देशभरात साहसी प्रवासाच्या नावाखाली फिरताना पुण्यासह पुण्यासह आंध्र प्रदेश, तेलंगणा, मध्य प्रदेशातील अनेक शहरांत पन्नासाहून अधिक घरफोड्या करणाऱ्या बांगलादेशातील अट्टल चोरट्याला पुणे पोलिसांच्या पथकाने उत्तर प्रदेशातील मिर्झापूर येथून सिनेस्टाईल पाठलाग करून अटक केली. यासाठी सलग सहा दिवस आंध्र प्रदेश, तेलंगणा, महाराष्ट्र, मध्य प्रदेश आणि उत्तर प्रदेशातील अनेक शहरांत पुणे पोलिसांनी केलेला थरारक पाठलाग त्यांची कर्तव्य भावना, चिवटपणा आणि कर्तूत्व अधोरेखित करणारा ठरला.
पुणे ते मिर्झापूर असा थरारक प्रवास करणाऱ्या बांगलादेशी चोराचा अखेर पोलिसांनी पर्दाफाश केला. साहसाची आवड असलेल्या या आरोपीला अलंकार पोलिसांनी नाट्यमय पाठलागानंतर अटक केली. साहसी प्रवासाच्या नावाखाली रॉयल एनफिल्ड हिमालयन बाईकवर स्वैरपणे फिरत आणि चोरलेला आयफोन वापरत हा चोरटा देशभर धुमाकूळ घालत होता. पण पुणे पोलिसांच्या चिवटपणासमोर त्याचा निभाव लागला नाही.
पोलिसांनी ‘सीविक मिरर’ला दिलेल्या माहितीनुसार, मोहम्मद बशार नूर मोहम्मद उर्फ नेवन्नाथ विनोद कुमार (वय ३८) या आरोपीने देशातील सहा राज्यांत धूमाकुळ घालत तब्बल पन्नासाहून अधिक घरफोड्या केल्या होत्या. आंध्र प्रदेश, तेलंगणा, महाराष्ट्र, मध्य प्रदेश, उत्तर प्रदेश अशा विविध राज्यांत त्याने चोरी करून नागरिकांना हादरवून सोडले होते. प्रत्येक ठिकाणी घरफोडी करताना तो वेगवेगळ्या ओळखीने वावरत असे, त्यामुळे त्याचा माग काढणे पोलिसांसाठी आव्हानात्मक ठरत होते.
या प्रकरणात अलंकार पोलीस ठाण्याचे वरिष्ठ पोलीस निरीक्षक उल्हास कदम आणि त्यांच्या पथकाने सातत्याने तपास करत आरोपीचा यशस्वीपणे माग काढला आणि मोहीम फत्ते केली. मिर्झापूर येथे सापळा रचून त्याला अटक करण्यात आली. पुणे पोलिसांच्या चिकाटीमुळेच या ‘हाय-प्रोफाइल’ चोराचा खेळ खल्लास झाला. आरोपी मोहम्मद बशार नूर मोहम्मद उर्फ नेवन्नाथ विनोद कुमार बांगलादेशी नागरिक असल्याचे निष्पन्न झाले आहे. त्याच्याकडून अनेक पासपोर्ट, ड्रायव्हिंग लायसन्स, परकीय चलन आणि विविध कागदपत्रे जप्त करण्यात आली आहेत. या वस्तूंवरून तो बनावट ओळख तयार करून देशभर फिरत होता, असे स्पष्ट झाले आहे.
या कारवाईबाबत ‘सीविक मिरर’ला माहिती देताना निरीक्षक उल्हास कदम म्हणाले, “रॉयल एनफिल्ड बाईकची अचूक माहिती मिळाल्यामुळे आरोपीचा माग काढणे सोपे झाले. आरोपीने तेलंगणा, आंध्र प्रदेश, चंद्रपूर, नागपूर, अमरावती, भंडारा असा प्रवास केला होता. आम्ही सहा दिवस त्याचा पाठलाग करून अखेर त्याला अटक केली आणि चोरीचा सर्व मुद्देमाल जप्त केला.”
वाराणसी पोलिसांनीही आरोपीविरुद्ध भारतीय न्याय संहिता तसेच इमिग्रेशन आणि फॉरेनर्स अॅक्टअंतर्गत रामनगर पोलीस ठाण्यात गुन्हा दाखल केला असून पुढील तपास सुरू आहे.
