बारामती : येथील तालुका पोलिस ठाण्यात दाखल असलेल्या खुनाच्या प्रयत्नाच्या गुन्ह्यातील आरोपीला मुंबई उच्च न्यायालयाने सशर्त अटकपूर्व जामीन मंजूर केला आहे. या प्रकरणी आरोपीविरुद्ध भारतीय न्याय संहिता (BNS) कलम १०९, १८९(२), १९१(२), १९१(३) आणि १९० नुसार गुन्हा दाखल करण्यात आला होता.
आरोपीच्या वतीने ॲड. अक्षय महाडिक आणि ॲड. ईशान पराडकर यांनी मुंबई उच्च न्यायालयात अटकपूर्व जामिनासाठी अर्ज दाखल केला होता.
घटना आणि न्यायालयातील युक्तिवाद
- फिर्यादीनुसार, २९ नोव्हेंबर २०२५ रोजी बारामती-भिगवण रस्त्यावरील एका हॉटेलसमोर पार्किंगच्या कारणावरून वाद होऊन मारहाण झाली होती. या प्रकरणी पोलिसांनी १० ते १२ जणांवर गुन्हा दाखल केला होता.
- जिल्हा न्यायालयाने अर्ज फेटाळला : यापूर्वी आरोपीने जिल्हा व सत्र न्यायालयात जामिनासाठी अर्ज केला असता, तो न्यायालयाने फेटाळून लावला होता. त्यानंतर आरोपीने उच्च न्यायालयात धाव घेतली.
-
बचाव पक्षाचा युक्तिवाद : उच्च न्यायालयात युक्तिवाद करताना ॲड. महाडिक आणि ॲड. पराडकर यांनी स्पष्ट केले की, “आरोपी निर्दोष असून या प्रकरणाचा तपास पूर्ण झाला आहे. ही घटना पूर्वनियोजित नसून अचानक झालेल्या वादातून घडली आहे. तसेच, फिर्यादीच्या अंगावरील जखमा या साध्या स्वरूपाच्या आहेत.”
न्यायालयाचा निर्णय
सरकारी पक्षाने गुन्ह्याचे स्वरूप गंभीर असल्याचे सांगत जामिनाला तीव्र विरोध केला. मात्र, दोन्ही बाजूंचा युक्तिवाद आणि वैद्यकीय पुरावे लक्षात घेता, न्यायमूर्ती एन. आर. बोरकर यांनी आरोपीला सशर्त अटकपूर्व जामीन मंजूर केला.
