‘मैं वापस आऊंगा’ या चित्रपटातील दमदार अभिनयामुळे सर्व स्तरांतून कौतुकाची थाप मिळवत असलेली अभिनेत्री शर्वरी आता यशराज फिल्म्सच्या बहुप्रतीक्षित ‘ऐल्फा’च्या प्रदर्शनासाठी सज्ज झाली आहे. हा चित्रपट ३ जुलै रोजी प्रदर्शित होत असून, अवघ्या एका महिन्याच्या कालावधीत शर्वरीचे दोन वेगवेगळ्या धाटणीचे चित्रपट प्रेक्षकांच्या भेटीला आले आहेत.
‘मैं वापस आऊंगा’ला मिळालेल्या प्रतिसादाबद्दल भावना व्यक्त करताना शर्वरी म्हणाली, “या चित्रपटाला मिळत असलेल्या प्रेमाने आणि कौतुकाने मी भारावून गेले आहे. एक अभिनेत्री म्हणून लोकांच्या मनाला स्पर्श करणाऱ्या कथा साकारण्याचं स्वप्न असतं. प्रेक्षकांनी माझ्या अभिनयाचं इतक्या मनापासून कौतुक केलं, ही माझ्यासाठी अत्यंत समाधानाची बाब आहे.”
तिने दिग्दर्शक इम्तियाज अली यांचे विशेष आभार मानत सांगितले की, “माझ्या कारकिर्दीतील या महत्त्वाच्या क्षणासाठी मी इम्तियाज अली सरांची ऋणी आहे. ‘मैं वापस आऊंगा’च्या यशाचं संपूर्ण श्रेय त्यांच्या दृष्टीकोनाला आणि या कथेबद्दलच्या त्यांच्या तळमळीला जातं.”
‘ऐल्फा’बाबतही तिने आशावाद व्यक्त केला. “हा महिना माझ्यासाठी आधीच खूप खास ठरला आहे. आता ‘ऐल्फा’लाही प्रेक्षकांकडून तितकंच प्रेम आणि पाठिंबा मिळावा, अशी मनापासून इच्छा आहे. ‘मैं वापस आऊंगा’ आणि ‘ऐल्फा’ या दोन्ही चित्रपटांनी एका महिन्याच्या आत प्रेक्षकांची मनं जिंकली, तर ते माझ्यासाठी स्वप्न पूर्ण झाल्यासारखं असेल,” असे शर्वरीने सांगितले.
अवघ्या एका महिन्याच्या अंतराने दोन मोठ्या चित्रपटांमधून प्रमुख भूमिकेत झळकण्याची संधी कोणत्याही युवा कलाकारासाठी दुर्मीळ मानली जाते. हे दोन्ही चित्रपट यशस्वी ठरल्यास शर्वरीची हिंदी चित्रपटसृष्टीतील आश्वासक आणि आघाडीच्या अभिनेत्रींपैकी एक म्हणून ओळख आणखी भक्कम होण्याची शक्यता आहे.
