राज्यात विधानसभा निवडणुकांचे बिगुल लवकरच वाजणार आहे. विधानसभा निवडणुकीसाठी काही महिने शिल्लक राहिले आहेत. त्यातच आता विविध पक्षांकडून मोठमोठ्या घोषणा केल्या जात आहेत. त्यातच आता वंचित बहुजन आघाडीचे सर्वेसर्वा प्रकाश आंबेडकर आज एक मोठी घोषणा करणार आहेत. या पार्श्वभूमीवर वंचित बहुजन आघाडीने एक व्हिडीओ शेअर केला आहे.
वंचित बहुजन आघाडीकडून व्हिडीओ ट्वीट
वंचित बहुजन आघाडीच्या अधिकृत ट्विटरवरुन एक व्हिडीओ ट्वीट करण्यात आला आहे. या व्हिडीओत आज संध्याकाळी 4 वाजता एक मोठी घोषणा होणार असल्याचे म्हटले आहे. यानिमित्ताने औरंगाबादमध्ये एका पत्रकार परिषदेचेही आयोजन करण्यात आले आहे, असे या व्हिडीओत पाहायला मिळत आहे. त्यासोबतच प्रकाश आंबेडकरांचा सभेतील एक व्हिडीओ आणि पक्षाचे चिन्हदेखील या व्हिडीओत दिसत आहे.
४ वाजता होणार पत्रकार परिषद
“आज मी मोठी घोषणा करणार आहे. यासाठी औरंगाबादमधील सुभेदारी शासकीय विश्रामगृहावर दुपारी 4 पत्रकार परिषद घेणार आहे”, अशी माहिती वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी ट्विट करुन दिली.
राजकारणात मोठी उलथापालथ होणार का?
प्रकाश आंबेडकर यांच्या या ट्वीटनंतर ते नेमकी काय घोषणा करणार याकडे संपूर्ण महाराष्ट्राचे लक्ष लागले आहे. आगामी विधानसभा निवडणुकीच्या पार्श्वभूमीवर ही घोषणा असेल का? त्यांच्या घोषणेमुळे राजकारणात मोठी उलथापालथ होणार का? अशा अनेक चर्चांना उधाण आलं आहे. तसेच प्रकाश आंबेडकरांच्या घोषणेनंतर आता महाराष्ट्राच्या आणि देशाच्या राजकारणात विविध चर्चा सुरु झाल्या आहेत. त्यामुळे आता प्रकाश आंबेडकर काय घोषणा करणार हे पाहणे महत्त्वाचे ठरणार आहे.
