जागतिक ऊर्जा व्यापारासाठी महत्त्वाचा असलेल्या ‘हार्मुझच्या सामुद्रधुनीने’ अमेरिका आणि इराणमध्ये शांतता करार झाल्यासोबत अखेर मोकळा श्वास घेतला. या सागरी मार्गातील वाहतूक आता पूर्वपदावर आली आहे. याचा थेट परिणाम कच्च्या तेलाच्या किमतीवर पाहायला मिळाला. बुधवारी कच्च्या तेलाचे दर ४ महिन्यांच्या नीचांकी पातळीवर आले आहेत. या घसरणीनंतर पेट्रोल-डिझेलही स्वस्त होण्याची शक्यता निर्माण झाली आहे.
कच्च्या तेलाच्या किमती ७५ डॉलर्सच्या आसपास
बुधवारी आंतरराष्ट्रीय बाजारात ‘ब्रेंट क्रूड’चे दर १.१८ टक्क्यांनी घसरून ७६.१७ डॉलर्स प्रतिबॅरलवर आले आहेत. मार्च महिन्याच्या सुरुवातीनंतरची ही सर्वात नीचांकी पातळी आहे. अमेरिका, इस्त्रायल आणि अमेरिका यांच्यात युद्ध सुरू झाल्यानंतर कच्च्या तेलाच्या किमती १२० डॉलर प्रति बॅरलपर्यंत पोहोचल्या होत्या.
देशात इंधन दर स्वस्त होणार?
कच्च्या तेलाच्या किमतीचा भडका उडाल्यानंतर पाकिस्तान, बांग्लादेश ते भारतासारख्या देशांमध्ये इंधन आणि एलपीजीचा तुटवडा निर्माण झाला होता. कच्चे तेल महाग झाल्यानंतर भारतात चारवर्षानंतर तेल विपनन कंपन्यांनी पेट्रोल-डिझेल, सीएनजी आणि गॅसच्या किमतीत मोठी वाढ केली होती. आता कच्च्या तेलाच्या किमती मोठ्या प्रमाणात घसरल्यानंतर इंधनदर स्वस्त होण्याची आशा वाढली आहे. बाजार विश्लेषकांच्या मते गेल्या ३ महिन्यात झालेला तोटा कंपन्या भरुन काढण्याला प्राधान्य देतील. बफर स्टॉकमधील उपलब्ध असलेले सध्याचे इंधन हे उच्च किमतीलाच खरेदी केलेले आहे. त्यामुळे इतक्यात इंधनदर स्वस्त होण्याची शक्यता नाही.
५० डॉलर्सच्या खाली क्रूड ऑइल जाईल का?
किमती घसरत असल्यामुळे कच्चे तेल आणखी स्वस्त होऊन ५० डॉलर्सच्या खाली जाईल का? असा प्रश्न गुंतवणूकदारांच्या मनात येत होता. मात्र, बाजार तज्ज्ञांनी ही शक्यता फेटाळून लावली आहे. “सध्या तरी कच्चे तेल ५० डॉलर्सच्या खाली जाण्याची शक्यता नाही. कारण आशियातील उदयोन्मुख अर्थव्यवस्थांमध्ये तेलाची मागणी सातत्याने वाढत आहे. तसेच, किमती जास्त घसरल्यास ‘ओपेक’ देश उत्पादन कपात करून किमतींना आधार देतील.” ब्रेंट क्रूड ६५ ते ७५ डॉलर्सच्या रेंजमध्ये राहील.
भारतीय अर्थव्यवस्थेस अच्छे दिन!
कच्चे तेल स्वस्त झाल्यामुळे देशांतर्गत वाहतूक खर्च नियंत्रणात राहील, ज्यामुळे महागाई कमी होण्यास मदत होईल.
आयात बिल कमी झाल्यामुळे देशाची चालू खात्यातील तूट कमी होईल आणि डॉलरच्या तुलनेत रुपया मजबूत होईल.
पेंट कंपन्या, टायर उत्पादन आणि विमान वाहतूक क्षेत्रातील कंपन्यांचा उत्पादन खर्च कमी होऊन त्यांच्या नफ्यात सुधारणा होईल, ज्यामुळे शेअर बाजारात या शेअर्सना गती मिळू शकते.