आंतरराष्ट्रीय गुन्हेगारीचे धागेदोरे उलगडण्याची शक्यता
या आरोपीविरुद्ध भारतीय न्याय संहितेच्या विविध कलमांन्वये गुन्हा दाखल करण्यात आला असून पुढील तपास सुरू आहे. दरम्यान, या घटनेमुळे राज्यांतर्गत आणि आंतरराष्ट्रीय गुन्हेगारीचे धागेदोरे उलगडण्याची शक्यता पोलिसांनी व्यक्त केली आहे. एकीकडे साहसाच्या नावाखाली देशभर बाईकवरून फिरणारा हा चोर, तर दुसरीकडे त्याच्या मागावर असलेले पोलीस या थरारक पाठलागाची सांगता अखेर मिर्झापूरमध्ये झाली. कर्वेनगर येथील घरफोडी प्रकरणाच्या तपासादरम्यान सीसीटीव्ही फुटेजमध्ये संशयित दिसल्यानंतर पुणे पोलिसांच्या रडारवर आलेल्या बांगलादेशी आरोपीचा अखेर सहा दिवसांच्या थरारक पाठलागानंतर मिर्झापूर येथे अटक करण्यात आली. आरोपीच्या चलाख हालचाली टिपणे तंत्रज्ञानाधारित तपासामुळे शक्य झाले. मानवी माहितीच्या आधारे पोलिसांनी चकवा देत त्याला जेरबंद केले.
आरोपीचा माग काढण्यासाठी वरिष्ठ पोलीस निरीक्षक उल्हास कदम यांच्या नेतृत्वाखाली पथक तेलंगणात पाठवले होते. लोकेशननुसार त्याचा पाठलाग करण्यात आला. आरोपी तेलंगणातून चंद्रपूरकडे जात असल्याची माहिती मिळाल्यानंतर सर्व संभाव्य मार्गांवर सापळे रचले. मध्य प्रदेशमधून मिर्झापूरकडे जात असताना त्याचा ठावठिकाणा लागला. या पाठलागात अमेठी, वाराणसी अनेक शहरांतील स्थानिक पोलिसांची मदत लाभली.
– संभाजी कदम, पोलीस उपायुक्त, परिमंडळ तीन, पुणे
असा झाला डेक्कन ते मिर्झापूर पाठलाग…
मिळालेल्या माहितीनुसार, १६ मार्च २०२६ रोजी नवसह्याद्री सोसायटीतील रहिवासी करणराज गुजर मेहता (वय ३८) यांनी त्यांच्या घरात १५ मार्चच्या रात्री १० ते पहाटे ५ या दरम्यान घरफोडी झाल्याची तक्रार दिली होती. या घटनेत आरोपीने सोनी एफएक्स थ्री कॅमेरा, सोनी १००-४०० मिमी जी मास्टर लेन्स, आयफोन, ड्रोन, आयपॅड तसेच इतर इलेक्ट्रॉनिक साहित्य लंपास केले होते.
अलंकार पोलिसांनी घरफोडीचा गुन्हा दाखल करून तपास सुरू केला. सीसीटीव्ही फुटेजमध्ये आरोपी पाठीवर पोते घेऊन रॉयल एनफिल्ड हिमालयन बाईकवरून फिरताना दिसला. वरिष्ठ पोलीस निरीक्षक उल्हास कदम आणि त्यांच्या पथकाने डेक्कन, शिवाजीनगरमार्गे खडकीपर्यंत त्याचा माग काढला. तपासादरम्यान चोरीचा आयफोन तेलंगणात असल्याचे समोर आले.
परिमंडळ तीनचे पोलीस उपायुक्त संभाजी कदम यांनी सांगितले की, ”आरोपीचा माग काढण्यासाठी पोलिसांचे पथक तेलंगणात पाठवण्यात आले. पुढे आरोपीची लोकेशन कोटिपूरम येथे मिळाली. तेथे चौकशी केल्यानंतर त्याने स्वतःच्या पैशाने रॉयल एनफिल्ड बाईक खरेदी केल्याचे समजले. १९ मार्च रोजी आरोपी तेलंगणातून चंद्रपूरकडे जात असल्याची माहिती मिळाल्यानंतर सर्व संभाव्य मार्गांवर सापळे रचण्यात आले आणि स्थानिक पोलिसांशी समन्वय साधत सीसीटीव्ही फुटेजही प्रसारित करण्यात आले. त्याच दिवशी सायंकाळी आरोपीची लोकेशन मध्य प्रदेशात आढळली. २० मार्च रोजी पुन्हा मिर्झापूरजवळ त्याचा ठावठिकाणा लागल्यानंतर निरीक्षक कदम यांनी स्वतःच्या नेटवर्कचा वापर करून सापळा रचला. या कारवाईसाठी अमेठी आणि वाराणसी येथील पोलिसांचीही मदत घेण्यात आली.”
