वारजे माळवाडी परिसरातील वाहतूक कोंडी सोडवण्यासाठी राष्ट्रीय महामार्ग प्राधिकरणातर्फे वारजे माळवाडीच्या परिसरातून जाणाऱ्या मुठा नदीवर सेवा रस्त्याच्या उड्डाणपुलाचे काम सुरू आहे परंतु हे काम करत असताना संबंधित ठेकेदाराच्या राडारोड्याच्या हैदोसामुळे मुठा नदीचा श्वास चक्क गुदमरला असून पुणे पाटबंधारे विभाग व पुणे महापालिका प्रशासनाकडून फक्त विनवणीच करण्याला धन्यता मानण्यात आल्याने आजही या भागातील नदीपात्रात राडारोड्याचे साम्राज्य पसरले आहे.
वारजे माळवाडी परिसरातील डोंगर व त्यावर वरून येणाऱ्या पाण्याचा विसर्ग लक्षात घेता या भागातील नदीपात्र कायम तुडुंब भरलेले असते; मुख्य नदीपात्रातील पाण्याचा प्रवाह अतिक्रमणामुळे मंदावलेला असल्याने परिसरातील नाल्यांमधून वाहणाऱ्या पाण्यांनाही काही मर्याद येतात. या सर्व गोष्टीचा विचार करता मुठा नदीपात्रातील राडारोडा ही जटिल समस्या असतं नाही संबंधित ठेकेदाराकडून कोणतीही खबरदारी घेतली जात नाही. नदीपात्रातून सध्या वाहन वाहत असलेल्या पाण्यासाठी तीन ते चार सिमेंटच्या नळ्या टाकून बोळवण केल्यामुळे या परिसरात जलपर्णीचे साम्राज्य वाढले असून पावसाच्या पाण्याचा प्रवाह सुरू होण्याच्या अगोदर नदीपात्र साफ करण्याची गरज निर्माण झाली आहे.
स्थानिक लोकप्रतिनिधींच्या मार्फत याबाबत वारंवार पाठपुरावा केला जात असतानाही कोणतीही ठोस उपाययोजना न केल्याने नागरिकांच्या भावना संतप्त असून सर्वसामान्य नागरिकांना ठेकेदाराच्या या अक्षम्य चुकीचा फटका सहन करावा लागणार आहे. परिसरातील वाहतूक कोंडीचा मोकळा श्वास व्हावा यासाठी संबंधित ठेकेदाराला या भागातील नदीपात्रात वापर करण्याची परवानगी देण्यात आली असली तरी सुद्धा संबंधित ठेकेदाराने नदीपात्रामध्ये घातलेले हैदोसामुळे नदीपात्रातील नैसर्गिक संपदांचा नाश झाला असल्याने परिसरातील नागरिकांना त्याचा त्रास सहन करावा लागत आहे.
