कौटुंबिक वादातून पतीने इमारतीच्या चौथ्या मजल्यावरून उडी मारून जीवन संपविल्याची घटना वारजे परिसरात घडली. या प्रकरणी वारजे माळवाडी पोलिसांनी पत्नीविरुद्ध गुन्हा दाखल केला आहे. महेश दत्तात्रेय क्षीरसागर (वय ४०, रा. गिरीधरनगर, वारजे माळवाडी) असे आत्महत्या केलेल्याचे नाव आहे. याबाबत त्यांचे वडील दत्तात्रेय बाबूराव क्षीरसागर (वय ६८) यांनी वारजे माळवाडी पोलिस ठाण्यात फिर्याद दिली आहे. त्यानुसार प्रतिभा महेश क्षीरसागर (वय ३५, रा. शिवणे) यांच्यावर आत्महत्येस प्रवृत्त केल्याच्या आरोपावरून गुन्हा दाखल करण्यात आला आहे.
पोलिसांनी दिलेल्या माहितीनुसार, महेश क्षीरसागर यांचे १३ वर्षांपूर्वी लग्न झाले होते; मात्र पती-पत्नीमध्ये सातत्याने वाद होत होते. या सततच्या कौटुंबिक तणावाला कंटाळून महेश यांनी दोन फेब्रुवारी रोजी चौथ्या मजल्यावरून उडी मारून आत्महत्या केली, असे फिर्यादीत म्हटले आहे. याबाबत त्यांच्या वडिलांनी १६ फेब्रुवारी रोजी पोलिस ठाण्यात तक्रार दिली. त्यानुसार पोलिसांनी गुन्हा दाखल केला आहे.
