लखनौ सुपर जायंट्सविरुद्धच्या IPL२०२६ स्पर्धेतील ३२ व्या सामन्यात वैभव सूर्यवंशी आपल्या नेहमीच्या आक्रमक शैलीत खेळू शकला नाही. टॉस गमावल्यावर राजस्थान रॉयल्सचा संघ पहिल्यांदा फलंदाजीसाठी मैदानात उतरला. या सामन्यात वैभव सूर्यवंशीला प्रिन्स यादव घेऊन आलेल्या दुसऱ्या षटकात स्ट्राईक मिळाले. खणखणीत चौकार मारून खाते उघडताच वैभव सूर्यवंशीनं आयपीएलमध्ये नवा इतिहास रचला. या चौकारासह आयपीएलमध्ये सर्वात जलद ५०० धावा करण्याचा विक्रम आता वैभव सूर्यवंशीच्या नावे झाला आहे.
सर्वात जलद ५०० धावा करणारा फलंदाज ठरला वैभव
वैभव सूर्यवंशी हा आयपीएलच्या इतिहासात सर्वात जलद ५०० धावा पूर्ण करणारा फलंदाज ठरला आहे. त्याने फक्त २२७ चेंडूंमध्ये हा टप्पा गाठला. या कामगिरीसह त्याने ग्लेन मॅक्सवेल आणि वीरेंद्र सेहवाग यांसारख्या दिग्गजांचे विक्रम मोडले.
- वैभव सूर्यवंशी – २२७ चेंडू
- ग्लेन मॅक्सवेल – २६० चेंडू
- प्रियांश आर्य – २७८ चेंडू
- वीरेंद्र सेहवाग – २८० चेंडू
- नमन धीर – २८३ चेंडू
मेडन ओव्हर विकेट
राजस्थानच्या संघाने यशस्वी जैस्वाल आणि ध्रुव जुरेलची विकेट गमावल्यावर एतिहासिक कामगिरी करणाऱ्या वैभव सूर्यवंशीकडून संघाला मोठी अपेक्षा होती. पण मोहसिन खान याने आपल्या कारकिर्दीतील पहिले निर्धाव षटक टाकत वैभव सूर्यवंशीची शिकार केली. वादळी खेळीसाठी ओळखल्या जाणाऱ्या युवा बॅटरची खेळी दोन चौकारासह ११ चेंडूत ८ धावांवरच थांबली.
वैभव सूर्यवंशीसमोर मोहसिन खान ठरला भारी
यंदाच्या हंगामात स्टार गोलंदाजांची बिनधास्त अंदाजात धुलाई करणाऱ्या वैभव सूर्यवंशीसमोर मोहसिन खान याने अचूक टप्प्यावर गोलंदाजी केली. पाच निर्धाव चेंडू टाकत त्याच्यावरील दबाव वाढवला. त्यानंत ऑफ स्टंपवर आखुड टप्प्यावर चेंडू टाकत त्याने वैभव सूर्यवंशीसाठी विकेटच जाळं विणलं. वैभव मोठा फटका खेळलाया गेला अन् दिग्वेश राठीच्या उत्तम झेलसह त्याच्या खेळीला ब्रेक लागला.
