पुणे (प्रतिनिधी) : समाजसेवा आणि उद्योग क्षेत्रातील उल्लेखनीय कार्याचा ठसा उमटवणारे माजी नगरसेवक तथा उद्योजक संजयभाऊ भोर यांच्या अभिष्टचिंतनानिमित्त आयोजित भव्य रक्तदान शिबिराला नागरिकांचा उत्स्फूर्त प्रतिसाद लाभला. या शिबिरात तब्बल १२७ रक्तदात्यांनी रक्तदान करून सामाजिक बांधिलकी जपली.
भोर इंजिनिअरिंग प्रा. लि., शिवणे येथे पार पडलेल्या या उपक्रमाचे आयोजन शिवनेरी ब्लड सेंटरच्या सहकार्याने करण्यात आले. सकाळपासूनच रक्तदात्यांची मोठी गर्दी पाहायला मिळाली. विविध क्षेत्रातील नागरिक, सामाजिक कार्यकर्ते, उद्योग क्षेत्रातील प्रतिनिधी तसेच युवकांनी स्वयंस्फूर्तीने रक्तदान करत या उपक्रमाला यशस्वी केले.
रक्तदान शिबिराच्या यशस्वी आयोजनाबद्दल शिवनेरी ब्लड सेंटर यांनी भोर इंजिनिअरिंग प्रा. लि. यांना गौरवपत्र प्रदान करून सामाजिक कार्याबद्दल कृतज्ञता व्यक्त केली. गरजू रुग्णांसाठी रक्ताचा साठा उपलब्ध करून देण्याच्या या उपक्रमाचे सर्व स्तरांतून कौतुक होत आहे.
यावेळी उपस्थित मान्यवरांनी रक्तदानाचे महत्त्व अधोरेखित करत, “रक्तदान हेच श्रेष्ठदान असून प्रत्येक निरोगी व्यक्तीने नियमित रक्तदान करावे,” असे आवाहन केले. “समाजसेवी कणा अन् व्यावसायिक बाणा” ही ओळख सार्थ ठरवत संजयभाऊ यांच्या वाढदिवसानिमित्त आयोजित करण्यात आलेल्या या सामाजिक उपक्रमाने समाजाप्रती असलेली त्यांची बांधिलकी पुन्हा एकदा अधोरेखित केली. रक्तदाते, स्वयंसेवक आणि आयोजकांच्या सहभागामुळे हा उपक्रम यशस्वी ठरला.
