काँग्रेस भवन परिसरात रविवारी भारतीय जनता पक्षाच्या कार्यकर्त्यांनी केलेल्या आंदोलनाला हिंसक वळण मिळाले. झटापट, तसेच दगडफेकीची घटना घडल्यानंतर या प्रकरणी भारतीय जनता पक्षासह काँग्रेस कार्यकर्त्यांनी परस्पर विरोधी फिर्यादी शिवाजीनगर पोलिस ठाण्यात दाखल केल्या. परस्परविरोधी फिर्यादीनंतर भारतीय जनता पक्षाचे शहराध्यक्ष नगरसेवक धीरज घाटे, तसेच काँग्रेसचे पदाधिकारी नगरसेवक अरविंद शिंदे यांच्यासह १०० ते १५० कार्यकर्त्यांविरोधात गुन्हे दाखल करण्यात आले. पुणे शहर भारतीय जनता पक्षाच्या वतीने काल करण्यात आलेले आंदोलन शहर पातळीवर असलं तरीही याचे धागेदोरे कोथरूड विधानसभा मतदारसंघातच जुळत आहेत. विशेष म्हणजे भारतीय जनता पक्ष व काँग्रेस दोन्ही पक्षाच्या वतीने कोथरूड विधानसभा मतदारसंघातीलच फिर्यादींनी आक्रमक होत गुन्हा दाखल करण्याचे काम केले आहे.
काँग्रेसचे प्रदेशाध्यक्ष हर्षवर्धन सपकाळ यांनी छत्रपती शिवाजी महाराज यांच्याविषयी अवमानकारक वक्तव्य केल्याच्या निषेधार्थ भारतीय जनता पक्षाच्या कार्यकर्त्यांनी रविवारी (दि. १५) काँग्रेस भवनसमोर आंदोलन केले. सपकाळ यांनी केलेल्या वक्तव्याच्या निषेध केला. या वेळी भारतीय जनता पक्ष आणि काँग्रेसच्या कार्यकर्त्यांमध्ये झटापट झाली. दोन्ही बाजूच्या कार्यकर्त्यांनी दगडफेक केली. या घटनेत काँग्रेसचे तीन, तसेच भाजपचे दोन असे पाच कार्यकर्ते किरकोळ जखमी झाले. यासह दोन पोलिस कर्मचारी आणि दोन पत्रकार देखील किरकोळ जखमी झाले.
त्यानंतर रात्री उशीरा भारतीय जनता पक्षाचे शहराध्यक्ष नगरसेवक धीरज घाटे, युवा मोर्चाचे पदाधिकारी दुष्यंत मोहोळ यांच्यासह ५० ते ६० कार्यकर्त्यांविरोधात शिवाजीनगर पोलिस ठाण्यात गुन्हा दाखल करण्यात आला. याबाबत काँग्रेसच्या कार्यकर्त्या प्राची नितीन दुधाणे (४२, रा. दुधाणेनगर, कर्वेनगर) यांनी फिर्याद दिली आहे. या प्रकरणाचा तपास गुन्हे शाखेचे पोलिस निरीक्षक अमर काळंगे करत आहेत. दरम्यान, भारतीय जनता पक्षाचे पदाधिकारी पुनीत श्रीकांत जोशी (३५, रा. आयडियल काॅलनी, कोथरूड) यांनी परस्परविरोधी फिर्याद दिली आहे. त्यांनी दिलेल्या फिर्यादीनुसार, काँग्रेसचे पदाधिकारी अरविंद शिंदे, गौरव बाळंदे, अक्षय जैन, सागर धाडवे यांच्यासह कार्यकर्त्यांविरोधात गुन्हा दाखल करण्यात आला. पुढील तपास सहायक पोलिस निरीक्षक संजय पांढरे करत आहेत.
