अवघ्या जगावर महायुद्धाचे सावट निर्माण झाले आहे. मिडिल ईस्टमध्ये परिस्थिती आता हाताबाहेर गेली असून अमेरिकेने सलग दुसऱ्या दिवशी इराणवर प्रचंड मोठे हवाई हल्ले केले आहेत. अमेरिकेचे राष्ट्राध्यक्ष डोनाल्ड ट्रम्प यांच्या थेट आदेशानंतर अमेरिकन लष्कराच्या सेंटकॉमने इराणचे लष्करी तळ उद्ध्वस्त करण्यास सुरुवात केली आहे.या भीषण हल्ल्यांनंतर इराणच्या किनारपट्टीवरील शहरांमध्ये रात्रीच्या अंधारात एकापाठोपाठ एक प्रचंड स्फोट झाले असून, संपूर्ण परिसर थरथर कापला आहे.
इराणी माध्यमांनी दिलेल्या माहितीनुसार, इराणची प्रमुख बंदरे आणि शहरे असलेल्या बंदर अब्बास, केश्म द्वीप, मीनाब आणि सीरिकमध्ये विमानांच्या घोंघावणाऱ्या आवाजासोबतच क्षेपणास्त्रांचे धमाके ऐकू आले. अमेरिका आणि इराणमधील हा संघर्ष आता समुद्रात पोहोचला असून स्ट्रेट ऑफ होर्मुज हे जगातील सर्वात मोठे रणांगण बनले आहे.
होर्मुज पुन्हा बंद
हल्ल्यानंतर संतापलेल्या इराणच्या लष्करी कमांडने सर्वात मोठे पाऊल उचलत ‘होर्मुज जलडमरूमध्य’ पूर्णपणे बंद करण्याची घोषणा केली. “इथून आता एकाही जहाजाला जाण्याची परवानगी नाही. जो कोणी प्रयत्न करेल, त्याला समुद्रातच बुडवले जाईल,” अशी उघडी धमकी इराणने दिली. इराणने असाही दावा केला की, त्यांनी होर्मुज पार करण्याचा प्रयत्न करणाऱ्या दोन जहाजांवर यशस्वी हल्ला केला.
अमेरिकन लष्कराने तात्काळ सोशल मीडियावरून इराणचा हा दावा फेटाळून लावला. अमेरिकेने म्हटले की, “इराण साफ खोटं बोलतोय. होर्मुज अजूनही सुरू आहे, जहाजांची ये-जा सुरू आहे आणि अमेरिकेच्या कोणत्याही युद्धनौकेवर हल्ला झालेला नाही.”
ट्रम्प यांचा थेट इशारा
या महाभयंकर युद्धाची ठिणगी पडण्यापूर्वीच राष्ट्राध्यक्ष डोनाल्ड ट्रम्प यांनी मीडियासमोर उघडपणे सांगितले होते की, इराणवर ‘जोरदार हल्ला’ होणार आहे. गेल्या ३ महिन्यांपासून सुरू असलेली युद्धबंदीची चर्चा इराणच्या आडमुठ्या धोरणामुळे फिस्कटल्याचा आरोप ट्रम्प यांनी केला. ट्रम्प संतापलेले आहेत कारण त्यांच्या मते, इराणचे वाटाघाटी करणारे अधिकारी अमेरिकेला गांभीर्याने घेत नव्हते. “आम्ही कालही ठोकलं, आजही ठोकलं आणि गरज पडली तर पुढेही मागे हटणार नाही,” अशा कडक शब्दांत ट्रम्प यांनी इराणी नेत्यांना सुनावले आहे. अमेरिकेचे संरक्षण मंत्री पीट हेगसेथ यांनी तर थेट संकेत दिले आहेत की, तिसऱ्या रात्रीही यापेक्षा भयानक हल्ले होऊ शकतात!
फुटबॉल वर्ल्डकप धोक्यात?
या वाढत्या हिंसेमुळे संपूर्ण जगात भीतीचे वातावरण आहे. विशेष म्हणजे, काही दिवसांतच अमेरिकेत फुटबॉल वर्ल्डकप सुरू होणार आहे, ज्यामध्ये इराणचा संघही खेळणार आहे. पण आता युद्ध पेटल्यामुळे या क्रीडा महोत्सवावर रक्ताचे सावट निर्माण झाले आहे. संयुक्त राष्ट्राचे सरचिटणीस यांनीही हे युद्ध ऑल आऊट वॉ मध्ये बदलू नये,” अशी तीव्र चिंता व्यक्त केली आहे. तर दुसरीकडे इराणचे राजदूत अमीर सईद इरावामी यांनी ट्रम्प यांच्या धमक्यांना केराची टोपली दाखवत म्हटले आहे की, “बंदुकीच्या जोरावर आम्हाला झुकवता येणार नाही.”
