चंद्रपूर भाजपाच्या ग्रामीण जिल्हा कार्यकारिणीला प्रदेशाध्यक्ष रवींद्र चव्हाण यांनी स्थगिती दिल्याने जिल्ह्यातील पक्षांतर्गत राजकारणाला वेग आला आहे. प्रदेश सरचिटणीस डॉ. संजय कुटे यांच्या स्वाक्षरीचे पत्र ग्रामीण जिल्हाध्यक्ष हरीश शर्मा यांना पाठविण्यात आले असून, नव्याने जाहीर करण्यात आलेली कार्यकारिणी स्थगित करण्यात आली आहे.
कार्यकारिणीत मुनगंटीवार समर्थकांना स्थान
४ जून रोजी चंद्रपूर भाजपाच्या ग्रामीण जिल्हा कार्यकारिणीची घोषणा करण्यात आली होती. मात्र, कार्यकारिणी जाहीर होताच पक्षातील काही पदाधिकाऱ्यांनी नाराजी व्यक्त केली. कार्यकारिणीत माजी मंत्री सुधीर मुनगंटीवार यांच्या समर्थकांना मोठ्या प्रमाणात स्थान देण्यात आल्याचा आरोप करत काही नेत्यांनी प्रदेश नेतृत्वाकडे तक्रार दाखल केली होती.
यासंदर्भात पक्षातील काही नेत्यांनी एकत्रितपणे प्रदेशाध्यक्ष रवींद्र चव्हाण आणि महाराष्ट्र भाजपाचे प्रभारी शिवप्रकाश यांची भेट घेऊन कार्यकारिणीबाबत आक्षेप नोंदविल्याचे सांगितले जाते. या तक्रारींची दखल घेत प्रदेश नेतृत्वाने ग्रामीण जिल्हा कार्यकारिणीला स्थगिती देण्याचा निर्णय घेतल्याचे पक्षातील सूत्रांकडून सांगितले जात आहे.
प्रथमच कार्यकारिणीला स्थगिती
चंद्रपूर भाजपाच्या इतिहासात प्रथमच ग्रामीण जिल्हा कार्यकारिणीला अशा प्रकारे स्थगिती देण्यात आल्याची चर्चा राजकीय वर्तुळात सुरू आहे. ग्रामीण जिल्हाध्यक्ष हरीश शर्मा हे मुनगंटीवार समर्थक मानले जात असल्याने या निर्णयाकडे त्यांच्या गटासाठी राजकीय धक्का म्हणून पाहिले जात आहे.
कार्यकारिणी जाहीर करताना पक्षातील इतर प्रमुख नेते, विद्यमान आमदार तसेच माजी केंद्रीय मंत्री हंसराज अहीर यांना विश्वासात घेण्यात आले नसल्याचा आरोपही नाराज गटाने केला होता. याच पार्श्वभूमीवर प्रदेश नेतृत्वाने हस्तक्षेप केल्याची चर्चा आहे.
दरम्यान, स्थगित करण्यात आलेल्या कार्यकारिणीऐवजी सर्व गटांना प्रतिनिधित्व मिळेल, अशा स्वरूपाची नवी ग्रामीण जिल्हा कार्यकारिणी लवकरच जाहीर होण्याची शक्यता व्यक्त केली जात आहे. या घडामोडींमुळे चंद्रपूर भाजपातील अंतर्गत राजकीय समीकरणे पुन्हा एकदा चर्चेच्या केंद्रस्थानी आली असून, आगामी काळात प्रदेश नेतृत्व कोणता निर्णय घेते, याकडे पक्ष कार्यकर्त्यांचे लक्ष लागले आहे.
