पुणे : पत्रकारांबद्दल अपशब्द वापरत अरेरावीची भाषा आणि धमकी दिल्याचा आरोप असलेल्या बंडखोर खासदार संजय दिना पाटील यांच्या विरोधात कठोर कारवाई करण्याची मागणी करण्यात आली आहे. याबाबत कोथरूड पत्रकार संघाच्या वतीने दि. 26 रोजी कोथरूड पोलीस ठाण्यात निवेदन सादर करण्यात आले.
निवेदनात नमूद करण्यात आले आहे की, पत्रकारांबाबत अवमानकारक भाषा वापरणे, धमकी देणे आणि प्रसारमाध्यमांच्या स्वातंत्र्यावर गदा आणण्याचा प्रयत्न करणे हे लोकशाही मूल्यांना बाधा पोहोचवणारे आहे. त्यामुळे संबंधित खासदारांविरोधात कायदेशीर कारवाई करून पत्रकारांना संरक्षण द्यावे, अशी मागणी करण्यात आली.
यावेळी कोथरूड पत्रकार संघाच्या पदाधिकारी व सदस्यांनी पत्रकारांच्या सन्मानाचे रक्षण करण्यासाठी प्रशासनाने तातडीने दखल घ्यावी, अशी भूमिका मांडली. पत्रकारांवरील दबाव, धमक्या आणि अपमानास्पद वक्तव्ये कोणत्याही परिस्थितीत खपवून घेतली जाणार नाहीत, असा इशाराही संघाच्या वतीने देण्यात आला.
कोथरूड पोलीस ठाण्याच्या अधिकाऱ्यांनी निवेदन स्वीकारून त्याची योग्य ती दखल घेण्याचे आश्वासन दिले. यावेळी कोथरूड पत्रकार संघाचे अध्यक्ष दीपक पाटील, उपाध्यक्ष जितेंद्र मैड, सचिव विशाल सातपुते, सागर जगताप, धनराज माने, मोहित शिंदे यांच्यासह पत्रकार उपस्थित होते.
