पुणेः सातारा जिल्हातील खंडाळा तालुक्यामधील मावशी येथील औद्यागिक कंपनीत निवृत्त पोलिस अधिकारी प्रकाश राऊत यांनी ठेकेदारी काम मिळविण्यासाठी दादागिरी करीत असल्याचे तक्रार थेट मुख्यमंत्री देवेंद्र फडवणीस यांच्याकडे दाखल झाली आहे. मुख्यमंत्री कार्यालयाने तक्रारीची दखल घेत गृहखात्याला चौकशी करण्याचे आदेश दिले आहे.
पुण्याजवळील मुळशी तालुक्यातील वोहर पार्किंग सिस्टीम प्रा. लि. आता सातारा जिल्हातील खंडाळा तालुक्यात मावशी गावात स्थलांस्तरीत होत आहे. या कंपनीतील ठेकेदारी कामे मिळविण्यासाठी निवृत्त पोलिस अधिकारी प्रकाश राऊत हे कंपनीत दादागिरी करीत असल्याची तक्रार जेष्ठ नागरिक ताराबाई दुधाणे यांनी केली आहे.
दुधाणे यांनी तक्रार अर्जात पुणे पोलिस दलातील निवृत्त पोलिस अधिकारी प्रकाश राऊत हे आपण पोलिस अधिकारी असल्याचे भासवून करून सदरच्या कंपनीतील कामे घेत आहे. पोलिस अधिकारी आहे असे सांगून प्रकाश राऊत हे स्वतः कंपनीत जाऊन कामाची मागणी करीत आहे. मुंबईतील एका मोठ्या राजकीय व्यक्तीचाही हस्तक्षेप राऊत यांनी करून वोहर पार्किंग सिस्टीम मालकांवर दबाव टाकला असल्याचा आरोप केला आहे.
पुणे जिल्हातील मुळशी तालुक्यातील पिरंगुटमध्ये वोहर पार्किंग सिस्टीम प्रा. लि. या कंपनीमुळे ताराबाई दुधाणे यांच्या दिवंगत मुलगा सुभाष दुधाणे यांचा कुटुंबियांचा उदरनिर्वाह सुरू आहे. वोहर पार्किंग सिस्टीम कंपनीतील स्क्रॅप गेली 14 वर्ष पृथ्वीराज एंटरप्रायझेस कंपनीला देत आहे. ज्यात दुधाणे यांच्या दिवंगत मुलाची भागीदारी होती. त्याच्या अकाली निधनानंतर ती सुरू होती. आता वोहर पार्किंग सिस्टीम कंपनी खंडाळा येथे स्थलांतरित होत असल्याने निवृत्त पोलिस अधिकारी प्रकाश राऊत यांच्या दादागिरीमुळे माझ्या मुलांचा कुटुंबाचा उदरनिर्वाहाचा प्रश्न निर्माण झाला आहे. मुलाची पत्नी रूपाली दुधाणे व मुलगा साईश व मुलगी रेणूका यांचा उदरनिर्वाह कंपनीच्या कामामुळे होत असल्याची माहिती तक्रारीत नमूद केली आहे.
माजी पोलिस अधिकारी प्रकाश राऊत यांच्यामुळे दिवंगत मुलगा सुभाष दुधाणे यांचा कुटुंबियांवर मोठा अन्याय झाला आहे. वोहर पार्किंग सिस्टीम प्रा. लि. कंपनी आम्हाला काम देण्यास तयार आहे, मात्र माजी पोलिस अधिकारी प्रकाश राऊत हे स्थानिक असल्यामुळे कंपनीचे पदाधिकारी घाबरून आहेत. आपल्या पदाचा वापर राऊत निवृत्तीनंतर स्वतःच्या लोभासाठी करीत आहे. त्यांनी मी पुण्यातील फरासखाना पोलिस स्टेशनमध्ये रूजू असल्याची खोटी माहिती कंपनीला दिला आहे. तसेच मोबाईलच्या डिपी वर त्यांनी पोलिस दलातील फोटो ठेवून महाराष्ट्र पोलिस असे लिहिले आहे. यामुळे ते अजूनही पोलिस दलात असल्याचे दिसून येते. प्रत्यक्षात ते दीड वर्षापूर्वी निवृत्त झाले आहेत. असेही तक्रारीत लिहिले आहे.
श्रीमती ताराबाई दुधाणे यांनी मुख्यमंत्री देवेंद्र फडवणीस यांनी पुण्यात भेटून तक्रार दिली आहे. मुख्यमंत्री कार्यालयाने तक्रारीची दखल घेत गृहखात्याकडे चौकशी करण्याबाबतचा मेलही दुधाणे यांना आला आहे.
