दिवंगत नेते अजित पवार यांच्या विमान अपघातावर संशय निर्माण केला जात आहे. काही दिवसांपूर्वी रोहित पवारांनी पत्रकार परिषद घेऊन यासंदर्भातले काही पुरावे आणि त्यातून निर्माण झालेल्या शंका उपस्थित केल्या होत्या. आता पुन्हा रोहित पवार बुधवारी पत्रकार परिषद घेणार आहेत. त्यापूर्वी त्यांनी मंगळवारी ब्लॅक बॉक्सबद्दल मोठं विधान केलं आहे.
मंगळवारी ईडी चौकशीनंतर रोहित पवार माध्यमांशी बोलत होते. ते म्हणाले की, ब्लॅक बॉक्स आणि इतर विषयांवर बोलण्यासाठी मी उद्या चव्हाण सेंटरमध्ये पत्रकार परिषद बोलावली आहे. व्हिएसआर कंपनी अजूनही ऑपरेशनमध्ये आहे. आम्ही ब्लॅक बॉक्सबद्दल जी भीती बोलून दाखवली होती तेच होताना दिसतंय.
रोहित पवार पुढे म्हणाले, ब्लॅक बॉक्स बंद आहे, जळाला आहे, भारताबाहेर पाठवावा लागेल; असा अंदाज आम्ही आधीच बांधला होता. आता तेच होताना दिसतंय. उद्या याबाबत मी आणखी काही मुद्दे मांडणार आहे. पाऊस, ऊन, आग यापासून ब्लॅक बॉक्स सुरक्षित रहातो, मात्र राजकारणापसून सुरक्षित रहात नाही; असं ते म्हणाले.
दरम्यान, ब्लॅक बॉक्स जळाला असून त्यातील डेटा रिकव्हर करण्यासाठी परदेशात पाठवण्यात आल्याचं मीडिया रिपोर्टनुसार सांगण्यात येतंय. त्यातील कोणता डेटा रिकव्हर होत नाहीये किंवा कोणता डेटा रिकव्हर झालाय, हे मात्र अद्याप स्पष्ट झालेलं नाही. उद्या रोहित पवार नेमकं काय बोलणार, याकडे राज्याचं लक्ष लागून राहिलं आहे.
