ज्येष्ठ गायिका आशा भोसले यांचे वयाच्या 92व्या वर्षी निधन झाले आहे. मुंबईतील ब्रीच कँडी हॉस्पिटलमध्ये उपचारादरम्यान त्यांनी शेवटचा श्वास घेतला. छातीमध्ये संसर्ग झाल्याने आणि थकवा जाणवल्याने आशा भोसले यांना शनिवारी (11 एप्रिल) संध्याकाळी हॉस्पिटलमध्ये दाखल करण्यात आले होते, रविवारी शरीराचे अनेक अवयव निकामी झाल्याने त्यांचे निधन झाल्याचे वृत्त समोर आले.
लता मंगेशकर यांच्या धाकट्या बहीण असलेल्या आशा यांनी ‘दम मारो दम’, ‘ये मेरा दिल’ आणि ‘रमैया वस्तावैया’ यासारख्या गाण्यांसह 20 भाषांमध्ये 12,000 गाणी गायली. त्यांना पद्मविभूषण, महाराष्ट्र भूषण यासारख्या अनेक पुरस्कारांनी गौरवण्यात आले आहे. आज सकाळी 11 वाजेपासून ते दुपारी 3 वाजेपर्यंत त्यांचे पार्थिव अंत्यदर्शनासाठी लोअर परळ येथील निवासस्थानी ठेवण्यात येणार आहे. तर दुपारी 4 वाजता दादर येथील स्मशानभूमीवर त्यांच्या पार्थिवावर शासकीय इतमामात अंत्यसंस्कार पार पडतील.
