महाराष्ट्र शासनाच्या वतीने 31 मार्च रोजी पुण्यातील अतिरिक्त आयुक्त या पदावरील अधिकारी यांची बदली करण्यात आल्यानंतर या जागी पुणेरी नाळ असलेल्या आणि पुणे शहरांमध्ये पूर्ण सेवा देणाऱ्या अधिकाऱ्यांची वर्णी लागेल की काय अशी चर्चा पुन्हा सुरू झाली आहे. सध्या पुणे महापालिकेमध्ये शासन नियुक्त अधिकारी आणि पुणे महापालिकेतील कर्मचारी अशी थेट दरी निर्माण झाल्याने प्रशासकीय पातळीवर त्याचा खूप मोठा धोका निर्माण झाला आहे. स्थानिक प्रशासनातील अधिकाऱ्यांना थेट ‘निलंबित’ करण्याचे प्रमाणही याच काळात वाढीस लागले आहे. पुणे महापालिकेत नव्याने नियुक्त नगरसेवकांनाही थेट शासन नियुक्त अधिकाऱ्यांचा असणारा निरस ‘अप्रोज’ सध्या जाणू लागल्याने सत्ताधारी लोकांकडूनही या अतिरिक्त आयुक्तपदाच्या रिक्त जागी पूर्ण याच हद्दीमध्ये सेवा दिलेल्या अधिकाऱ्याला प्राधान्य देण्याची मानसिकता तयार झाली आहे. महापालिकेच्या सेवेतील अधिकाऱ्याची वर्णी लागावी यासाठी प्रशासनाकडून प्रयत्न सुरु आहेत.
सध्या या पदासाठी चार अधिकारी पात्र होत असून, विभागीय पदोन्नती समितीमध्ये आणि नगरविकास विभागाकडून कोणाच्या नावावर शिक्कामोर्तब होणार आहे. दरम्यान, ही प्रक्रिया प्रशासन किती गतीने करणार हे महत्त्वाचे ठरणार आहे. पुणे महापालिकेत अतिरिक्त आयुक्त पदाच्या तीन जागा आहेत. त्यामध्ये अतिरिक्त आयुक्त विशेष या जागेवर महापालिकेतील वरिष्ठ अधिकाऱ्यांची नियुक्ती होऊ शकते. तर उर्वरित दोन जागांवर भारतीय प्रशासन सेवेतील अधिकाऱ्यांची नियुक्ती होते. अतिरिक्त आयुक्त पृथ्वीराज बी. पी. यांची वसई विरार महापालिकेच्या आयुक्तपदी बदली आहे. त्यामुळे एक जागा रिक्त झाल्याने महापालिकेतील अधिकाऱ्यांची या पदावर नियुक्तीबाबत पुन्हा एकदा चर्चा सुरु झाली आहे.
महापालिकेच्या सेवेतील अधिकाऱ्याची अतिरिक्त आयुक्त पदावर पदोन्नतीने नियुक्ती करण्यासाठी फेब्रुवारी महिन्यात शासन हा आदेश काढला आहे.
- अतिरिक्त आयुक्तपदासाठी निवड करताना त्यात आधी प्रशासकीय सेवा, त्यानंतर तांत्रिक व लेखा सेवा यामधील अधिकारी असा क्रम असला पाहिजे.
- सहाय्यक आयुक्त व उपायुक्त या पदावरील एकूण सेवा १५ वर्ष झालेली असावी.
- १० वर्षातील गोपनीय अभिलेखांमध्ये ९ वर्षामध्ये अत्युत्कृष्ट दर्जा असा शेरा असला पाहिजे
- एका वर्षासाठी उत्कृष्ट किंवा चांगला शेरा असला तरी हरकत नाही असे या आदेशात नमूद केले आहे.
अतिरिक्त आयुक्त या पदावर सुरेश जगताप, ज्ञानेश्वर मोळक, विलास कानडे या तीन महापालिकेच्या सेवेतील अधिकाऱ्यांना काम करण्याची संधी मिळाली आहे. त्यानंतर या पदावर शासनाकडून आलेले विकास ढाकणे, ओमप्रकाश दिवटे यांची नियुक्ती झाली आहे. आता या पदावर महापालिका सेवेतील अधिकाऱ्यांची निवड करायची असल्यास ओमप्रकाश दिवटे यांच्याकडे पृथ्वीराज बी. पी. यांचा कार्यभार देण्याची गरज आहे. ओमप्रकाश दिवटे यांच्या जागी महापालिका सेवेतील अधिकारी नियुक्त करता येऊ शकतो. पण प्रक्रिया पार पडण्यास, सत्ताधाऱ्यांकडून योग्य नावास संमती देणे, नगरविकास विभागाकडूनही त्यास मंजुरी देणे ही प्रक्रिया गतीने झाली तरच मनपा सेवेतील अधिकाऱ्यांना संधी मिळेल अन्यथा पुन्हा एकदा शासनाकडून पाठविण्यात आलेल्या अधिकाऱ्याकडे हे पद जाऊ शकते.
या अधिकाऱ्यांची नावे चर्चेत
अतिरिक्त आयुक्त पदासाठी उपायुक्त अविनाश सपकाळ, माधव जगताप, विजय लांडगे आणि मुख्यलेखापाल उल्का कळसकर हे चार अधिकारी पात्र आहेत. त्यांच्यापैकी एका अधिकाऱ्यांच्या नावावर डीपीसी मध्ये शिक्कामोर्तब होऊन त्याची शिफारस नगरविकास विभागाकडे केली जाईल.
