बिहारमध्ये एका सायक्लोनिक सर्क्युलेशन तयार झालं आहे. याची टर्फ लाइन जवळपास उत्तर प्रदेश आणि महाराष्ट्राच्या सीमेला घासून खाली अरबी समुद्रापर्यंत जात आहे. दुसरीकडे अरबी समुद्रातही एक सायक्लोनिक सर्क्युलेशन तयार होत आहे. गोव्याजवळ तिथे वादळासाठी सध्या अनुकूल स्थिती तयार झाली असून 15 जूनपर्यंत चक्रीवादळात ते बदलणार का हे पाहावं लागणार आहे. याचा धोका कोकण किनारपट्टी आणि गुजरातला सर्वाधिक असेल.
दुसरीकडे स्कायमेटचे हवामान तज्ज्ञ महेश पलावत यांनी दिलेल्या माहितीनुसार, महाराष्ट्रात मान्सूनसाठी अनुकूल स्थिती तयार झाली आहे. हळूहळू मान्सून पुढे सरकत आहे. मान्सून तळ कोकणात दाखल झाला असून 10 जूनच्या आसपास मुंबई आणि उपनगरात येणार आहे. तर संपूर्ण महाराष्ट्र व्यापण्यासाठी 20 जूनच्या आसपास कालावधी लागेल. मान्सूनपूर्व पाऊस मात्र पश्चिम महाराष्ट्रात पडण्याची शक्यता आहे. विदर्भ-मराठवाडा आणि उत्तरेकडील काही जिल्ह्यांमध्ये मात्र उन्हाचा कडाका राहण्याची शक्यता आहे. मध्य महाराष्ट्रात ऊन पावसाचा खेळ सुरू राहणार आहे.
पाकिस्तानकडून एक वेस्टर्न डिस्टर्बन्स भारतात येत आहे. 10 जूनच्या आसपास पावसासाठी अनुकूल वातावरण राहणार आहे. सध्या सलग पाऊस पडत नाही. विदर्भात सध्या हिटवेव आहे. 45 डिग्री तापमान आहे. तिथे पावसाचं नामोनिशाण नाही. सांगलीमध्ये सर्वाधिक पावसाची नोंद करण्यात आली आहे. महाराष्ट्रात आज 25 जिल्ह्यांमध्ये यलो अलर्ट देण्यात आला आहे. सोलापूर, सांगली, कोल्हापुरात अनेक भागांत मुसळधार पावसाने झोडपून काढलं आहे. त्यामुळे उकाड्यापासून दिलासा मिळाला आहे.
नैऋत्य मोसमी पाऊस ८ जून रोजी महाराष्ट्र, कर्नाटक, आंध्र प्रदेश आणि तेलंगणाच्या काही इतर भागांमध्ये दाखल झाला. हवामान विभागाच्या अंदाजानुसार, पुढील सात दिवसांत केरळ, कर्नाटक, तामिळनाडू, ईशान्य भारत आणि उप-हिमालयीन पश्चिम बंगालमधील अनेक ठिकाणी मुसळधार ते अति मुसळधार पाऊस पडण्याची शक्यता आहे. भारतीय हवामान विभागाने असेही म्हटले आहे की, ८ आणि ९ जून रोजी केरळ आणि कर्नाटकच्या काही भागांमध्ये मुसळधार पावसाची शक्यता आहे.
९ आणि १० जून रोजी मुसळधार पाऊस आणि मेघगर्जनेसह पावसाचा इशारा देण्यात आला आहे. या काळात वारे ताशी ७० ते ७५ किलोमीटर वेगाने वाहू शकतात. याव्यतिरिक्त, जयपूर, अजमेर, उदयपूर आणि बिकानेरसह राजस्थानमधील अनेक जिल्ह्यांसाठी जोरदार मेघगर्जना आणि मुसळधार पावसाचा इशारा जारी करण्यात आला आहे. जम्मू आणि काश्मीर, लडाख, हिमाचल प्रदेश आणि उत्तराखंडमध्ये १४ जूनपर्यंत अधूनमधून हलका ते मध्यम पाऊस अपेक्षित आहे.
