महाराष्ट्रातील राजकारणात कायम आपल्या धोबीपछाड वृत्तीमुळे चर्चेत असलेले ज्येष्ठ नेते शरद पवार यांनी राहुरी पोटनिवडणुकीमध्ये सुद्धा आपला एक राखीव डाव टाकत सत्ताधारी पक्षाला दे धक्का परिस्थिती निर्माण केली आहे. ऐनवेळी माजी मंत्री प्राजक्त तनपुरे यांची भाजपशी वाढलेली जवळीक पाहाता मुंबईत शरद पवार काहीसे सावधच झालं होते. तसेच त्यांचे नेते देखील सावधतच होते. यातूनच शरद पवार राष्ट्रवादीने ऐनवेळी एबी फाॅर्म काढले. तोच माजी मंत्री प्राजक्त तनपुरे यांनी उमेदवारी अर्ज दाखल करणार नाही, असं जाहीर करून टाकलं. तनपुरे यांच्या या भूमिकेमुळे राष्ट्रवादी काँग्रेस पार्टी शरदचंद्र पवार पक्षाकडून गोविंद मोकाटे आता भाजपचे अक्षय कर्डिले विरोधात लढत देणार असल्याचं जवळपास शिक्कामोर्तब झालं आहे.
राहुरी पोटनिवडणुकीसाठी आज अर्ज भरण्याचा शेवटचा दिवस आहे. तत्पूर्वी राहुरीत मोठ्या राजकीय घडामोडी घडल्या. अक्षय कर्डिले यांचा भाजपकडून उमेदवारी अर्ज दाखल करण्यापूर्वी, भाजपचे प्रदेशाध्यक्ष रवींद्र चव्हाण आणि पालकमंत्री राधाकृष्ण विखे पाटील यांनी तनपुरे यांची भेट घेतली.
चव्हाण आणि विखे पाटील यांनी थेट तनपुरेंच्या कार्यालयात जात ही भेट घेतल्याने, तिथंच भाजपने राजकीय चक्रे फिरवल्याच्या चर्चांना जोर धरला. तसंच तनपुरे बंधू, चव्हाण आणि विखे पाटील या चौघांमध्ये बंद दाराआड चर्चा झाली. या चर्चा दरम्यान, तनपुरेंची मुख्यमंत्री फडणवीस यांच्याबरोबर फोनवर संवाद साधल्याचं बोललं जातं.
मुख्यमंत्री फडणवीस यांचा तनपुरेंशी फोनवर झालेल्या चर्चेला अजून या तीन नेत्यांकडून अधिकृत दुजोरा मिळत नसला, तरी इथंच भाजपने निवडणूक फिरवल्याची चर्चा आहे. या भेटीनंतर प्राजक्त तनपुरे यांनी कार्यकर्ते, पदाधिकारी आणि जनतेशी बोलून निवडणूक लढवायची की नाही, त्यावर निर्णय घेऊ, असं सांगितलं.
राहुरीत तनपुरेंच्या या हालचाली सुरू असतानाच, तिकडं मुंबईत शरद पवार राष्ट्रवादी सावध झाली होती. तनपुरेंबरोबर गोविंद मोकाटे यांच्या नावानं शरद पवार राष्ट्रवादीनं एबी फाॅर्म तयार ठेवले. दोन एबी फाॅर्म तयार ठेवण्यामागे शरद पवार यांचीच, रणनीती होती, असे आता सांगितले जात आहे.
तनपुरेंना दिली होती मोठी संधी
प्राजक्त तनपुरे यांना महाविकास आघाडीत असताना, शरद पवार यांनी थेट मंत्रिपदावर संधी दिली होती. विधानसभा निवडणुकीच्या पराभवानंतर आणि भाजपचे दिवंगत आमदार शिवाजी कर्डिले यांच्या निधनानंतर तनपुरे यांनी मतदारसंघात हिंदुत्वाच्या भूमिकेवर स्वार झाले होते. तेव्हापासून शरद पवार त्यांच्या हालचाली जाणून होते.
शरद पवार सावध अन्…
राहुरी पोटनिवडणुकीत देखील शरद पवार सावध होते. त्यातून गोविंद मोकाटे यांचा दुसरा एबी फाॅर्म तयार ठेवण्यात आला असल्याचे आता सांगितले जात. तसंच राष्ट्रवादी काँग्रेस पार्टी शरदचंद्र पवार पक्षाला उमेदवार न मिळाल्यास, काँग्रेसने देखील तयारी केली होती. या तयारीमागे देखील शरद पवार होते, अशी चर्चा मतदारसंघात जोर धरू लागली आहे.
काँग्रेसला मैदानात उतरवलं
शरद पवार पक्षाला उमेदवार न मिळाल्यास काँग्रेसकडून उमेदवार देण्याचं महाविकास आघाडीने जवळपास निश्चित केलं होते. परंतु शिवसेना उद्धव बाळासाहेब ठाकरे सेना पक्षातील गोविंद मोकाटे हे महाविकास आघाडीतील कोणत्याही पक्षाकडून तयारी होते. तशी मविआकडून उमेदवारी मिळाली नसती, तरी गोविंद मोकाटे यांनी अपक्ष म्हणून निवडणुकीला समोरे जाण्याची तयारी ठेवली होती.
शरद पवारांचा जागेवर कायम दावा
मविआतील काँग्रेस किंवा शिवसेना उद्धव बाळासाहेब ठाकरे सेना पक्षाकडे ही जागा देण्याऐवजी गोविंद मोकाटे यांना एबी फाॅर्म देत, शरद पवार यांनी या जागेवर दावा कायम ठेवला आहे. यामुळे शरद पवार यांच्या राजकीय अंदाजाची आता चर्चा जोर पकडू लागली आहे.
