केंद्रीय निवडणूक आयोगाने जारी केलेल्या कार्यक्रमानुसार महाराष्ट्रातील बारामती आणि राहुरी येथे 23 एप्रिल रोजी पोटनिवडणुकीसाठी मतदान होणार आहे. तर, तामिळनाडू आणि पश्चिम बंगालमध्ये विधानसभा निवडणुकीसाठी मतदान होणार आहे. बारामतीत राष्ट्रवादीच्या सुनेत्रा पवार आणि राहुरीत अक्षय कर्डिले हे निवडणुकीच्या रिंगणात आहेत. राष्ट्रवादीचे नेते अजितदादा पवार आणि भाजपचे आमदार शिवाजी कर्डिले यांच्या नि धनामुळे रिक्त झालेल्या या जागेसाठी ही पोटनिवडणूक होत आहे.
बारामती पोटनिवडणूक
अजित पवार यांच्या निधनानंतर बारामतीतील राजकीय वारसा टिकवण्यासाठी सुनेत्रा पवार यांनी सक्रिय पावले उचलली. त्यांनी राज्यसभेच्या खासदारकीचा राजीनामा देत राज्याच्या राजकारणात थेट प्रवेश केला. त्यानंतर उपमुख्यमंत्रीपदाची जबाबदारी स्वीकारत त्यांनी बारामतीतील रिक्त जागेसाठी पोटनिवडणूक लढण्याचा निर्णय घेतला. बारामतीच्या या पोटनिवडणुकीत काँग्रेसने आकाश मोरे यांच्या रुपाने उमेदवार दिला होता. मात्र त्यांच्या माघारीनंतरही 23 उमेदवार रिंगणात राहिले आहेत.
बारामती मतदारसंघात एकूण 3 लाख 84 हजार 579 मतदार नोंदणीकृत आहेत. यामध्ये 1 लाख 93 हजार 871 पुरुष, 1 लाख 90 हजार 684 महिला आणि 24 तृतीयपंथी मतदारांचा समावेश आहे. या सर्व मतदारांसाठी 478 मतदान केंद्रांची उभारणी करण्यात आली आहे. मतदान प्रक्रियेसाठी 478 ईव्हीएम, 956 बॅलेट युनिट्स आणि 478 व्हीव्हीपॅट यंत्रे केंद्रांवर उपलब्ध असणार आहेत. याशिवाय अतिरिक्त म्हणून 60 ईव्हीएम व व्हीव्हीपॅट आणि 120 बॅलेट युनिट्स राखीव ठेवण्यात आले आहेत.
राहुरी पोटनिवडणुकीसाठी मतदान
राहुरीत एकूण 3 लाख 33 हजार 545 मतदार आपला मतदानाचा हक्क बजावणार आहेत. मतदारांना सुरक्षित आणि निर्भयपणे मतदान करता यावे यासाठी सर्व 374 मतदान केंद्रांवर आवश्यक सुविधा उपलब्ध करण्यात आल्या आहे.
राहुरी पोटनिवडणुकीतील प्रमुख उमेदवार:
अक्षय कर्डिले – भाजप (BJP)
गोविंद मोकाटे – राष्ट्रवादी काँग्रेस (शरदचंद्र पवार)
रावसाहेब खेवरे – अपक्ष (माजी शिवसेना ठाकरे गट जिल्हाप्रमुख)
संतोष चोळके – वंचित बहुजन आघाडी (VBA)
या राज्यात विधानसभा निवडणुकासाठी मतदान
तामिळनाडू आणि पश्चिम बंगालमध्ये विधानसभा निवडणुकीसाठी मतदान होणार आहेत. तामिळनाडूमध्ये राज्यातील सर्व 234 विधानसभा मतदारसंघांसाठी एकाच टप्प्यात मतदान होणार आहे. राज्यात पाच कोटी 73 लाख 43 हजारांहून अधिक मतदार आहेत.
पश्चिम बंगालमध्ये आज 16 जिल्ह्यांतील 152 जागांवर विधानसभा निवडणुका होणार आहेत. या टप्प्यात एक हजार चारशे अठ्ठ्याहत्तर उमेदवार निवडणूक लढवत आहेत. पश्चिम बंगाल विधानसभा निवडणुकीच्या मतदानाचा दुसरा टप्पा पुढील बुधवारी पार पडणार आहे.
