गेल्या २४ तासांत वरसगाव आणि पानशेत धरणांमध्ये तब्बल १०२ दशलक्ष घनफूट (एमसीएफटी) नव्या पाण्याची भर पडली आहे. खडकवासला धरण साखळीच्या पाणलोट क्षेत्रात पावसाने जोर धरताच पुणेकरांसाठी दिलासादायक बातमी समोर आली आहे. विशेष म्हणजे, हा साठा पुणे शहराच्या जवळपास दोन दिवसांच्या पाणी पुरवठ्याइतका असल्याने धरणसाखळीतील पाणीसाठा वाढण्यास वेग आला असून, पाणीटंचाईची चिंता काही प्रमाणात कमी होण्याची चिन्हे दिसू लागली आहेत.
गेल्या २४ तासांत म्हणजे, १ जुलै रोजी सकाळी सहा वाजता पानशेत धरणात १.८१ टीएमसी (१६.९७ टक्के) पाणीसाठा होता. तो २ जुलै रोजी सकाळी सहा वाजता १.८६ टीएमसी (१७.४४ टक्के) झाला आहे. धरणात ५० दशलक्ष घन फूट पाण्याची भर पडली आहे. त्याचप्रमाणे, वरसगाव धरणातील पाणीसाठा १.५६ टीएमसी (१२.१५ टक्के) वरून १.६१ टीएमसी (१२.५६ टक्के) इतका वाढला असून, या धरणात ५२ दशलक्ष घन फुट पाण्याची आवक झाली आहे. त्यामुळे या दोन्ही धरणांमध्ये मिळून गेल्या २४ तासांत १०२ दशलक्ष घन फूट (०.१० टीएमसी) पाण्याची वाढ झाली.
खडकवासला धरणसाखळीच्या पाणलोट क्षेत्रात गेल्या २४ तासांत पानशेत धरण परिसरात ३१ मिमी, वरसगावमध्ये ३१ मिमी, टेमघरमध्ये ४० मिमी आणि खडकवासला धरण परिसरात ४ मिमी पावसाची नोंद झाली. सध्या पानशेत धरणात १.८६ टीएमसी (१७.४४ टक्के), वरसगाव धरणात १.६१ टीएमसी (१२.५६ टक्के), खडकवासला धरणात ०.३१ टीएमसी (१५.४७ टक्के) पाणीसाठा आहे.
टेमघर धरणातील उपयुक्त पाणीसाठा अद्याप शून्य टक्के असून, तेथे उपयुक्त साठा निर्माण झालेला नाही. एकूण उपयुक्त पाणीसाठा ३.७७ टीएमसी (१२.९४ टक्के) झाला आहे. मात्र, ही पातळी गतवर्षीच्या तुलनेत अद्यापही खूपच कमी असून, या दिवशी गेल्या वर्षी धरणसाखळीत १५.५५ टीएमसी (५३.३६ टक्के) पाणीसाठा होता.
