पुणे शहरात सोमवारी (ता. २५) मेघगर्जना आणि विजांच्या कडकडाटासह पावसाची शक्यता असल्याचा अंदाज भारतीय हवामानशास्त्र विभागाने वर्तविला आहे. उन्हाचे चटके काहीसे कमी झाले असले, तरी वाढलेल्या उकाड्याने घामाघूम झालेल्या पुणेकरांना या पावसामुळे मोठा दिलासा मिळण्याची शक्यता आहे. शहर आणि परिसरात रविवारी कमाल तापमानात दोन अंश सेल्सिअसने घट नोंदवली गेली. मात्र किमान तापमानात तीन अंश सेल्सिअसपर्यंत वाढ झाली. त्यामुळे कमाल तापमान ३५ अंश सेल्सिअसवर, तर किमान तापमान २५.४ अंश सेल्सिअस इतके नोंदविण्यात आले.
पुणे आणि परिसरात सोमवारी कमाल आणि किमान तापमानात किंचित वाढ होणार आहे. कमाल तापमान ३६ अंश सेल्सिअस तर किमान तापमान २५ अंश सेल्सिअस इतके नोंदविण्यात येणार आहे.
आकाश मुख्यतः निरभ्र राहून दुपारी आणि सायंकाळी आकाश ढगाळ राहण्याची शक्यता आहे. तसेच मेघगर्जना आणि विजांच्या कडकडाटासह हलक्या स्वरूपाच्या पावसाची शक्यता आहे. मंगळवारपासून (ता. २६) कमाल तापमानात किंचित वाढ होण्याची शक्यता असल्याचा अंदाज हवामानशास्त्र विभागाने वर्तविला आहे.
