दिवंगत उपमुख्यमंत्री अजित पवार यांच्या विमान अपघाताच्या घटनेवर राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी पत्रकार परिषद घेतली. या पत्रकार परिषदेत त्यांनी अजित पवार यांचा विमान अपघात होता की घातपात होता? या चर्चेवरही भाष्य केलं. अजित पवार यांच्यासोबत घातपात झाल्याचा संशय आपल्याला असल्याचं रोहित पवार म्हणाले. यावेळी रोहित पवार यांनी अपघाताच्या दिवसाच्या आधीच्या काही घटना सांगितल्या. उपमुख्यमंत्री अजित पवार यांच्या 27 जानेवारीचे शेड्यूल का बदलले? असा प्रश्न रोहित पवार यांनी उपस्थित केला. अपघाताची घटना ही 28 जानेवारीला घडली. पण त्याआधी 27 जानेवारीला वेळापत्रकानुसार अजित पवार संध्याकाळी मुंबईहून गाडीने पुण्याला येणार होते. ताफा देखील लागला होता. पण अजित पवार का निघाले नाहीत? असा प्रश्न रोहित पवार यांनी केला.
“कॅबिनेटची बैठक झाल्यानंतर अजित पवार अधिकाऱ्यांना म्हणाले होते की, चार-पाच तास मी माझे कामे करणार आहे. माझ्या पक्षातील काही अधिकारी, नेते आणि कर्मचारी भेटणार आहेत. त्यानंतर संध्याकाळी आपण पुण्याला जाणार आहोत, असं अजित पवार म्हणाले होते. त्यादिवशी एक फार मोठे नेते अजित पवार यांच्या भेटीसाठी येणार होते. ते वेळत येणार होते पण त्यांना यायला उशिर झाला. ते उशिरा आल्यामुळे आणि चर्चा उशिरापर्यंत सुरु झाल्यामुळे अजित दादांचा वेळ त्यामध्ये गेला. संध्याकाळी पाच-साडेपाच वाजता गाडीने जाणार होते ते गाडीने जाऊ शकले नाहीत. त्यांना पर्याय राहिला नाही. त्यांना विमान बुक करावे लागले. त्यामुळे 7 वाजून 13 मिनिटाला दुसऱ्या दिवसाचं विमान बुक करावं लागलं”, असं रोहित पवार यांनी सांगितलं.
“पूर्व विदर्भात एक कुठले तरी नेते आहेत. तुम्ही दादांचे मोबाईल चेक करा, कुणाचा फोन होता ते मला माहिती नाही, पण मला जे कळालं आहे, सही करावीच लागते, फार महत्त्वाची फाईल आहे. ती फाईल कुठे आहे? हे जेव्हा बघितलं गेलं तेव्हा ती फाईल घरी नव्हती. ती फाईल अजित पवार यांच्या मंत्रालयाच्या कार्यालयात होती. अजित पवार कधीही मोकळी फाईट ठेवत नाहीत. पण अचानक ती फाईल तिथे होती. मग दादांनी ती फाईल मागवली. ती फाईल पोहोचेपर्यंत वेळ गेला. आपल्या पक्षाचा एक मोठा नेता बोलत असेल तर सही करावीच लागेल. मग दादांनी सही केली. ती फाईल सही करेपर्यंत वेळ गेला”, असा दावा रोहित पवार यांनी केला.
“याच्या खोलापर्यंत जायचं असेल तर आमच्यादेखील तिथे ओळखीची माणसं आहेत. आमच्याही जीवाभावाची माणसं तिथे आहेत. अजित पवार यांना मी जेव्हा भेटलो, त्यांचे शेवटचे जे तीन-चार महिने होते, त्या काळात मी अजित दादा आणि त्यांच्या बरोबरचे अधिकारी एकदम घट्टपणे एक फार महत्त्वाची चर्चा करायचो. ती करत असताना काही अधिकारी आणि कर्माचाऱ्यांचा विश्वास असल्यामुळे तिथे चर्चा काय चालली होती हा विषय केला तेव्हा तिथे चर्चा, कुठलेतरी राजकीय कन्सल्टंट कुणीतरी आहेत, त्यांचा कॉन्ट्रॅक्ट हा शेकडो कोटींचा आहे, तो आपल्याला कॅन्सल करावा लागतोय, कारण त्यांच्याकडून आपल्याला काहीच मिळत नाही. काहीच फायदा होत नाही. सात दिवसआधीसुद्धा बारामती हॉस्टेलला मी अजित पवारांना भेटलो होतो तेव्हा अजित पवारांनी काही लोकांना सांगितलं होतं, शहाणपणा करु नका. राजकारण आम्हाला शिकवू नका. राजकारण आम्ही कसं करायचं आहे ते माहिती आहे. सर्व्हे फक्त तुम्ही करा. अशी चर्चा तिथे झाली होती. त्यामुळे अजित पवार यांना उशिर झाला आणि अजित पवार यांना प्लॅन बदलावा लागला”, असं रोहित पवार यांनी सांगितलं.
रोहित पवार यांच्यानुसार घातपाताची शक्यता असलेली कारणं:
- अजित पवार यांचा दौरा बजलणे, विमानाची वेळ बदलणे, पायलट बदलणे.
- केंद्रीय विमान मंत्रालय अहवाल, ATC Transcript, मधील वेळच्या विसंगती.
- फ्लाईट रडारचा एक मिनिट आधीच बंद पडलेला डेटा.
- Visibility कमी असताना Land करणे.
- Runway 11 वर उतरवण्याचा आग्रह.
- घटनेच्या आधीच विमान कमी उंचीवर आणले जाणे.
- शेवटचे काही मिनिटे पायलट एकही शब्द बोलला नसणे.
