उच्च व तंत्र शिक्षण विभागाच्या अंतर्गत असलेल्या सार्वजनिक विद्यापीठांमधील प्राध्यापक भरतीची संपूर्ण प्रक्रिया अधिक पारदर्शक व्हावी, यासाठी उमेदवारांना मिळालेल्या गुणदानाची यादी त्यांच्या गुणांसह विद्यापीठांच्या संकेतस्थळावर प्रसिद्ध केली जाणार आहे. अशा विविध आनुषंगिक नावीन्यपूर्ण बदलांचा समावेश करून भरतीची सविस्तर कार्यपद्धती जाहीर करून भरती प्रक्रियेस मान्यता देण्यात आली आहे, असे उच्च व तंत्र शिक्षण मंत्री चंद्रकांत पाटील यांनी सांगितले.
पाटील म्हणाले, ‘सहाय्यक प्राध्यापक पदासाठी तासिका तत्त्वावरील, कंत्राटी तसेच ॲडहॉक तत्त्वावर कार्यरत असणाऱ्या सहाय्यक प्राध्यापकांना या निर्णयामुळे मोठा दिलासा मिळणार आहे. या कालावधीत केलेल्या कामाचा अनुभव ग्राह्य धरला जाणार आहे.
अनेक सहाय्यक प्राध्यापक जे वर्षोनुवर्षे तासिका, कंत्राटी आणि ॲडहॉक तत्त्वावर काम करतात अशांचा अनुभव पात्रतेसाठी ग्राह्य धरला जाणार आहे. तसेच पूर्वीच्या शासन निर्णयामधील मानवविज्ञान शाखेअंतर्गत प्राध्यापकांसाठी सहाय्यक प्राध्यापक पदासाठी प्रकाशनासाठी स्कोपस, वेब ऑफ सायन्स मध्ये प्रकाशनाची जी अट काही अंशी शिथिल करण्यात आली.
मानवविज्ञान शाखेतील प्राध्यापकांसाठी ही जमेची बाजू ठरली आहे. या शाखेच्या प्राध्यापकांचे पुस्तक प्रकाशनांचेही गुण ग्राह्य धरले जाणार असून समान संधीच्या तत्त्वाचा अवलंब केला आहे. मात्र हे करत असताना उत्कृष्टतेलाही प्राधान्य देण्यात आले आहे.’
विविध निकषांवर भर
सहाय्यक आणि प्राध्यापक पदासाठीही त्यांचे अनुभव, विविध संशोधन प्रकल्प, विविध शिखर संस्थांकडून मिळालेला निधी आदी निकषांवर भर देण्यात आला आहे. भरती प्रक्रियेदरम्यान मुलाखतीसाठी गुणदानाची प्रक्रिया विशद करण्यात आली आहे.
यामध्ये प्राध्यापकांना आयसीटी कौशल्य, प्रगत तांत्रिक कौशल्य आणि सह-अभ्यासक्रम उपक्रमास महत्त्व देत कार्यपद्धती निश्चित करून प्राध्यापकांची निवडप्रक्रिया पूर्ण करण्यास मान्यता दिली, असेही मंत्री पाटील यांनी सांगितले. शासन निर्णय www.maharashtra.gov.in या संकेतस्थळावर उपलब्ध आहे.
