पुणे परिसरातील वाहतूक कोंडी सोडविण्यासाठी पुणे ते शिरूर, हडपसर ते यवत आणि तळेगाव-चाकण- शिक्रापूर या तीन उन्नत महामार्गांच्या कामासाठी १८ हजार कोटींचा खर्च येणार आहे. पुढील चार वर्षांत हे प्रकल्प मार्गी लागणार आहेत. या महामार्गांसाठी प्रत्येक रस्त्यावर प्रतिकिलोमीटर नऊ रुपयांप्रमाणे २५ वर्षांसाठी पथकर (टोल) आकारण्यात येणार आहे. मुख्यमंत्री देवेंद्र फडणवीस व केंद्रीय रस्ते वाहतूकमंत्री नितीन गडकरी यांच्या उपस्थितीत आज, शनिवारी या प्रकल्पांचे भूमिपूजन होणार आहे.
पुणे उन्नत मार्ग
‘महाराष्ट्र राज्य पायाभूत सुविधा विकास महामंडळाकडून ‘आरेखन-बांधकाम-वित्त-संचलन आणि हस्तांतर’ या सार्वजनिक खासगी भागीदारी तत्त्वावर हे रस्ते विकसित करण्यात येणार आहेत. तिन्ही रस्त्यांसाठी सुमारे १०० हेक्टर भूसंपादन करावे लागणार आहे. यातील दोन रस्त्यांवर मेट्रोचा समावेश आहे,’ अशी माहिती जिल्हाधिकारी जितेंद्र डुडी आणि महामंडळाचे व्यवस्थापकीय संचालक ब्रिजेश दीक्षित यांनी शुक्रवारी पत्रकार परिषदेत दिली. मुख्य अभियंता रणजित हांडे, कार्यकारी अभियंता अनिल सगर या वेळी उपस्थित होते. “तिन्ही महामार्गाचे काम एकाच वेळी सुरू करण्यात येणार आहे. संपूर्ण रस्ते बंद नसतील; तसेच अंतर्गत रस्त्यांवरून वाहतूक वळविण्यात येणार आहे,” अशी माहिती पुण्याचे जिल्हाधिकारी जितेंद्र डुडी यांनी दिली आहे.
पुणे-शिरूर
पुणे-शिरूर या ५३.४० किलोमीटर सहापदरी उन्नत द्रुतगती महामार्गाची सुरुवात वाघोलीपासून होणार असून, कोंढापुरीपर्यंत हा महामार्ग उन्नत असेल. त्यानंतर सहा किलोमीटर जमिनीवर, त्यानंतर पुन्हा दोन किलोमीटर उन्नत आणि त्यानंतर अडीच किलोमीटर जमिनीवरील रस्ता असेल. पुढे दोन किलोमीटर उन्नत महामार्ग असेल. शिरूर बायपासजवळ हा महामार्ग संपेल. या रस्त्यासाठी ४५ ते ५० हेक्टर भूसंपादन करावे लागणार असून, ७,५१५ कोटींचा खर्च येणार आहे. उन्नत महामार्गावर सहा आणि जमिनीवरील रस्त्यावर दोन असे आठ टोल असतील.
हडपसर ते यवत
हडपसर ते यवत हा ३१.५० किलोमीटरचा महामार्ग २५ किलोमीटर सहापदरी उन्नत, तर साडेसहा किलोमीटर जमिनीवरून सहापदरी असेल. रस्त्याची सुरुवात हडपसर गाडीतळापुढील रवीदर्शन चौकापासून होणार असून, सहजपूरपर्यंत उन्नत, त्यानंतर यवतपर्यंत जमिनीवरील सहापदरी मार्ग असेल. रवीदर्शन ते कोरेगाव मूळजवळील बाह्य रिंग रोडपर्यंत १७.७६ किलोमीटरची मेट्रोसाठी मार्गिका असेल. या महामार्गासाठी ५,२६२ कोटींचा खर्च येणार असून, १५ किलोमीटरचे भूसंपादन आवश्यक आहे. उन्नत मार्गिकेवर तीन व जमिनीवर दोन असे पाच टोल असतील.
तळेगाव-चाकण-शिक्रापूर
तळेगाव-चाकण-शिक्रापूर या ५३.२० किलोमीटर रस्त्यासाठी चाकणपर्यंत २६.३० किलोमीटरचा चारपदरी उन्नत, तर शिक्रापूरपर्यंतचा २७ किलोमीटरचा मार्ग जमिनीवरील चारपदरी असेल. यासाठी ५,२०० कोटींचा खर्च येणार असून, सुधावाडीजवळ बाह्य रिंग रोड, तर शिक्रापूरजवळ पुणे-शिरूर सहापदरी उन्नत महामार्गाला जोडण्यात येणार आहे. यासाठी ४० हेक्टरचे भूसंपादन करण्यात येणार असून, उन्नत मार्गासाठी तीन, तर जमिनीवरील रस्त्यासाठी दोन असे पाच टोल असतील. असतील. खराडी बायपास ते विठ्ठलवाडी ही मेट्रोसाठी स्वतंत्र मार्गिका असेल.
