दिल्लीत जंतर मंतर इथं गेल्या २१ दिवसांपासून उपोषण करणाऱ्या सोनम वांगचुक यांना दिल्ली पोलिसांनी रुग्णालयात उपाचरासाठी दाखल केलंय. पोलिसांनी सकाळी सात वाजण्याच्या सुमारास त्यांना आंदोलन स्थळावरून हटवलं.दिल्लीतील सफदरजंग रुग्णालयात त्यांच्यावर उपचार सुरू आहेत. सोनम वांगचुक यांच्या आरोग्याबाबत रुग्णालय प्रशासनाने अधिकृत माहिती दिलीय.
सफदरजंग रुग्णालयाच्या वैद्यकीय अधीक्षक डॉक्टर चारू यांनी सोनम वांगचुक यांच्या प्रकृतीची माहिती दिली. त्यांनी सांगितलं की, सोनम वांगचुक यांना सकाळी सात वाजून ४० मिनिटांनी रुग्णालयात आणलं गेलं. उपोषणामुळे त्यांचं शरीर अशक्त बनलं असून शरीरात पाण्याची कमतरता आहे. गेल्या २१ दिवसांपासून उपोषण करूनही सोनं वांगचुक यांची प्रकृती स्थिर असल्याचंही डॉक्टरांनी सांगितलं. मात्र ते अशक्त झाले आहेत आणि वजन घटल्याचंही डॉक्टरांनी म्हटलं.
रुग्णालयात सोनम वांगचुक यांची तपासणी इमर्जन्सी विभागातील डॉक्टरांनी केली. त्यानंतर प्राथमिक उपचार दिले गेले. प्राथमिक उपचारानंतर त्यांना मेडिसीन विभागात दाखल केलं आहे. विशेष डॉक्टरांच्या देखरेखीखाली त्यांच्यावर उपचार केले जात आहेत. रक्तदाब, पल्स आणि शुगर लेव्हल तपासले जात आहेत.
डॉक्टरांनी तपासणी केली होती तेव्हा प्रकृती ठीक होती आणि आता सरकारी डॉक्टर वेगळीच माहिती देतायत. सोनम यांना फोनही घेऊन जाऊ दिला नाही. सफदरजंग रुग्णालय हे तुरुंग असल्यासारखी वागणूक दिली जात असल्याचा आरोप सोनम यांच्या पत्नीने केला आहे.
