पुणे विधान परिषदेच्या जागेवर आपला उमेदवार विजयी करण्यासाठी भारतीय जनता पक्ष आणि राष्ट्रवादी काँग्रेस पक्ष दोन्ही पातळीवर जोराची स्पर्धा सुरू झाली असली तरी सुद्धा पुणे शहर आणि पिंपरी चिंचवड परिसरातील इच्छुक उमेदवारांच्या पदरी निराशा पडण्याची शक्यता निर्माण झाली आहे. पुणे विधान परिषद परिसरामध्ये भारतीय जनता पक्ष आणि राष्ट्रवादी काँग्रेस पक्षाची समान ताकद असली तरीसुद्धा हे दोन्ही पक्ष महायुती म्हणून राज्यात सत्तेत असल्याने या जागी नक्की संधी कोणाला मिळणार याची सध्या रस्सीखेच सुरू आहे. पुणे विधान परिषदेच्या जागेसाठी सध्या फक्त आणि फक्त पुणे शहर भारतीय जनता पक्ष आणि राष्ट्रवादी काँग्रेस पक्ष पदाधिकारी आमने सामने आल्याचे चित्र पाहण्यास मिळत आहे.
या निवडणुकीची खरी रंगत पक्षांतर्गत आणि महायुतीमधील शह-काटशहाच्या राजकारणात दडली आहे. विधानसभा निवडणुकीत पराभव झालेल्या ‘माजी’ आमदारांना विधानपरिषदेच्या माध्यमातून राजकीय पुनर्वसनाची नामी संधी दिसू लागली आहे. पुन्हा मुख्य प्रवाहात येण्यासाठी ही निवडणूक ‘लाईफलाईन’ वाटत आहे. त्यामुळे भाजप आणि राष्ट्रवादी काँग्रेस या दोन्ही पक्षांतील पराभूत दिग्गजांनी या जागेवर डोळा ठेवून मोर्चेबांधणी सुरू केली आहे. राष्ट्रवादी काँग्रेसकडून ही निवडणूक लढण्यासाठी दिलीप मोहिते, सुनील टिंगरे, रमेश थोरात, विलास लांडे हे माजी आमदार इच्छुक आहेत. याशिवाय अजित गव्हाणे, रणजित शिवतारे, दीपक मानकर यांचीही नावे चर्चेत आहेत. कदाचित सुनेत्रा पवार यांच्याकडून धक्कातंत्राचा वापर करून चर्चेत नसलेले नावही समोर येऊ शकते, तर भाजपमध्ये संग्राम थोपटे, संजय जगताप, गणेश बिडकर, यांच्याकडून उमेदवारीसाठी प्रयत्न सुरू आहेत.
या जागेवर भाजपकडून शहरातील काही नावांचा जर वाढत आहे तर राष्ट्रवादी काँग्रेस पक्षाकडूनही शहरातीलच माजी आमदारांसह व ज्येष्ठ सदस्यांची नावे चर्चेत आहेत राजकीय गणितांचा विचार करता शहर आणि परिसरातील इच्छुकांच्या पदरी निराशा पडण्याची शक्यता निर्माण झाली आहे. भारतीय जनता पक्षासह राष्ट्रवादी काँग्रेसनेही रविवारी दावा केला. यामुळे या जागेसाठी महायुतीतील भाजप आणि राष्ट्रवादी काँग्रेसमध्ये चुरस असून ही जागा कोण लढवणार याचा निर्णय मंगळवारी राज्यपातळीवर होणार आहे. पुण्याच्या जागेवर आमचा दावा कायम असून महायुती म्हणून आम्ही निवडणुकीला सामोरे जाणार असल्याचे राष्ट्रवादी काँग्रेसचे शहराध्यक्ष सुनील टिंगरे यांनी पत्रकार परिषदेत सांगितले.
