या वस्ती भागात अनेक वर्ष काम करत असून ते आमदार माधुरी मिसाळ यांचे निकटवर्तीय मानले जातात. तर माजी उपमहापौर सरस्वती शेंडगे यांना यंदा महानगरपालिकेच्या निवडणुकीत दरम्यान उमेदवारी नाकारण्यात आली होती. त्या आपल्या मुलीच्या उमेदवारीसाठी आग्रही होत्या. मात्र ऐनवेळी शहराध्यक्षांच्या निकटवर्तीय व्यक्तीला ही उमेदवारी देण्यात आली. त्यामुळे त्यांच्या मुलीला स्वीकृत नगरसेवक पदी संधी देण्यात आले असल्याचं बोलत आहे.
कोथरूड विधानसभा मतदारसंघातून राज्याचे उच्च तंत्रज्ञान शिक्षण मंत्री व केंद्रीय राज्यमंत्री मुरलीधर मोहोळ यांच्या वतीने दोन नावे सुचवण्यात आली होती. कोथरूड विधानसभा मतदारसंघात विद्यमान नगरसेवकांपैकी तीन ते चार नगरसेवकांना संधी नाकारताना स्वीकृत सदस्यत्वासाठी विचार केला जाईल असा शब्द दिलेला असतानाही पुण्याचे खासदार मुरलीधर मोहोळ यांचे निकटवर्ती असलेल्या निलेश कोंढाळकर यांना देखील स्वीकृत नगरसेवक पदाची संधी मिळाली आहे. महापालिका निवडणुकीत त्यांची उमेदवारी फिक्स मानली जात होती. मात्र पक्षाने आमदार आणि खासदारांच्या कुटुंबातील व्यक्तींना उमेदवारी न देण्याचा निर्णय घेतल्याने त्यांना संधी मिळू शकली नव्हती. पुणे कॅन्टोन्मेंट भागातून जयप्रकाश पुरोहित यांना संधी देण्यात आली आहे. त्यांच्या दोन पिढ्या भाजपमध्ये सक्रिय असल्याचे सांगितले जात आहे. तर शिवाजीनगर विधानसभा मतदारसंघातून रवींद्र साळेगावकर यांना स्वीकृत पदी संधी देण्यात आली आहे. स्थानिक आमदार सिद्धार्थ शिरोळे हे त्यांच्यासाठी आग्रही होते असे सांगितले जात आहे.
त्याचवेळी खडकवासला मतदारसंघाचे आमदार भीमराव तापकीर यांच्या मतदारसंघातूनही काही मोठी नावं चर्चेत होती. मात्र यंदा तरी त्या ठिकाणी कोणालाही संधी देण्यात आली नाही. हडपसरचे माजी आमदार आणि विधानपरिषदेचे विद्यमान आमदार योगेश टिळेकर यांच्याही कोणत्या कार्यकर्त्याचा विचार झालेला नाही. हडपसर प्रमाणेच वडगाव शेरी विधानसभा मतदारसंघांमध्ये सुद्धा भारतीय जनता पक्षाची वाटचाल विशेष लक्षणीय राहिली नसल्यामुळे वडगाव शेरी विधानसभा मतदारसंघातही स्वीकृत सदस्यत्वाची संधी नाकारण्यात आलेली आहे.
