वारजे (पुणे): रविवार दिनांक २९ मार्चला संध्याकाळी पॉप्युलर नगर वारजे माळवाडी परिसराचे स्थानिक राघवदास विद्यालयाच्या मैदानावर ‘विराट हिंदू संमेलन’ मोठ्या उत्साहात पार पडले. कार्यक्रमस्थळी सौ. मनीषाताई कोष्टी आणि महिला समूहाने काढलेल्या आकर्षक रांगोळीने तसेच सर्व पुरुषांचे अष्टगंध लावून व महिलांचे हळदीकुंकू, अत्तर लावून स्वागत करण्यात आले.
मान्यवरांच्या हस्ते छत्रपती श्री शिवाजी महाराज, प्रभू श्रीराम आणि भारत मातेच्या मूर्तींचे पूजन व दीपप्रज्वलन करून हिंदू संमेलनाची सुरुवात झाली. त्याचवेळी सौ. योजना देशपांडे, सौ. स्मिता तिसगावकर आणि चि देवर्ष देशपांडे यांच्या गटाने शंखनाद करून मंगलमय, पवित्र वातावरण निर्मिती केली.
कार्यक्रमाची प्रस्तावना सौ. सपना गोडघासे यांनी केली. संपूर्ण वंदेमातरम गीत सुरेल स्वरात श्री धनंजयजी आपटे यांनी म्हटले. सर्व मान्यवरांचे स्वागत व सत्कारानंतर राष्ट्रीय स्वयंसेवक संघाच्या शताब्दी वर्षानिमित्त सांस्कृतिक वार्तापत्राच्या विशेषांकाचे प्रकाशन मान्यवरांच्या हस्ते करण्यात आले. त्यानंतर भरतनाट्यम नृत्याद्वारे मुद्रा भरतनाट्यम संस्था यांच्या तरुणींनी गणेशवंदना सादर केली. स्वामी स्वरूप स्वानंद श्री सुधीर पांडे यांनी हिंदू संमेलनाची आवश्यकता व वेदांतील प्रभू श्रीरामांच्या नावाचा सखोल अर्थ स्पष्ट केला. स्वामींच्या उद्बोधनानंतर मुद्रा भरतनाट्यम संस्थेच्या युवतींनी नृत्याद्वारे शिवस्तुती सादर केली.
मातृशक्ती वक्त्या सौ. स्मिताताई आपटे यांनी समाजात चांगले बदल घडवण्यासाठी पंचपरिवर्तनाचे पाच आयाम म्हणजे पर्यावरण संरक्षण, कुटुंब प्रबोधन, समरसता, नागरी कर्तव्य आणि स्वबोध समजावून सांगितले. त्यातील ‘कुटुंब प्रबोधन’ आणि ‘समरसता’ यावर मार्गदर्शन करताना सांगितले की, पाश्चात्य संस्कृतीच्या प्रभावात आपली हिंदू मूल्ये टिकवण्यासाठी घराघरात संस्कार होणे आवश्यक आहे आणि हिंदू समाजाने जाती, पंथ हे भेद विसरून एकोप्याने राहावे. त्यानंतर चिमुकला शिवप्रेमी शिवतेज गळंगे याने शिवबा राजं हे गीत सादर केलं. त्यानंतर मॉडर्न शाळेतील विद्यार्थ्यांनी आवेशपूर्ण पोवाडा सादर केला. नादब्रह्म महिला मंडळाने श्रीरामाची भजने सादर केली. तदपश्चात कार्यक्रमाचे प्रमुख वक्ते श्री तुषारजी दामगुडे यांनी उपस्थितांना संबोधित करताना हिंदू समाजाची कर्तव्य, भूमिका आणि वर्तमान काळातील व आगामी आव्हाने यावर अभ्यासपूर्ण आणि परखड मतांची मांडणी केली. सृष्ठाशीं सुष्ट, दृष्टांशी दृष्ट, भल्याशी भले आणि दुर्जनाशी दुर्जन हिंदू समाजाने असावे असे त्यांनी सांगितले. “हिंदू समाज संघटित होणे ही काळाची गरज असून, दुष्टांना जशास तसे उत्तर देण्यासाठी प्रत्येक घरात जिजाऊ मातेसमान माता आणि छत्रपती शिवराय घडले पाहिजेत,” असा विचार त्यांनी मांडला. सांगता समारंभात कु विद्या भोपे हिने छत्रपती श्री संभाजी महाराजांवर आवेशपूर्ण भाषण केले . चि सौम्या भूमकर हिने गीत सादर केले. श्री. चैतन्य बोडके यांच्या राष्ट्रवीर संघाच्या बाल व युवक युवतींनी शिवकालीन शास्त्रविद्या म्हणजे लाठीकाठी, तलवार, दांडपट्टा, भाला यांची चित्तथरारक प्रात्यक्षिके सादर केली.
या हिंदू संमेलनाचे संयोजक म्हणून श्री रणजीत टेमघरे यांनी दायित्व निभावले आणि सहसंयोजक श्री चेतन डांगी तसेच मातृशक्ती सहसंयोजक सौ सुवर्णाताई वैद्य होत्या. कार्यक्रमाला मा. नगरसेवक श्री. सचिन दोडके, श्री. भारतभूषण बराटे, सौ. सायलीताई वांजळे, राजे शिवराय प्रतिष्ठानचे संस्थापक व हिंदुत्ववादी कार्यकर्ते श्री. महेशजी पवळे, माजी नगरसेवक श्री किरण बारटक्के आणि वारजे नगर संघचालक श्री. चित्तरंजनजी भागवत यांची विशेष उपस्थिती होती.
या संमेलनात ५५० पुरुष, ८०० महिला आणि ५० बालके अशा एकूण १४०० जणांनी उत्स्फूर्त सहभाग नोंदवला. कार्यक्रमाचे समर्पक सूत्रसंचालन सौ. प्राची लांडगे आणि सौ. सपना गोडघासे यांनी केले, आभार प्रदर्शन हिंदू संमेलनाचे संयोजक श्री रणजीत टेमघरे यांनी केले. कार्यक्रमाची सांगता स्नेहा पॅराडाइज सोसायटीतील गटाने सादर केलेल्या सामूहिक हनुमान चालीसा पठणाने झाली. शेवटी उपस्थित हिंदू बंधू भगिनींनी स्वादिष्ट भोजन प्रसादाचा आस्वाद घेतला.