यावेळी पक्षाचे कार्याध्यक्ष प्रदीप देशमुख, पालिकेतील विरोधी पक्षनेते निलेश निकम, नगरसेवक राकेश कामठे उपस्थित होते. भाजपने मतदारांची दिलेली आकडेवारी चुकीची असून, आमचे संख्याबळ ३७१ असल्याचा दावा टिंगरे यांनी केला. आमच्याकडे १०-१२ जण इच्छुक आहे. या जागेसाठी भाजपने आग्रह करणे साहजिकच आहे. पुण्याचे नेतृत्व राष्ट्रवादीच करणार आहे. आमच्या पक्षात कोणतीही धुसफूस नाही, त्यामुळे कोणीही गैरसमजात राहू नये, असेही टिंगरे यांनी नमूद केले.
असे आहे पक्षीय बलाबल :
पुणे स्थानिक स्वराज्य संस्थेच्या या जागेसाठी एकूण ८२७ सदस्यांचे मतदान (महायुती ७३४)
राष्ट्रवादी काँग्रेस अजित पवार पक्ष – ३४७
भाजप -३१९
शिवसेना – ६८ असे महायुतीचे एकूण सदस्य
महाविकास आघाडी ४७
उद्धव ठाकरेंची शिवसेना ११
काँग्रेस १९
शरद पवार यांची राष्ट्रवादी काँग्रेस १७
त्याशिवाय
अपक्ष २३, स्थानिक आघाडीचे २३ सदस्य आहेत
नगरपालिकांमधील संख्याबळ
(बारामती, इंदापूर आणि जुन्नर, लोणावळा, तळेगाव, वडगाव मावळ, चाकण, राजगुरूनगर, मंचर, देहू, आळंदी, दौंड, खेड आणि हवेली, जेजुरी, भोर सासवड आणि शिरूर)
राष्ट्रवादी काँग्रेस (अजित पवार गट) २१९,
भाजप ९०,
शिवसेना (एकनाथ शिंदे गट) ५५,
अधिक वाचा विधान परिषदेच्या तीन जागांवर राष्ट्रवादीचा दावा; पुण्यातील नेतृत्वाचा लढा? महायुतीत ‘हायव्होल्टेज’ राजकीय घडामोडी
काँग्रेस ४,
शिवसेना (उद्धव बाळासाहेब ठाकरे) ४,
राष्ट्रवादी काँग्रेस (शरद पवार गट)११,
बसप १, रासप १, स्थानिक आघाडी २४, अपक्ष २७
पुणे जिल्ह्यातील झेडपी व पंचायत समिती
पुणे जिल्हा परिषदेत
राष्ट्रवादी काँग्रेस (अजित पवार गट) ५१,
भाजप १०,
शिवसेना (उद्धव बाळासाहेब ठाकरे)०६,
शिवसेना (एकनाथ शिंदे गट) ०५,
राष्ट्रवादी काँग्रेस (शरद पवार गट)०१ ,
एकूण ७३ सदस्य आहेत.
(पुणे जिल्हा परिषद स्वीकृत सदस्य निवड झालेली नाही)
पंचायत समितीच्या सभापतीला मतदानाचा अधिकार
पुणे जिल्ह्यात १३ पंचायत समित्या अजित पवार राष्ट्रवादी काँग्रेस ११ ठिकाणी भाजपचे 2 ठिकाणी सभापती आहेत.
पुणे महानगरपालिका पक्षनिहाय संख्याबळ
पुणे महापालिका भाजप (BJP) ११९,राष्ट्रवादी काँग्रेस अजित पवार पक्ष २३, काँग्रेस १२, एकनाथ शिंदे शिवसेना ०७, उद्धव ठाकरे शिवसेना ०५, राष्ट्रवादी काँग्रेस शरद पवार पक्ष ०२ असे एकूण १६८ सदस्य आहेत. तर १० स्वीकृत सदस्य असून त्यामध्ये भाजप ७, राष्ट्रवादी २ तर काँग्रेसचा एक सदस्य आहे.
