मॉन्सूनच्या पावसाने राज्यात सर्वदूर हजेरी लावली आहे. मागील दोन ते तीन दिवसांपासून पाऊस सुरू असून गुरुवारी रात्रीपासून संततधार सुरु आहे.शुक्रवारी सकाळीही पावसाने दमदार हजेरी लावली आहे. यामुळे धरणांतील पाणीसाठा वाढला असून पुणेकरांना पाणीटंचाईपासून तूर्तास दिलासा मिळाला आहे. दरम्यान पुण्यात पावासाचा जोर वाढणार असून हवामान विभागाने पुण्याच्या घाटमाथ्यावर पुढील ३ दिवसांसाठी रेड अलर्ट जारी केला आहे.
गेल्या दोन ते तीन दिवसांपासून पुणे शहर आणि परिसरात पावसाने जोरदार हजेरी लावली आहे. पुढील दोन ते तीन दिवस शहरात पावसाचा जोर आणखी वाढण्याची शक्यता भारतीय हवामानशास्त्र विभागाने वर्तविली आहे. विशेषतः घाटविभागात काही ठिकाणी जोरदार ते अतिजोरदार पावसाचा अंदाज असल्याने घाटविभागाला पुढील तीन दिवसांसाठी ‘रेड’ अलर्ट जारी करण्यात आला आहे. शहरात गेले तीन दिवस पावसाची हजेरी कायम असल्याने कमाल तापमानात तब्बल पाच अंश सेल्सिअसची घट नोंदवली गेली आहे. गुरुवारी (ता. २) शहरात सकाळपासूनच पावसाची रिपरिप सुरू होती. रात्री उशिरापर्यंत सुरू असलेल्या या पावसामुळे अनेक सखल भागांत आणि रस्त्यांवर मोठ्या प्रमाणावर पाणी साचल्याचे चित्र होते. परिणामी, कामावरून घरी जाणाऱ्या नागरिकांची गैरसोय झाली. शहरातील अनेक भागांत वाहतूक व्यवस्था संथगतीने सुरू होती. गुरुवारी शहराचे कमाल तापमान २७ अंश सेल्सिअस, तर किमान तापमान २१.१ अंश सेल्सिअस इतके नोंदविण्यात आले.