तांत्रिक विश्लेषणातून अचूक माहिती मिळाल्यामुळे आरोपीचा माग काढणे सोपे झाले. आरोपीने तेलंगणा, आंध्र प्रदेश, चंद्रपूर, नागपूर, अमरावती, भंडारा असा प्रवास केला होता. सलग सहा दिवस त्याचा पाठलाग करून अखेर आम्ही त्याला बेड्या ठोकण्यात यशस्वी ठरलो. या कारवाईदरम्यान पोलीस आयुक्त अमितेश कुमार यांनी आम्हाला प्रत्येक टप्प्यावर सातत्याने मोलाचे मार्गदर्शन केले.
– उल्हास कदम, वरिष्ठ पोलीस निरीक्षक, अलंकार ठाणे
वरिष्ठ पोलीस निरीक्षक उल्हास कदम यांनी यापूर्वीही लावला आहे अनेक किचकट प्रकरणांचा छडा-
अलंकार पोलीस चौकीचे वरिष्ठ निरीक्षक उल्हास कदम यांनी यशस्वी केलेली ही एकमेव मोहीम नाही. त्यांनी स्वतःच्या बुद्धिमत्तेच्या आणि इतर राज्यांमधील नेटवर्कच्या जोरावर आतापर्यंत अनेक प्रकरणांचा छडा लावला आहे. यातून त्यांचे विलक्षण गुप्तहेर कौशल्य दाखवून दिले आहे. यापैकी एक उल्लेखनीय प्रकरण म्हणजे २०२१ मधील बुधवार पेठ हत्याकांड. यात एका महिलेची तिच्याच कुटुंबीयांनी निर्घृणपणे हत्या केली होती. कायद्याच्या कचाट्यातून सुटता येईल, या विचाराने आरोपी रेल्वेने मध्य प्रदेशात पळून गेले. मात्र, निरीक्षक कदम आणि त्यांची टीम त्यांच्या मागावर होती. सखोल तपासाद्वारे, त्यांनी तिकीट बुकिंगचे ठिकाण शोधून काढले. यामुळे अखेरीस मध्य प्रदेशात आरोपींना अटक करण्यात आली.
२०२२ मध्ये उल्हास कदम यांच्या टीमने शोरूममधील अनेक चोऱ्या करणाऱ्या टोळीचा पर्दाफाश केला. या टोळीने शोरूममध्ये घुसून रोकड आणि वाहने चोरली होती. बिबवेवाडी आणि भारती विद्यापीठातील दोन नामांकित शोरूमना यात लक्ष्य करण्यात आले होते, परंतु कदम यांच्या टीमने आरोपींचा माग काढत त्यांना थेट उत्तर प्रदेशातील प्रयागराजपर्यंत जाऊन अटक केली आणि कायद्याचा धाक कायम राखला.
२०२४ मधील बोपदेव घाट सामूहिक बलात्कार प्रकरण हे इन्स्पेक्टर कदम यांच्या कौशल्याची कसोटी घेणारे आणखी एक आव्हानात्मक प्रकरण होते. ३ ऑक्टोबर २०२४ रोजी बोपदेव घाटावर तीन पुरुषांनी एका २१ वर्षीय विद्यार्थिनीवर सामूहिक बलात्कार केला होता आणि आरोपी फरार असल्याने पोलिसांना कोणताही सुगावा लागला नव्हता. मात्र, इन्स्पेक्टर कदम यांच्या पथकाने अथक परिश्रम करून आरोपींपैकी एक, अख्तर अली शेख (२८), याला प्रयागराज येथून शोधून काढले. या तपासांमध्ये कदम यांचा ‘सिक्स्थ सेन्स’ महत्वाचा ठरला, असे त्यांचे सहकारी कौतुकाने सांगतात.
