माजी उपमुख्यमंत्रिपदावर असताना अजित पवार यांचे बारामती येथे विमान अपघातात निधन झाल्यानंतर रिक्त झालेल्या बारामती विधानसभा मतदारसंघासाठी पोटनिवडणूक झाली. अजित दादांच्या पत्नी आणि विद्यमान उपमुख्यमंत्री सुनेत्रा पवार राष्ट्रवादी काँग्रेस पक्षाकडून उमेदवार आहेत. सुनेत्रा पवारांसमोर कुठल्याही ताकदवान उमेदवाराचं आव्हान नसल्यामुळे त्यांचा विजय निश्चित मानला जात आहे. पोटनिवडणुकीच्या मतमोजणीला सुरुवात झाली असून पहिल्या फेरीअखेर सुनेत्रा पवार 6500 मतांनी, दुसऱ्या फेरीअखेर 16543 मतांनी आघाडीवर आहेत.
पारंपरिक राजकीय वर्चस्व
बारामतीच्या पोटनिवडणुकीला भावनिक आणि राजकीय अशा दोन्ही अंगांनी विशेष महत्त्व प्राप्त झाले आहे. अजित पवार यांच्या निधनामुळे निर्माण झालेली सहानुभूतीची लाट, तसेच बारामतीतील पारंपरिक राजकीय वर्चस्व या पार्श्वभूमीवर ही निवडणूक चर्चेचा विषय ठरली आहे.
जय पवारांची भेट
निवडणुकीपूर्वी जय पवार यांनी बारामतीत भेट देत कार्यकर्त्यांशी संवाद साधला होता. त्यांच्या भेटीमुळे राजकीय चर्चांना अधिक उधाण आले होते. मतदानाच्या दिवशी मतदारांनी उत्स्फूर्त प्रतिसाद दिल्याचे दिसून आले.
विक्रमी मतदानाची शक्यता
विक्रमी मतदानाची शक्यता वर्तवली जात असून, ग्रामीण भागासह शहरी मतदारांनीही मोठ्या प्रमाणात मतदान केले. त्यामुळे निकालात मोठे राजकीय संकेत मिळण्याची शक्यता आहे.
प्रशासनाकडून मतमोजणी प्रक्रियेसाठी कडेकोट बंदोबस्त ठेवण्यात आला आहे. प्रत्येक फेरीचे निकाल जाहीर होत असताना कार्यकर्त्यांमध्ये उत्सुकता शिगेला पोहोचली आहे. बारामतीच्या या पोटनिवडणुकीचा निकाल केवळ स्थानिक पातळीवरच नव्हे, तर राज्याच्या राजकारणावरही परिणाम करणारा ठरणार आहे.
