मुंबई दि. १५ (अधिराज्य) बौद्धजन पंचायत समितीचे सभापती सरसेनानी मा. आनंदराज आंबेडकर यांच्या आदेशानुसार व उपसभापती विनोद मोरे यांच्या मार्गदर्शनाखाली तसेच शिवडी गटक्रमांक १३ संलग्न शाखा यांच्या संयुक्त विद्यमाने, गटप्रमुख राजाभाऊ तथा रामदास धो. गमरे यांच्या अध्यक्षतेखाली मुंबई शहरात प्रथमच कार्यकर्ता प्रशिक्षण शिबीर डॉ. बाबासाहेब आंबेडकर स्मारक सभागृह, भोईवाडा, परेल, मुंबई – १२ येथे मोठ्या उत्साहात संपन्न झाले.
कार्यक्रमाची सुरवात प्रमुख मार्गदर्शक व प्रशिक्षक कार्याध्यक्ष लक्ष्मण भगत, चिटणीस श्रीधर साळवी, उपसभापती विनोद मोरे यांच्या शुभहस्ते राष्ट्रपुरुषांच्या प्रतिमांना पुष्पहार अर्पण करून करण्यात आली. उपसभापती विनोद मोरे यांनी ज्योत प्रज्वलन करून कार्यक्रमाचे उद्घाटन झाल्याचे जाहीर केले. नरेश सकपाळे गुरुजी व प्रवीण तांबे गुरुजी यांनी सुमधुर आवाजात धार्मिक पूजापाठ व विधी संपन्न केला. सदर कार्यक्रमाचे सूत्रसंचालन शिवडी गटक्रमांक १३ चे सरचिटणीस संदीप मोहिते यांनी अत्यंत गोड व लाघवी शैलीने केले. कार्यक्रमाचे अध्यक्ष विभाग गटप्रमुख राजाभाऊ तथा रामदास गमरे यांनी प्रस्ताविक सादर करताना “भारतीय संविधान अमृत महोत्सवी वर्षानिमित्त बाबासाहेब आंबेडकरांच्या भारतातील पहिल्या स्मारकात आयोजित सदर शिबीराच्या मागील संकल्पना स्पष्ट करीत कार्यकर्त्यांनी शाखा कशी चालवावी, त्यांची शाखेप्रति असलेली कर्तव्ये, जबाबदारी, कामांची पद्धत व विभागणी याबद्दल महिला व पुरुषांना देण्यात आलेल्या प्रशिक्षणाची माहिती दिली. दरवर्षी १५ ऑगस्ट, २६ जानेवारी, श्रामनेर शिबिर, रमाई आंबेडकर जयंती, भीमजयंती, जयंती उत्सव, मिरवणूक, १५ ऑगस्ट, २६ जानेवारी, बुद्धांच्या अस्थी भारतात आल्या त्याचा भव्यदिव्य स्वागतसमारंभ व मिरवणूक विभागाच्या वतीने मोठ्या उत्साहात साजरे केले जातात त्याचे दोन वर्षाचे सर्व ताळेबंद चार अहवाल व सिंकिंग फंड अहवाल सादर केला, सदर शिबिरास ७५ महिला व ७५ पुरुष कार्यकर्त्यांनी उस्फूर्तपणे सहभाग घेतल्याने यापुढे ही विभागाच्या वतीने प्रशिक्षण सदर शिबिराचे आयोजन करण्यात येईल असे नमूद केले. सदर प्रसंगी पुष्पगुच्छ, शाल, राजर्षी शाहू महाराज व बाबासाहेब आंबेडकर समग्र पत्रव्यवहार ग्रंथ, चांदीच्या चौकटीतील तथागत बुद्धांची फ्रेम देऊन अध्यक्ष राजाभाऊ तथा रामदास धो. गमरे यांच्या हस्ते प्रमुख मार्गदर्शक उपसभापती विनोद मोरे, कार्याध्यक्ष संतोष जाधव यांच्या हस्ते कार्याध्यक्ष लक्ष्मण भगत, कोषाध्यक्ष प्रदीप तांबे यांच्या हस्ते प्रशिक्षक व बौद्धजन पंचायत समितीचे चिटणीस श्रीधर साळवी यांना सन्मानित करण्यात आले. तसेच बौद्धजन पंचायत समितीचे चिटणीस रवींद्र शिंदे, माजी विभागीय गटप्रमुख सीताराम कांबळे, प्रकाश कासे यांनी ही कार्यक्रमास शुभेच्छा देत आपले मत व्यक्त केले.
