मुळशी तालुक्यातून १ लाख २६ हजार ६०७ मतदारांनी मतदानाचा हक्क बजावत ६१.४६ टक्के मतदान केले. लोकसभेपेक्षा ते सहा टक्क्यांनी वाढले. तथापि मुळशी तालुक्याच्या तुलनेत भोर आणि वेल्ह्याचे मतदान प्रत्येकी तब्बल १२ टक्क्यांनी वाढले आहे. त्यामुळे भोर आणि वेल्ह्याचे वाढलेले मतदान कुणाच्या बाजूने झुकणार? दोन अपक्ष उमेदवार किती मते खेचणार? भोर, वेल्हा वाढलेले मतदान फक्तं थोपटेंच्या पारड्यात पडल्यासच विजयास निर्णायक ठरू शकेलं. कुलदीप कोंडे आणि किरण दगडे यांनी मुळशी, भोर, वेल्हा तालुका वैयक्तिक गाठीभेटीतून पोखरला आहे. त्यामुळे अपक्षांची मते कुणाला तारक आणि कुणाला मारक ठरणार याकडेही सर्वांचे लक्ष आहे. तर १५ वर्षांनंतर अधिकृत उमेदवारी तालुक्याला मिळालेल्या संधीचे सोने नेते करणार का? राष्ट्रावादीचे मांडेकर मुळशीचा झेंडा फडकविणार, की कॉंग्रेसचे संग्राम थोपटे विजयी चौकार मारणार? याकडे लोकांचे लक्ष लागले आहे.
राष्ट्रवादी फुटीच्या दरम्यान मोठी लाभाची पदे मिळाल्याने तालुक्यातील नेत्यांची फौज दादांबरोबर असतानाही लोकसभेत सुनेत्रा पवार ९९४१ मतांनी मागे राहील्या होत्या. तर शिवसेना (उबाठा) आणि कॉंग्रेसच्या भक्कम साथीने तालुक्यात साहेबांच्या मोजक्या पदाधिकाऱ्यांनी सुळे यांनी मताधिक्य दिले. अवघ्या आठ महिन्यांतच विधानसभेच्या निवडणुका लागल्या. अजित पवार यांनी १५ वर्षांनंतर मुळशीला संधी दिल्याने लोकसभेचे उट्टे काढण्याची संधी तालुक्यातील अजितदादांच्या नेत्यांना मिळाली.
तालुक्यात मांडेकर यांचा जनसंपर्क दांडगा आहे. २५ वर्षांपासून त्यांनी तालुक्याच्या कानाकोपऱ्यात विविध मंडळे, खेळाडू, गरजूंना आर्थिक सहकार्य केले. जनतेच्या सुखदुःखात ते सहभागी होत असल्याने मुळशीकरांशी त्यांची नाळ जुळली होती. त्यामुळे मांडेकर यांची तालुक्यात हवा तयार झाली. परंतु तालुक्यातूनच किरण दगडे यांनी बंडखोरी केली. त्यांनी मुळशीकर महिला, पुरुष यांना देवदर्शन घडविले. दिवाळी सरंजाम वाटप केला. मांडेकर यांनी भाजप, शिवसेनेच्या सहकार्याने गावोगाव जाऊन मतदारांच्या गाठीभेटी घेतल्या. तर शिवसेना उद्धव बाळासाहेब ठाकरे पक्ष आणि राष्ट्रवादी कॉंग्रेस शरदचंद्र पवार पक्षाच्या साथीने संग्राम थोपटे यांनीही तालुक्याचा कानाकोपरा पिंजून काढला.
प्रचारात सर्वांनी वापरल्या विविध क्लृप्त्या
मांडेकरांसाठी अजित पवार, रूपाली चाकणकर यांची मुळशीत सभा झाली. तर खासदार संजय राऊत यांनी सांगता सभा घेत थोपटेंसाठी शिवसैनिकांचे रक्त गरम केले. दगडे यांनीही घोटावडे फाटा येथे प्रचाराची सांगता सभा केली. कुलदीप कोंडे यांनीही रिक्षांची रीघ लावत एकाच प्रचारफेरीत तालुक्यात हवा निर्माण केली. थोपटे, मांडेकर, दगडे या तिघांनीही प्रचाराच्या वेगवेगळ्या क्लृप्त्या लढविल्या. सोशल मीडियावर आरोप-प्रत्यारोप, फेक नरेटिव्ह, बनावट बातम्या पसरविल्या गेल्या. त्यामुळे शेवटपर्यंत लढत अटीतटीची होण्याचे वातावरण तयार झाले. मतदारांवर ‘लक्ष्मी’ची कृपाही झाली त्यामुळे निवडणुकीची रंगत शेवटपर्यंत शिगेला गेली.
लोकसभा निवडणुकीत मुळशी तालुक्यात १ लाख ६ हजार १२४ (५४.७९ टक्के) मतदान झाले. मविआच्या सुप्रियाताईंना ९९४१ मताधिक्य मिळाले होते. विधानसभेसाठी कॉंग्रेसचे संग्राम थोपटे यांना लोकसभा निवडणुकीतच हिरवा कंदील मिळाला होता. तर महायुतीकडून उमेदवारी अर्ज भरण्याच्या शेवटच्या दिवसाच्या आदल्या रात्री शिवसेना उबाठाचे जिल्हाप्रमुख शंकर मांडेकर यांना राष्ट्रवादीत घेऊन उपमुख्यमंत्री अजित पवार यांनी एबी फॉर्म दिला. महायुतीकडून ही जागा राष्ट्रवादीला अचानक गेल्याने नाराज शिवसेनेचे कुलदीप कोंडे आणि भाजप जिल्हा युवा मोर्चाचे अध्यक्ष किरण दगडे पाटील यांनी बंडाचे निशाण फुंकले. दोन्ही शक्ती केंद्रामध्ये झालेल्या बंडखोरीत कोणाची गणिते जुळणार हा खरा प्रश्न निर्माण झाला आहे.
राष्ट्रवादीचे नेते लोकसभेच्या पराभवाचे उट्टे काढणार का?
मुळशीच्या तुलनेत भोर आणि वेल्ह्याचे मतदान प्रत्येकी १२ टक्क्यांनी वाढले. मांडेकर यांनी मुळशीतून ७० ते ७५ हजार मते मिळविल्यास ते भोर वेल्ह्यातून थोपटे यांना कडवे आव्हान देवू शकतात. दगडे तालुक्यात मांडेकरांचे मताधिक्य किती रोखणार हा मुद्दाही महत्त्वाचा ठरणार आहे. भोर, वेल्ह्यातील वाढलेले मतदान थोपटेंच्या पारड्यात पडल्यास ते विजयासाठी निर्णायक ठरू शकते. कोंडे आणि दगडे यांनी मुळशी, भोर, वेल्हा तालुका वैयक्तिक गाठीभेटीतून पोखरला आहे. त्यामुळे अपक्षांची मते कुणाला विजयासाठी तारणार आणि पराभवासाठी मारक ठरणार याकडेही सर्वांचे लक्ष लागले आहे. तर लोकसभेच्या पराभवाचे उट्टे काढण्यासाठी तालुक्याला मिळालेल्या संधीचे सोने राष्ट्रवादीचे नेते करणार का? हेही मतपेटीतून समजणार आहे.