अधिक वाचा ‘देऊळ बंद 2’ प्रेक्षकांकडून सकारात्मक प्रतिसाद; “विचार करायला लावणारी ‘प्रवीण’ कलाकृती”
पिंपरी-चिंचवड महापालिका पक्षनिहाय संख्याबळ
पिंपरी-चिंचवड महानगरपालिकेत भाजप ८४, अजित पवार राष्ट्रवादी काँग्रेस ३६, शरद पवार राष्ट्रवादी काँग्रेस पक्ष ०२, एकनाथ शिंदे यांची शिवसेना ०३, उद्धव ठाकरे यांची शिवसेना ०१ असे एकूण १२८ सदस्य आहेत. तर १० स्वीकृत सदस्य असून त्यामध्ये भाजप ७, राष्ट्रवादी काँग्रेस अजित पवार पक्षाचे ३ सदस्य आहेत.
दौंडमधील नागरी हित संरक्षण मंडळाच्या १७ नगरसेवकांनी भाजपला पाठिंबा दिल्याचे सांगितले जात असून, त्यामुळे भाजपचे एकूण संख्याबळ ३३६ होत असले तरी ते राष्ट्रवादीपेक्षा अकराने कमीच आहे. गेल्या दोन टर्म या जागेवर राष्ट्रवादीचे अनिल भोसले आमदार होते. त्यामुळे या जागेवर राष्ट्रवादीचा नैसर्गिक दावा आहे. मात्र, महापालिकेत वाढलेले वर्चस्व पाहता भाजप ही जागा खेचून आणण्यासाठी उत्सुक आहे. जर दोन्ही पक्षांनी प्रतिष्ठेचा मुद्दा केला आणि मैत्रीपूर्ण लढत झाली, तर पुणे जिल्ह्यात मोठ्या प्रमाणावर ‘घोडेबाजार’ होण्याची दाट शक्यता आहे.आमचे संख्याबळ ३७१
मतदारांची संख्या भाजपने ७९८ सांगितली असली तरी प्रत्यक्षात मतदार यादीनुसार मतदारांची संख्या ८६७ आहे. पंचायत समितीचे १३ पैकी १० सभापती आमच्या पक्षाचे आहेत. नगरपरिषद /नगरपंचायतीचे १८ पैकी ११ नगराध्यक्षही आमचे असून २७ स्वीकृत सदस्य आहेत. काँग्रेसची सदस्य संख्या भाजपने ४८ दाखवली असली तरी स्वीकृतसह त्यांच्याकडे २० सदस्य आहेत. अपक्षांसह मित्रपक्षही आमच्या पाठीशी आहेत.
स्वीकृतसह भाजप ७९८ मतदार असल्याचे सांगते. एकूण ८६७ सदस्यांपैकी ३७० सदस्य राष्ट्रवादी काँग्रेस पक्षाचे असून त्याखालोखाल भाजपा, इतरांचे सदस्य आहेत. ही जागा आमचीच असून अनाठायी वाद निर्माण करण्यासाठी जर कोणी या जागेवर दावा करत असेल, तर ते योग्य नाही. मित्रपक्ष म्हणून राष्ट्रवादी काँग्रेसने महायुतीत समन्वयाची भूमिका घेतली आहे, असे टिंगरे म्हणाले.
यांच्या नावाची चर्चा
पुणे शहरातून सुनील टिंगरे, विक्रम काकडे, दीपक मानकर विधानपरिषदेच्या जागेसाठी इच्छुक आहेत. जिल्ह्यातून विलास लांडे, योगेश बहल, नाना काटे, भाऊसाहेब भोईर, संदीप वाघेरे, सुरेश घुले, दिलीप मोहिते पाटील, रमेश थोरात इच्छुक असून त्यांच्या नावांचीही जोरदार चर्चा आहे.