सदर प्रसंगी श्रीधर साळवी यांनी सभासद नोंद वही कशी मेंटेन करावी, लग्न, जन्म-मृत्यू नोंद कशी करावी, मिनिट बुक कसे भरावे, पावत्या फाडणे, अहवाल भरणे, नोंदी घेणे, महिलांना असलेले अधिकार यासर्वांवर प्रकाशझोत टाकीत पाऊणतास उत्कृष्ट असे मुद्देसूद मार्गदर्शन करीत उपस्थित स्त्री-पुरुष कार्यकर्त्यांमध्ये चेतना निर्माण करीत त्यांचे मनोधैर्य वाढवले. कार्याध्यक्ष लक्ष्मण भगत यांनी सदर प्रसंगी “सुर्यपूत्र भैय्यासाहेब यांनी बौद्धजन पंचायत समितीच्या केलेल्या पायाभरणीपासून स्मारक उभारणी व त्या स्मारकाचा जीर्णोद्धार त्यांचे सुपुत्र आनंदराज आंबेडकर यांनी करीत सात मजली भव्य इमारत उभी करण्याचा संकल्प करून सध्यस्थितीत पाच माळ्याचे काम पूर्ण करून सहाव्या माळ्याचे काम युद्धपातळीवर सुरू असून महिन्याभरात काम पूर्ण करून लवकरच त्याचे लोकार्पण करण्यात येईल असे नमूद केले, सोबतच समितीच्या वेगवेगळ्या समित्या कश्या प्रकारे कार्यरत असून कश्यापद्धतीने काम करतात, सभासदांना कश्याप्रकारे समितीमार्फत मदत केली जाते याचे सविस्तर मार्गदर्शन करून पहिल्याप्रथम झालेल्या शिबिराबद्दल अध्यक्ष राजाभाऊ तथा रामदास धो. गमरे, सर्व शाखा, कमिटी व विभागाचे आभार मानून त्यांना शुभेच्छा दिल्या, उपसभापती विनोद मोरे यांनी बौद्धजन पंचायत समिती कश्याप्रकारे गरजूंना मदत करते सांगत असताना गटक्रमांक १३ मधील अंगावर कपडे पायात चप्पल नसलेल्या विठ्ठल मंदिरात राहणाऱ्या नवभारत शाळेच्या विद्यार्थ्याला समितीने मदत केली व तो विद्यार्थी म्हणजे भालचंद्र मुणगेकर; पुढे उच्चपदवीधर झाले व अर्थतज्ज्ञ व मुंबई विद्यापीठाचे कुलगुरू म्हणून पदभार सांभाळला. खेडमधील डॉ. प्रकाश मोरे यांना परदेशात पाठवण्यासाठी आर्थिक मदत केली, जे पुढे जाऊन जे. जे. हॉस्पिटलचे डीन झाले, अश्याप्रकारे बौद्धजन पंचायत समितीच्या माध्यमातून अनेकांना घडविले गेले, बौद्धजन पंचायत समिती ही कार्यकर्ते निर्माण करणारी फॅक्टरी आहे असे नमूद केले. भैय्यासाहेब कार्याध्यक्ष असताना त्यांनी बौद्धजन पंचायत समितीच्या वतीने धार्मिक विधी कशी असावी यासाठी बौद्धाचार्य प्रशिक्षण शिबीर आयोजित केले होते व पहिले बौद्ध पूजापाठ पुस्तक काढले होते त्या आठवणींना उजाळा दिला व बौद्धजन पंचायत समितीची ही परंपरा अशीच पुढे सुरू रहावी असे आवाहन केले; डोळ्यांचे पारणे फिटावे असा भूतो न भविष्यती असा नियोजनबद्ध कार्यक्रम केल्याबद्दल गटप्रमुख राजाभाऊ तथा रामदास धो. गमरे, शाखांचे कार्यकर्ते, विभागीय कमिटीचे मनःपूर्वक आभार मानून त्या सर्वांना शुभेच्छा दिल्या.
सरतेशेवटी अध्यक्ष राजाभाऊ तथा रामदास धो. गमरे यांनी अध्यक्षीय भाषणात सदर कार्यक्रम यशस्वी करण्यासाठी अथक परिश्रम घेणाऱ्या प्रविण तांबे, संदीप मोहिते, संतोष जाधव, राजू धोत्रे, उपाध्यक्ष प्रमोद लोखंडे, हरीश मोरे, नरेश सकपाळ, अजय पवार यांचे तसेच सर्व शाखा, सर्व समित्या, सभासद, महिला मंडळ, कार्यकर्ते, सर्व देणगीदार, सभासद, शिबिरार्थी महिला-पुरुषांचे आभार मानून कार्यक्रमाची सांगता केली.
