पुणे, २१ जून : आरोग्य योग अँड निसर्गोपचार संस्था यांच्या वतीने तसेच सकल हिंदू समाज (वारजे शाखा) आणि अखिल भारतीय ब्राह्मण महासंघ (वारजे शाखा) यांच्या सहकार्याने आंतरराष्ट्रीय योग दिन २०२६ मोठ्या उत्साहात साजरा करण्यात आला. वारजे येथील संस्कृती बँक्वेट हॉल येथे आयोजित करण्यात आलेल्या या कार्यक्रमास सर्व वयोगटातील नागरिकांचा उत्स्फूर्त प्रतिसाद लाभला.
कार्यक्रमाच्या अध्यक्षस्थानी मा. खासदार डॉ. मेधा ताई कुलकर्णी उपस्थित होत्या. त्यांच्या हस्ते दीपप्रज्वलन करून कार्यक्रमाची सुरुवात झाली. त्यानंतर उपस्थितांनी सामूहिक योगाभ्यास, प्राणायाम व विविध योगासनांचा सराव केला.
यावेळी मार्गदर्शन करताना मा. खासदार डॉ. मेधा ताई कुलकर्णी म्हणाल्या, “योग ही भारताची जगाला दिलेली अमूल्य देणगी आहे. आजच्या तणावपूर्ण आणि धकाधकीच्या जीवनात शारीरिक तसेच मानसिक आरोग्य जपण्यासाठी योग अत्यंत उपयुक्त आहे. निरोगी व्यक्ती, सशक्त समाज आणि विकसित भारत घडविण्यासाठी प्रत्येक नागरिकाने योगाला आपल्या जीवनशैलीचा अविभाज्य भाग बनवावे. योग दिन हा केवळ एका दिवसापुरता मर्यादित न राहता तो प्रत्येकाच्या दैनंदिन जीवनाचा भाग व्हावा.”
आरोग्य योग अँड निसर्गोपचार संस्था ही योग, निसर्गोपचार आणि समग्र आरोग्य क्षेत्रात कार्यरत एक सामाजिक संस्था असून प्राचीन योगविद्या आणि आधुनिक जीवनशैली यांचा समन्वय साधत निरोगी, सुदृढ आणि जागरूक समाज घडविण्याचे कार्य गेल्या अनेक वर्षांपासून करत आहे. संस्थेमार्फत योग प्रशिक्षण, आरोग्य शिबिरे, कार्यशाळा, व्याख्याने तसेच विविध जनजागृती उपक्रमांचे नियमित आयोजन केले जाते. बालकांपासून ज्येष्ठ नागरिकांपर्यंत सर्व वयोगटांमध्ये योग आणि आरोग्यदायी जीवनशैलीचा प्रसार करणे हे संस्थेचे प्रमुख उद्दिष्ट आहे.
संस्थेचे संस्थापक डॉ. विजय रमेश कुकरेजा हे योग व निसर्गोपचार क्षेत्रातील अनुभवी मार्गदर्शक असून त्यांनी हजारो नागरिकांपर्यंत योगाचा संदेश पोहोचविला आहे. त्यांच्या नेतृत्वाखाली संस्था समाजहित, आरोग्य संवर्धन आणि व्यक्तिमत्त्व विकासासाठी सातत्याने कार्यरत आहे.
संस्थेचे ध्येय “योगाच्या माध्यमातून निरोगी व्यक्ती, सशक्त कुटुंब, सुसंस्कृत समाज आणि समृद्ध राष्ट्र घडविणे” हे असून त्यादृष्टीने विविध उपक्रम राबविले जातात.
कार्यक्रमाच्या यशस्वी आयोजनासाठी संस्थापक डॉ. विजय रमेश कुकरेजा, समन्वयक प्राजक्ता देव व वैदेही देशपांडे यांनी विशेष परिश्रम घेतले. कार्यक्रमाच्या शेवटी उपस्थित नागरिकांनी अशा आरोग्यवर्धक उपक्रमांचे नियमित आयोजन करण्याची अपेक्षा व्यक्त केली.
