काँग्रेस प्रदेशाध्यक्ष हर्षवर्धन सपकाळ यांनी छत्रपती शिवाजी महाराज यांची तुलना टिपू सुलतान यांच्याशी केल्यामुळे भाजप कार्यकर्त्यांनी काँग्रेस भवन येथे केलेल्या आंदोलनाचे दगडफेकीचे रूपांतर आले. भाजप आणि काँग्रेस कार्यकर्त्यांमध्ये हमरीतुमरी होऊन एकमेकांवर दगडफेक करण्यात आली. पुणे शहराच्या वतीने फक्त आंदोलनाची आखणी करण्यात आलेली असताना अचानक कोथरूड विधानसभा मतदारसंघातील कार्यकर्तेच आमने सामने झाले. पुणे शहरातील सर्वाधिक (विरोधी पक्षातील सहा नगरसेवक) फटका बसलेला कोथरूड विधानसभा मतदारसंघ या आंदोलनाच्या दरम्यान लक्ष करण्यात आला. विशेष म्हणजे आक्रमक झालेले कार्यकर्ते सुद्धा कोथरूड विधानसभा मतदारसंघातील सक्रिय पदाधिकारी आणि पारंपारिक विरोधक होते.
पुणे शहर भारतीय जनता पक्षाच्या वतीने कोथरूड हा भारतीय जनता पक्षाचा बालेकिल्ला असल्याची बतावणी केली जात असली तरीसुद्धा अत्यंत अटीतटीच्या प्रभाग ९ मध्ये विरोधकांनी २ जागी यश मिळवले. त्याबरोबरच प्रभाग 11 मध्ये लाजिरवाणी पराभवासह फक्त १ जागा भारतीय जनता पक्षाला राखता आली. विशेष म्हणजे केंद्रीय राज्यमंत्री मुरलीधर मोहोळ आणि राज्य कॅबिनेट मंत्री चंद्रकांतदादा पाटील यांनी विशेष लक्ष घालून सुद्धा कोथरूड विधानसभा मतदारसंघात विरोधकांनी लक्षणीय यश मिळवले हीच गोष्ट भारतीय जनता पक्षाच्या कार्यकर्त्यांच्या जीवाला लागली आहे. आगामी काळामध्ये होणाऱ्या विधानसभा निवडणुकीसाठी हेच विरोधक ‘शडु’ ठोकणार हे जग जाहीर झाल्याने कालच्या आंदोलनामध्ये हिंसकता पाहण्यास मिळाली. कार्यकर्त्यांनी तेथे उभ्या असलेल्या कारची तोडफोड केली; शिवाय दगडफेकीत दोन्ही बाजूचे कार्यकर्ते, पोलीस आणि पत्रकार जखमी झाले.
दोन्ही पक्षांनी एकमेकांविरोधात तक्रार दाखल केली आहे. सपकाळ यांनी छत्रपती शिवाजी महाराज यांची तुलना टिपू सुलतान यांच्याशी केल्याने भाजपने काँग्रेस भवनासमोर आंदोलन पुकारले. हे आंदोलन शहराध्यक्ष धीरज घाटे यांच्या नेतृत्त्वाखाली दुपारी साडेबारा वाजता करण्यात आले. यामध्ये महापौर मंजुषा नागपुरे, आमदार हेमंत रासने यांच्यासह भाजपचे पदाधिकारी, नगरसेवक, कार्यकर्ते सहभागी झाले होते.
त्यांनी सपकाळ यांच्या आणि राहुल गांधी यांच्या फोटोला जोडे मारा आंदोलन केले, तसेच विरोधात काँग्रेस भवनसमोर जोरदार घोषणाबाजी केली. पोलिसांनी तेथे बॅरीकेड्स लावले होते. त्याच्या पलिकडे कार्यकर्ते घोषणाबाजी करत होते. त्याच वेळी भवनच्या आतमध्ये काँग्रेसचे कार्यकर्ते जमा झाले आणि त्यांनी मोदी आणि अडाणी यांचे पोस्टर आणि एपस्टिन फाइलशी संबंध जोडून विरोधात घोषणाबाजी सुरू केली.
दोन्ही बाजूने एकमेकांवर कुरघोडी करत घोषणाबाजी सुरू झाली. दोन्ही बाजूचे कार्यकर्ते काँग्रेस भवनच्या गेटवर चढले. पोलिसांनाही नियंत्रण करणे अवघड झाले. त्याच वेळी दगडफेकीला सुरुवात झाली. त्यामुळे दोन्ही बाजूंच्या कार्यकर्त्यांमधील शाब्दिक खडाजंगी हमरीतुमरीवर आली आणि आंदोलनाचे स्वरूप दगडफेकीत झाले. पोलिसांनी परिस्थिती नियंत्रणात आणण्याचा प्रयत्न केला. यात महिला पोलीस, दोन्ही बाजूचे कार्यकर्ते आणि पत्रकार जखमी झाले.
