‘नीट २०२६’ परीक्षेत पेपर फुटीच्या प्रकरणात पोलिसांनी शहरातील इंदिरानगर भागातून शुभम खैरनार या २७ वर्षाच्या विद्यार्थ्याला ताब्यात घेतले. टपालाने (कुरिअर) नीटची प्रश्नपत्रिका त्याला मिळाली. शुभमने १० लाख रुपयांना खरेदी केलेली प्रश्नपत्रिका नंतर त्याने १५ लाख रुपयांना विकल्याचा संशय आहे.
नीट परीक्षेच्या पेपर फुटीशी नाशिकचे संबंध असल्याची बाब प्राथमिक चौकशीत समोर आली. सीबीआय, राजस्थानच्या पथकांनी नाशिक पोलिसांना संशयिताची माहिती देत त्याला ताब्यात घेण्याची विनंती केली होती. याआधारे संशयिताला इंदिरानगर भागातून ताब्यात घेण्यात आल्याचे पोलीस उपायुक्त किरणकुमार चव्हाण यांनी प्रसारमाध्यमांना सांगितले. संशयित शुभमने स्वत:ची वेशभूषा बदलली होती. केस कापले होते. त्यामुळे त्याची माहिती मिळत नव्हती. गुन्हे शाखेच्या युनिट दोनने तांत्रिक कौशल्याने संशयिताचा तपास लावला. संशयिताला केंद्रीय पथकाच्या स्वाधीन केले जाईल, असे चव्हाण यांनी सांगितले.
संध्याकाळी सीबीआयचे पथक नाशिकमध्ये दाखल झाले. त्यांनी संशयित शुभमला ताब्यात घेतले. जिल्हा शासकीय रुग्णालयात वैद्यकीय तपासणी करण्यात आली. रात्री नाशिकमध्ये मुक्काम करून पथक बुधवारी सकाळी संशयिताला घेऊन दिल्लीला रवाना झाल्याचे सूत्रांकडून सांगण्यात आले.
आर्थिक उलाढालीचा संशय
संशयित शुभम खैरनार मूळचा नाशिक जिल्ह्यातील नांदगाव येथील आहे. मध्य प्रदेशातील सिल्लोर येथील वैद्यकीय महाविद्यालयात तो ‘बीएएमएस’चे शिक्षण घेत आहे. नाशिकच्या इंदिरानगर भागात तो करिअर समूपदेशन केंद्र चालवतो. त्याचे वडील इलेक्ट्रोपॅथी डॉक्टर आहेत. संशयित शुभमने एकाकडून १० लाखात नीटची प्रश्नपत्रिका विकत घेतली. नंतर ती १५ लाख रुपयांना विकल्याचा तपास यंत्रणेला संशय आहे. कुरिअरद्वारे ही छापील प्रत त्याच्याकडे आली होती. नंतर ती नाशिकहून हरियाणाला पाठवली गेल्याचे सांगितले जाते. प्रश्नपत्रिकेच्या देवाणघेवाणीत मोठी आर्थिक उलाढाल झाल्याचा संशय आहे.
संशयिताच्या नावाविषयी पोलिसांची ही भूमिका
सीबीआयने दिलेल्या माहितीनुसार नाशिक पोलिसांनी संशयिताला ताब्यात घेतले. त्याचे नाव उघड झाल्यास संशयिताशी लागेबांधे राखणारे सावध होतील, असे नाशिक पोलिसांचे म्हणणे होते. शिवाय, ताब्यात घेतलेल्या संशयिताचा कथित पेपर फुटीशी कितपत सहभाग आहे, हे सीबीआयच्या चौकशीअंती स्पष्ट होईल. त्यामुळे संशयिताचे नाव, तपास यावर पोलिसांनी अधिक भाष्य करणे टाळले.
