पंढरपूर येथील आंदोलनस्थळी रात्री सव्वा दहा वाजेच्या सुमारास मंत्री गिरीश महाजन दाखल झाल्यानंतर राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी अखेर आपलं अन्नत्याग आंदोलन स्थगित केलं आहे. गिरीश महाजन यांची संकटमोचक नेते अशी ख्याती आहे. त्यामुळे रोहित पवार यांचं अन्नत्याग आंदोलन थांबवण्यात त्यांना यश येतं का? ते पाहणं महत्त्वाचं होतं. त्यात त्यांना यश आलं आहे. रोहित पवार यांच्या अन्नत्याग आंदोलनाचा आज तिसरा दिवस होता. तीन दिवसांपासून उपोषण केल्यामुळे रोहित पवार यांची आज प्रकृती ढासळली. अखेर रात्री सव्वा दहा वाजेच्या सुमारास गिरीश महाजन आंदोलनस्थळी दाखल झाले. यावेळी सकारात्मक चर्चा झाल्यानंतर रोहित पवारांनी उपोषण सोडलं. त्यांच्या शरीरातील बीपी आणि शुगर कमी झाल्याची माहिती डॉक्टरांनी दिली होती. तसेच डॉक्टरांनी रोहित पवारांना सलाईन लावण्याची विनंती केली. पण रोहित पवारांनी मंत्री गिरीश महाजन आल्यानंतर सलाईन घेऊ, अशी भूमिका घेतली.
यावेळी गिरीश महाजन आणि रोहित पवार यांच्यात चर्चा झाली. गिरीश महाजन यांनी चर्चेतून विषय सोडवण्याची विनंती सुरुवातीला केली. यासोबतच मंत्री गिरीश महाजन यांनी मुख्यमंत्री देवेंद्र फडणवीस यांच्यासोबत संपर्क करण्याचा प्रयत्न केला. गिरीश महाजन यांचं मुख्यमंत्र्यांसोबत बोलणं झालं. मुख्यमंत्र्यांनी रोहित पवारांच्या मागणीवर सकारात्मक प्रतिसाद दिला. यानंतर गिरीश महाजन यांच्या विनंतीनंतर रोहित पवार यांनी अन्नत्याग आंदोलन स्थगित करत असल्याची घोषणा केली आहे. मंत्री गिरीश महाजन यांचा दुपारी भेटीसाठी येत असल्याचा मेसेज रोहित पवारांना आला होता. त्यांनतर रात्री सव्वा दहा वाजेच्या सुमारास दाखल झाले. दरम्यान, सोलापूरच्या माळशिरस येथे पीकअप विहिरीत कोसळल्याने आठ जणांचा मृत्यू झाल्याची घटना घडली. या घटनेतील जखमींच्या भेटीसाठी मंत्री गिरीश महाजन आधी माळशिरसला गेले होते. त्यानंतर ते रोहित पवार यांच्या आंदोलनस्थळी दाखल झाले.
गिरीश महाजन यांनी रोहित पवारांना अन्नत्याग आंदोलन करण्याआधी मुख्यमंत्री देवेंद्र फडणवीस यांना पत्र पाठवणं अपेक्षित होतं, असं म्हटलं. मुख्यमंत्र्यांची भेट घेऊन आपली भूमिका मांडली असती तर चर्चेतून मार्ग निघाला असता, असं गिरीश महाजन म्हणाले. गिरीश महाजन यांनी यावेळी मुख्यमंत्र्यांसोबत फोनवर बातचित केली. यानंतर पावसाळी अधिवेशनाच्याआधी या विषयावर आंदोलकांच्या शिष्टमंडळासोबत बैठक होईल. या बैठकीत मार्ग काढला जाईल, असं आश्वासन गिरीश महाजन यांनी दिलं.
यावेळी गिरीश महाजन यांनी एक महत्त्वाची माहिती दिली. आगामी पावसाळी अधिवेशन हे 22 जून पासून सुरु होणार आहे. त्याआधी रोहित पवार आणि शेतकरी नेत्यांचं शिष्टमंडळाचं मुख्यमंत्री देवेंद्र फडणवीस यांच्यासोबत बैठक पार पडेल. यावेळी योग्य तो निर्णय घेतला जाईल, असं आश्वासन गिरीश महाजन यांनी दिली. यानंतर रोहित पवारांनी उपोषण मागे घेत असल्याची घोषणा केली. पंढरपुरात श्री नामदेव पायरीवर नतमस्तक होऊन आपण उपोषण सोडू, असं रोहित पवार यावेळी म्हणाले. सर्वजण नामदेव पायरीवर नतमस्तक होण्यासाठी निघाले.
