तिलक वर्माच्या शतकी खेळीच्या बळावर मुंबई इंडियन्सने गुजरातसमोर विजयासाठी २०० धावांचे आव्हान ठेवले होते. या आव्हानाचा बचाव करताना मुंबई इंडियन्सने ९९ धावांनी विजय मिळवला. त्यामुळे मुंबईची गाडी आता विजयाच्या रुळावर परतली आहे. दरम्यान मुंबई इंडियन्स संघासाठी आता आणखी एक आनंदाची बातमी समोर आली आहे. आयपीएल २०२६ स्पर्धेतील पहिल्या सामन्यात विजय मिळवल्यानंतर मुंबई इंडियन्सला पुढील चारही सामन्यांमध्ये पराभवाचा सामना करावा लागला होता. अहमदाबादच्या नरेंद्र मोदी स्टेडियमवर गुजरात टायटन्सविरुद्ध झालेल्या सामन्यात मुंबई इंडियन्सने दमदार पुनरागमन केलं.
क्रिकबझने दिलेल्या वृत्तानुसार, इंग्लंडचा स्टार अष्टपैलू खेळाडू विल जॅक्स मुंबई इंडियन्स संघात परतला आहे. त्यामुळे तो चेन्नई सुपर किंग्जविरुद्ध होणाऱ्या सामन्यात खेळताना दिसून येऊ शकतो. सोशल मीडियावर एक व्हिडिओ देखील व्हायरल होत आहे, ज्यात विल जॅक्स मुंबई इंडियन्सच्या हॉटेलमधून बाहेर निघताना दिसून येत आहे. विल जॅक्स संघात परतणं मुंबई इंडियन्स संघासाठी अतिशय आनंदाची बातमी आहे.
विल जॅक्स सध्या तुफान फॉर्ममध्ये आहे. भारतात झालेल्या टी -२० वर्ल्डकप स्पर्धेदरम्यान त्याने इंग्लंड संघासाठी दमदार कामगिरी केली होती. विल जॅक्स परतल्यानंतर मुंबई इंडियन्सची ताकद वाढणार आहे. कारण तो फलंदाजीसह गोलंदाजीतही योगदान देतो. पण विल जॅक्स आल्यानंतर टीम मॅनेजमेंटची डोकेदुखी वाढणार आहे. कारण प्लेईंग ११ मध्ये कोणाला खेळवायचं आणि कोणाला बसवायचं असा प्रश्न उपस्थित होणार आहे.
कोण बाहेर होणार?
गुजरात टायटन्स संघाविरुद्ध झालेल्या सामन्यात मिचेल सँटनरला प्लेईंग ११ मध्ये संधी दिली गेली होती. त्याने संधीचा फायदा घेत चांगली गोलंदाजी केली. आता विल जॅक्स आल्यानंतर गोलंदाजीसह फलंदाजीचा ऑप्शन देखील वाढणार आहे. त्यामुळे मिचेल सँटनरच्या जागी विल जॅक्सला संधी दिली जाऊ शकते.
या हंगामातील कामगिरी
हार्दिक पंड्याच्या नेतृत्वाखाली खेळत असलेल्या मुंबई इंडियन्सने आतापर्यंत ६ सामने खेळले आहेत. यादरम्यान मुंबईने २ सामने जिंकले आहेत. तर ४ सामन्यांमध्ये पराभवाचा सामना करावा लागला आहे. मुंबईचा संघ ४ गुणांसह गुणतालिकेत ७ व्या स्थानी आहे. मुंबईचा पुढील सामना २३ एप्रिलला चेन्नई सुपर किंग्ज संघाविरूद्ध होणार आहे.
