पुणे, ता. १३ : पुण्यातील ज्येष्ठ राजकीय नेते, माजी आमदार आणि सामाजिक कार्यकर्ते रामभाऊ गेनबा मोझे यांचे अल्पशा आजाराने निधन झाले. त्यांच्या निधनाने संगमवाडी परिसरासह पुण्याच्या राजकीय, सामाजिक आणि शैक्षणिक क्षेत्रात शोककळा पसरली आहे. त्यांच्या पार्थिवावर सोमवारी (१३ जुलै) सायंकाळी संगमवाडी स्मशानभूमीत अंत्यसंस्कार करण्यात आले.
रामभाऊ मोझे यांनी १९८५, १९९० आणि १९९५ या सलग तीन विधानसभा निवडणुकांत काँग्रेसच्या तिकिटावर तत्कालीन बोपोडी विधानसभा मतदारसंघाचे प्रतिनिधित्व केले. राज्याच्या राजकारणात ते ज्येष्ठ नेते शरद पवार यांचे खंदे समर्थक म्हणून ओळखले जात होते. पक्ष संघटना बळकट करण्याबरोबरच पुण्यातील अनेक राजकीय घडामोडींमध्ये त्यांचा सक्रिय सहभाग होता.
रामभाऊ मोझे यांनी आमदार म्हणून काम करताना बोपोडी मतदारसंघातील विकासकामांसाठी विशेष प्रयत्न केले. ते कुस्ती क्षेत्राशीही निगडित होते आणि स्थानिक राजकारणात त्यांचा प्रभावी सहभाग होता. पुढे त्यांनी शिक्षण क्षेत्रातही महत्त्वपूर्ण योगदान देत वाघोली येथील पार्वतीबाई गेनबा मोझे अभियांत्रिकी महाविद्यालयासह विविध शैक्षणिक उपक्रम उभारण्यात पुढाकार घेतला.
त्यांच्या निधनाबद्दल विविध राजकीय, सामाजिक आणि शैक्षणिक क्षेत्रातील मान्यवरांनी शोक व्यक्त केला असून, मोझे कुटुंबीयांवर दुःखाचा डोंगर कोसळला आहे.
