मॉडर्न महाविद्यालय, शिवाजीनगर पुणे येथील प्रांगणामध्ये विद्यार्थ्यांसाठी दोन दिवसांचा व्यापार मेळावा आयोजित केला होता. महाविद्यालयामध्ये गेल्या दहा वर्षांपासून दरवर्षी विद्यार्थ्यांसाठी या मेळाव्याचे आयोजन केले जाते. यावर्षी यामध्ये 300 हून अधिक विद्यार्थ्यांनी सहभाग घेतला आणि 75 पेक्षा अधिक स्टॉल लावले. यामध्ये पारंपारिक आणि आधुनिक कपडे, पर्यावरणपूरक वस्तू, दागिने, गृह सजावटीच्या शोभेच्या वस्तू, खेळणी, फुले, पूजेचे साहित्य अनेक आकर्षक भेटवस्तू सुंदर स्टॉल लावण्यात आले होते. याचबरोबर खाण्यापिण्याच्या स्टॉलची ही रेलचेल इथे पहावयास मिळाली. पाणीपुरी, वडापाव, सँडविच, पुलाव, भेळ, पिझ्झा, बर्गर, मोमोज, अनेक खाद्यपदार्थांचे आस्वाद घेण्यासाठी इथे स्टॉल उपलब्ध होते. मॉडर्न महाविद्यालयातील विद्यार्थी प्राध्यापक आणि इतर कर्मचाऱ्यांनी देखील या मेळाव्यामध्ये सहभागी होत स्टॉलचा आनंद लुटला. काही पूर्वोत्तर राज्यांमधील विद्यार्थ्यांनी विशेष प्रादेशिक पदार्थ विकण्यासाठी ठेवले होते. यामध्ये परदेशी विद्यार्थ्यांनी देखील त्यांना मदत केली.
व्यापार मेळाव्यामध्ये काही फनफेअर गेमचे आयोजनदेखील करण्यात आले होते. यात विविध प्रकारची कोडी सोडवणे, खेळ खेळल्यानंतर बक्षीसे जिंकणे, खरेदीसाठी आकर्षक कुपन देणे, काही वस्तूंवर आकर्षक सूट अशा विविध गोष्टींमुळे सर्व स्टॉल विद्यार्थी आणि प्राध्यापकांचे लक्ष वेधून घेत होते
व्यापार मेळाव्याच्या पहिल्या दिवशी मॉडर्न महाविद्यालयाचे प्रभारी प्राचार्य प्रा. शामकांत देशमुख यांच्या शुभहस्ते या व्यापार मेळाव्याचे उद्घाटन झाले. याप्रसंगी व्यापार मेळाव्याच्या संयोजिका प्रा. मानसी ठाकूर, प्रमुख फॅशन डिझायनिंग विभाग , मॉडर्न महाविद्यालयाच्या विविध शाखांचे उपप्राचार्य आणि विभिन्न विभागांचे प्रमुख उपस्थित होते.
प्राचार्य प्रा. शामकांत देशमुख यांनी उद्घाटनप्रसंगी सर्व स्टॉलना भेट देऊन आकर्षक वस्तूंची प्रशंसा केली आणि त्यांना प्रोत्साहन दिले. व्यापार मेळाव्याच्या संयोजिका प्रा. मानसी ठाकूर यांनी विद्यार्थ्यांच्या स्टॉलचा त्यांच्या वैशिष्ट्यांसह परिचय करून दिला. यावेळी मॉडर्न महाविद्यालयाच्या कनिष्ठ विभागाचे उपप्राचार्य प्रा. योगेश ठिपसे, वाणिज्य विभागाचे प्रा. विजय गायकवाड, हिंदी विभागप्रमुख डॉ. प्रेरणा उबाळे, राष्ट्रीय सेवा योजनेचे प्रमुख प्रा. वराडे, ॲनिमेशन विभागाचे प्रमुख प्रा. समीर नेर्लेकर आणि इतर विभागांचे प्राध्यापक उपस्थित होते.
मॉडर्न महाविद्यालयाचे प्रांगण विद्यार्थ्यांचे स्टॉल आणि त्यावरील गर्दीने अत्यंत फुलून गेले होते. विद्यार्थ्यांनी अत्यंत उत्साहात दोन दिवस आपल्या वस्तूंची विक्री करत नफा तर मिळवलाच त्याशिवाय या संधीमुळे मोठे व्यापारी बनण्याची त्यांची स्वप्ने आकार घेत असल्याचे दिसत होते. काही स्टॉलधारक विद्यार्थ्यांनी आपल्या वस्तूंच्या आकर्षक जाहिराती आणि त्यांचे पोस्टर्स तयार केले होते. दोन दिवस विद्यार्थ्यांनी व्यापार मिळाल्याच्या माध्यमातून व्यापारी बनण्याचा आनंद घेतला.
मॉडर्न महाविद्यालय, शिवाजीनगरतर्फे विद्यार्थ्यांच्या नवनिर्माण क्षमतेला प्रोत्साहन देण्यासाठी आयोजित केलेल्या या व्यापार मेळाव्याला प्रतिसाद लाभला. व्यापार मेळाव्यामध्ये सहभागी स्टॉलधारक विद्यार्थ्यांना शेवटच्या दिवशी प्रमाणपत्र देऊन गौरविण्यात आले तसेच सर्वांत आकर्षक आणि उपयोगी वस्तुंच्या स्टॉलधारक विद्यार्थ्यांना पुरस्कृत केले गेले.
