पुणे शहरात सध्या ओला सुका कचरा प्रकल्प म्हणजे अधिकारी आणि ठेकेदार यांचे लागेबंधे असलेले कुरण झाले आहे की काय अशी शंका निर्माण झालेली असतानाच पुन्हा एकदा सुक्या कचऱ्यावर प्रक्रिया करण्याच्या टेंडरची प्रक्रिया राबवली जात असताना प्रशासकीय अधिकाऱ्यांना आवर घालण्याची भूमिका घेत माजी विरोधी पक्षनेते उज्वल केसकर यांनी पुणे महापालिकेच्या वतीने सध्या राबविण्यात येत असलेल्या सुका कचरा प्रक्रिया टेंडरची आवश्यकता आहे का याची तपासणी होणे आवश्यक असल्याची भूमिका घेतली आहे. पुणे महापालिका आयुक्त यांना लेखी निवेदन देऊन या संपूर्ण प्रकरणातील हितसंबंधित लोकांवर कारवाई करण्याची मागणी केली आहे.
या निवेदेत सहभागी झालेली अँटनी लारा कंपनी पिंपरी चिंचवडच्या मोशी येथील प्रकल्पात दोषी असून त्यांच्या गैरकारभारामुळे निरपराध कामगारांचा ढिगार्याखाली चिरडून मृत्यू झाला आहे. सध्या पुणे विभागीय आयुक्त यांच्या अध्यक्षतेखाली राज्य सरकारने चौकशी समिती नेमली आहे. पिंपरी चिंचवड महापालिकेने अँटनी लारा कंपनीवर FIR दाखल केली आहे. कंपनीला पाठीशी घालणाऱ्या दोन वरिष्ठ अधिकारी सेवेतून निलंबित केले आहे. या अँटनी लारा कंपनीने कदाचित पुण्यात वेगळ्या नावाने अर्ज भरला असेल आणि त्यांना पीसीएमसी ने ब्लॅकलिस्ट केले नाही हेही खरे आहे, पण साहेब नऊ व्यक्तींचा मृत्यू ही साधी गोष्ट नाही. पुणे महापालिकेसारखी संवेदनशील संस्था असे कधीच करणार नाही.
पुणे महापालिकेतील प्रशासकीय अधिकारी यांनी भूमी ग्रीन यांना काम देण्यासाठी हा सर्व खटाटोप केला असून लागेबांधे सांभाळत संबंधित कारभार पूर्ण करण्यासाठी संपूर्ण राज्यभर गाजलेल्या ॲंटनी लारा कंपनीला या निविदा प्रक्रियेमध्ये सामावून घेणे हाच मोठा पुणेकरांचा अपमान आहे. तांत्रिक मुद्द्यावर बघून नऊ व्यक्तींचा मृत्यू झाला असताना देखील हे टेंडर पुणे महापालिका घनकचरा विभागाने उघडायला नको होते परंतु उघडले आणि एक मात्र ठरलेल्या कंपनीलाच हे काम देण्याचा घाट पुणे महापालिका घनकचरा विभागाकडून केला जात आहे अशी शंका सर्वसामान्य पुणेकरांच्या मनात येत आहे. पुणे महापालिका आयुक्त या नात्याने आपण संबंधित प्रकरणाची सखोल चौकशी करावी अशी मागणी या लेखी निवेदनामध्ये करण्यात आली आहे.
सध्या पुणे शहरामध्ये सुका कचरा प्रक्रिया प्रकल्प म्हणून काम करण्याचा विविध खाजगी ठेकेदारांसह १३ प्रकल्प कार्यान्वित आहेत. पुणे महापालिका कार्यक्षेत्रात सध्या सुरू असलेल्या या प्रकल्पांची क्षमता ही २५०० मॅट्रिक टन एवढी आहे. पुणे शहरात सध्या आणि रोज १५००ते १६०० मीटर एवढा सुका कचरा जमा होतो म्हणजे अजून 900 ते हजार मेट्रिक टनाची त्यांची क्षमता शिल्लक आहे. आपण त्यांना अडीच हजार मेट्रिक टनाचे पैसे देतोय का ? काही प्रश्न पुणेकरांच्या मनामध्ये निर्माण झालेले आहेत.
भूमी ग्रीन यांनी टेंडर न घेता 694 प्रति मॅट्रिक टन काम करायला मान्यता दिली होती स्थायी समितीने ते मान्य केले नाही म्हणून टेंडर काढले त्या टेंडरमध्ये अटी शर्ती अशा केल्या की यामध्ये भूमी ग्रीनला स्पर्धक फार राहणार नाही (याबाबत दक्षता विभागाने देखील काही आक्षेप घेतले होते) त्याकडे देखील दुर्लक्ष केले गेले असे वृत्तपत्रातील बातम्यांवरून सर्वसामान्य पुणेकर जनतेला माहीत झाले आहे. अत्यंत संवेदनहिन अशा पद्धतीने कदाचित तांत्रिकदृष्ट्या बरोबर असतील पण नैतिकदृष्ट्या चुकीचे असे हे कृत्य पुणे महापालिकेने केले आहे. सध्या प्रशासकीय स्तरावर असलेले संबंधित कंपनीचे टेंडर तातडीने रद्द करून खुली स्पर्धा होईल असे नवीन टेंडर काढावे आणि आत्ता ज्या क्षमतेमध्ये प्लांट्स आहेत त्यांची प्रत्येकाची क्षमता किती आहे आणि प्रक्रिया कितीवर करतात आणि बिल किती दिले जाते याचे तपशील तातडीने पुणे मनपाच्या संकेतस्थळावर टाकावेत, आणि सदरचे टेंडर रद्द करावे व पुन्हा काढावे अशी मागणीही उज्ज्वल केसकर माजी विरोधी पक्षनेते पुणे मनपा, सुहास कुलकर्णी माजी विरोधी पक्षनेते, प्रशांत बधे माजी नगरसेवक यांच्यावतीने करण्यात आली आहे.
