महाराष्ट्रात सध्या दोन पोटनिवडणुकांचे बिगुल वाजले असले तरी सद्धा या निवडणुका बिनविरोध होणार की लढती होणार ही सध्या चर्चा महाराष्ट्रात जोरात सुरू आहे. दिवंगत उपमुख्यमंत्री अजित दादा पवार यांच्या जागी बिनविरोध करण्याबाबत प्रमुख पक्षांमध्ये एक मत होत असलं तरी सुद्धा अर्ज भरण्याच्या पहिल्या दिवशीच बाहेरील उमेदवारांनी अर्ज भरल्याने वेगळी रंगत निर्माण झाली आहे. राज्यातील प्रमुख पक्षांमध्ये बारामती आणि राहुरी या दोन्हीही विधानसभेच्या पोटनिवडणुका बिनविरोध करण्याची मानसिकता असली तरी सुद्धा शरद पवार गटाच्या कार्यकर्त्याच्या वतीने वेगळी चाल खेळली जात आहे. भारतीय जनता पक्षाच्या वतीने सुद्धा या खेळीचा अंदाज घेऊन सर्वात अगोदर राहुरी विधानसभा मतदारसंघातील उमेदवारी जाहीर करण्याचा डाव टाकण्यात आला आहे. राष्ट्रवादी काँग्रेस पार्टी शरद पवार गट यांच्यावतीने बंडखोरी करण्यात आली तर बारामती निवडणुकीमध्ये सुद्धा बिनविरोध ऐवजी थेट निवडणूक अशी रंगत पाहण्यास मिळण्याची शक्यता आहे.
महाराष्ट्रात सध्या पोटनिवडणुका जाहीर झालेल्या दोन्ही जागा महायुतीकडे असल्याने राष्ट्रवादी काँग्रेस पार्टी अजित पवार गट व भारतीय जनता पक्षाच्या वतीने तयारी सुरू करण्यात आली आहे. या दोन्ही मतदारसंघांमध्ये महायुतीतील पक्षाकडून बंडखोरी केली जाणार नसली तरी विरोधी गटातील राष्ट्रवादी काँग्रेस पार्टी शरद पवार गटाच्या वतीने मात्र राहुरी विधानसभा निवडणूक लढण्याची तयारी सुरू केली आहे.
दिवंगत आमदार शिवाजीराव कर्डिले यांच्या निधनानंतर राहुरी विधानसभा मतदारसंघातील पोटनिवडणुकीची उत्सुकता शिगेला पोहोचली होती. अखेर भारतीय जनता पक्षाने त्यांच्या वारशावर शिक्कामोर्तब करत पुत्र अक्षय कर्डिले यांना उमेदवारी जाहीर केली आहे. बारामती विधानसभा मतदारसंघ हा कायम एकाच पक्षाकडे ताब्यात असलेला मतदार संघ आहे तर राहुरी विधानसभा मतदारसंघ राष्ट्रवादी काँग्रेस पक्षाचे ज्येष्ठ नेते जयंत पाटील यांचे भाचे व दबंग दिवंगत आमदार शिवाजीराव कर्डिले यांच्यामध्ये सत्तांतर झालेला मतदारसंघ आहे; त्यामुळे त्या भागात बिनविरोध निवडणूक जवळजवळ अशक्य मानली जात आहे.
राष्ट्रवादी काँग्रेस शरद पवार गट अॅक्शनमध्ये
दरम्यान, शरद पवार यांच्या नेतृत्वाखालील राष्ट्रवादी काँग्रेस (शरद पवार गट)ही सक्रिय झाली आहे. माजी आमदार प्राजक्त तनपुरे यांच्या नावावर जवळपास शिक्कामोर्तब झाल्याची माहिती समोर येत असून, अधिकृत घोषणा लवकरच होणार आहे.
भाजपची गड टिकवण्याची धडपड
राहुरी मतदारसंघ हा मागील काही वर्षांपासून भाजपचा बालेकिल्ला मानला जातो. शिवाजीराव कर्डिले यांच्या नेतृत्वाखाली पक्षाने येथे मजबूत पकड निर्माण केली होती. त्यांच्या निधनानंतरही ही परंपरा कायम ठेवण्यासाठी भाजपने अक्षय कर्डिले यांच्यावर विश्वास दाखवला आहे. ‘शिव निर्धार यात्रा’च्या माध्यमातून ते सध्या मतदारांशी संपर्क वाढवत आहेत.
विरोधकांचाही जोरदार प्रचार
दुसरीकडे प्राजक्त तनपुरे यांनी ‘जनआशीर्वाद यात्रा’ काढत मतदारसंघात सक्रियता वाढवली आहे. संभाव्य उमेदवारीच्या पार्श्वभूमीवर त्यांनी आपली राजकीय ताकद दाखवण्यास सुरुवात केली आहे.
2019 चा निकाल निर्णायक
2019 च्या विधानसभा निवडणुकीत प्राजक्त तनपुरे यांनी शिवाजीराव कर्डिले यांचा पराभव करून मोठा विजय मिळवला होता. त्यानंतर ते महाविकास आघाडी सरकारमध्ये ऊर्जामंत्री झाले. मात्र, स्थानिक पातळीवर अपेक्षित प्रभाव निर्माण करण्यात ते अपयशी ठरल्याचे मत व्यक्त केले जाते.
2024 मध्ये मात्र शिवाजीराव कर्डिले यांनी दमदार पुनरागमन करत तनपुरे यांना तब्बल 34 हजार मतांनी पराभूत केले. त्यांच्या या विजयाने भाजपचा गड पुन्हा मजबूत झाला.
साखर कारखान्याचा मुद्दा ऐरणीवर
राहुरीतील डॉ. बाबुराव तनपुरे सहकारी साखर कारखाना हा या निवडणुकीत महत्त्वाचा मुद्दा ठरण्याची शक्यता आहे. सुमारे 600 कोटी रुपयांच्या कर्जाखाली असलेल्या या कारखान्याचा ताबा तनपुरे गटाने घेतला असला, तरी अद्याप तो सुरू करण्यात यश आलेले नाही. त्यामुळे ऊस उत्पादक शेतकऱ्यांमध्ये नाराजीची भावना आहे.
स्थानिक राजकारणात बदलते समीकरण
कारखान्याच्या घडामोडीनंतर तनपुरे कुटुंबातील काही सदस्यांच्या राजकीय भूमिकेत बदल झाल्याची चर्चा आहे. विशेषतः अरुण तनपुरे यांच्या भूमिकेमुळे स्थानिक राजकारणात नवे समीकरण निर्माण होत असल्याचे बोलले जाते.
थेट लढतीची शक्यता
अक्षय कर्डिले यांची उमेदवारी जाहीर झाल्यानंतर आता प्राजक्त तनपुरे यांच्या नावाची अधिकृत घोषणा होण्याची प्रतीक्षा आहे. ती झाल्यास राहुरीत ‘तनपुरे विरुद्ध कर्डिले’ अशी थेट आणि चुरशीची लढत पाहायला मिळणार आहे.
