कोथरूड चांदणी चौक बावधन भुसारी कॉलनी परिसरातील वरती वाहतूक कोंडी व अतिक्रमण झालेले रस्ते यावर उपाययोजनासाठी नगरसेवक दिलीप वेडेपाटील यांच्या वतीने एकलव्य कॉलेज ते राष्ट्रीय महामार्ग (D.P. रोड) तसेच एन.डी.ए. – पाषाण रोड या रस्त्यांची प्रत्यक्ष पाहणी चे आयोजन करण्यात आले होते. पुणे महापालिका प्रशासनाच्या वतीने रस्त्यावरील अतिक्रमणाकडे दुर्लक्ष केले जात असल्याने सर्वसामान्य नागरिकांना त्रास होत असून नित्य वाहतूक कोंडीतून मुक्तता मिळवण्यासाठी तातडीने उपाययोजना करण्याची मागणी नगरसेवक दिलीप वेडेपाटील यांच्या वतीने करण्यात आली आहे.
या पाहणीवेळी पथ विभाग प्रमुख राजेश बनकर, अतिक्रमण निर्मूलन प्रमुख डॉ. रमेश शेलार, बांधकाम कार्यकारी अभियंता जे. बी. पवार, सतीश बोबडे साहेब, महेश शेळके, विद्युत अभियंता मंगल मरतालकर, भूसंपादन अधिकारी वसंत नागरे, सुनील भोंगळे, धनंजय खोले तसेच इतर संबंधित अधिकारी उपस्थित होते. पुणे महापालिकेच्या वतीने विकास आराखड्यातील रस्ते विकसित करत असताना मूळ रुंदीचा विचार न करता शक्य तेवढ्या ताब्यातील जागेवर रस्ते करण्यात आल्याने सध्या कोथरूड भागातील नागरिकांना वाहतूक कोंडीचा त्रास सहन करावा लागत असल्याने संबंधित विभागाची संयुक्त पाहणे आयोजित केल्याचे नगरसेवक दिलीप वेडे पाटील यांनी सांगितले.
यावेळी पथ विभाग प्रमुख राजेश बनकर व अतिक्रमण निर्मूलन प्रमुख डॉ. रमेश शेलार यांनी संबंधित सर्व रस्त्यांचे 15 दिवसांत रुंदीकरण करून अतिक्रमणमुक्त करण्याचे आश्वासन दिले. याप्रसंगी नगरसेवक दिलीप वेडेपाटील यांनी स्पष्ट शब्दांत सांगितले की, प्रभागातील सर्व रस्ते टप्प्याटप्प्याने अतिक्रमणमुक्त करून त्यांचे नियोजनबद्ध रुंदीकरण करण्यात येईल. तसेच नागरिकांच्या सुरक्षिततेसाठी मोठ्या प्रमाणावर पदपथ तयार करून वाहतुकीस सुरक्षित, सुसज्ज व शिस्तबद्ध रस्ते निर्माण करण्यात येतील. नागरिकांच्या सोयी-सुविधा आणि सुरक्षिततेला प्राधान्य देत ही कार्यवाही लवकरात लवकर पूर्ण करण्यात येणार असल्याचे यावेळी सांगण्यात आले.
