पुणे: पुण्याचे पश्चिमद्वार असलेल्या निसर्ग संपन्न बावधन परिसराच्या सौंदर्यात आणखी एक आकर्षक भर पडणार असून, नगरसेवक किरण दगडे पाटील यांच्या संकल्पनेतून उभारण्यात येत असलेले ‘मृगविहार’ शिल्प आता पूर्णत्वाच्या दिशेने वाटचाल करत आहे. या शिल्पामुळे परिसराचे सौंदर्य खुलणार असून नागरिकांसाठी हे एक आकर्षणाचे केंद्र ठरणार आहे.
बावधन परिसराचे सुशोभीकरण, पर्यावरणाबाबत जनजागृती आणि नागरिकांना दर्जेदार सार्वजनिक जागा उपलब्ध करून देण्याच्या उद्देशाने हा उपक्रम राबविण्यात आला आहे. शिल्पाची रचना आकर्षक आणि वास्तवदर्शी असून त्यामध्ये निसर्ग व वन्यजीव संवर्धनाचा संदेशही देण्यात आला आहे. यामुळे स्थानिक नागरिकांनी या उपक्रमाचे स्वागत करत नगरसेवक किरण दगडे पाटील यांच्या संकल्पनेचे कौतुक केले आहे. चांदणी चौक परिसरातील एनडीए-पाषाण सुशोभीकरणाच्या विविध कामांमुळे बावधनची ओळख अधिक समृद्ध होत असून, ‘मृगविहार’ शिल्प पूर्ण झाल्यानंतर नागरिकांसह पर्यटकांसाठीही हे विशेष आकर्षण ठरण्याची अपेक्षा व्यक्त केली जात आहे.
चांदणी चौक परिसरातील एनडीए-पाषाण या प्रकल्पाचे अंतिम टप्प्यातील काम वेगाने सुरू असून, लवकरच नागरिकांसाठी या आकर्षक शिल्पाचे लोकार्पण करण्यात येणार असल्याची माहिती संबंधितांकडून देण्यात आली.
