वारजे माळवाडी पोलीस स्टेशनच्या हद्दीमध्ये अंतर्गत असलेल्या कर्वेनगर पोलीस चौकीतून राजाराम पुल ते दुधाने लॉन्स भागातील कायदा सुव्यवस्था राखण्याचे काम केले जात असले तरीसुद्धा तात्काळ कार्यवाही होण्यासाठी या परिसरात स्वतंत्रतेची गरज निर्माण झाली आहे. नवनिर्वाचित नगरसेवक स्वप्नील दुधाने यांच्यावतीने पुणे पोलीस आयुक्त अमितेश कुमार यांच्याकडे लेखी निवेदन देण्यात आले आहे.
कर्वेनगर चा शंभर फुटी डीपी रस्ता पुणे महापालिकेच्या वतीने विकसित करण्यात आल्यानंतर या भागात नागरी वस्तीचे प्रमाण वाढले असून निर्मनुष्य झालेल्या या रस्त्यावर गुन्हेगारीचे प्रमाण वाढत आहे. या परिसरातील रात्रीच्या गस्ती पुणे पोलिसांच्या वतीने करण्यात येत असल्या तरी सुद्धा स्थिर पोलीस चौकी या भागाची गरज असून कायदा व सुव्यवस्था अबाधित राखण्यासाठी तात्काळ कार्यवाही करावी अशी मागणी या निवेदनाद्वारे करण्यात आली आहे. नदीपात्रालगतील १२० फुटी डीपी रस्ता अर्थात राजाराम पूल ते दुधाने लॉन्स परिसरात गेल्या अनेक वर्षांपासून लोकसंख्या आणि पर्यायाने लोकवस्ती वाढत आहे. परिणामी नागरिकांना यथायोग्य सुविधा उपलब्ध करून देणे, या लोकप्रतिनिधीच्या कर्तव्यातूनच सदरील मागणी करण्यात आल्याचे स्वप्निल दुकाने यांनी सांगितले.
सदर परिसरात लोकवस्ती वाढत असून परिसराचा विकास झपाट्याने होत आहे. यामुळे परिसरात कायदा व सुव्यवस्था राखणे नागरिकांच्या सुरक्षिततेच्या दृष्टीने काळाची गरज बनले असून सदर परिसरातील पोलीस चौकी नजीक नसल्याचा फटका नागरिकांना बसत आहे. आपत्कालीन परिस्थिती आली असता ज्येष्ठ नागरिक, स्त्री वर्ग तसेच सर्वसामान्य नागरिकांना गैरसोयीचा सामना करावा लागत असून नियमित गस्त आणि तक्रारीवर उपाययोजना करण्यामध्ये पोलीस बांधवांवरही तणाव दिसून येतो. यावर उपाययोजना म्हणून सदर परिसरात नव्याने पोलीस चौकी उभारण्यात यावी, अशी मागणी करणारे निवेदन पुणे शहर पोलीस आयुक्त मा. अमितेश कुमार यांना सुपूर्द करण्यात आले आहे.
मागील काही घटनांचा संदर्भ लक्षात घेता पुणे पोलीस आयुक्त अमितेश कुमार यांनी सुद्धा परिस्थितीचे गांभीर्य लक्षात घेता सकारात्मक प्रतिसाद दिला असून लवकरच नागरिकांच्या सुरक्षिततेला प्राधान्य देत पुणे पोलिसांची स्वतंत्र पोलीस चौकी निर्माण होण्याचा मार्ग मोकळा झाला आहे. यामुळे भविष्यात या परिसरातील नागरिकांना कोणत्याही गैरसोयीचा सामना करावा लागणार नाही, असा विश्वास स्वप्नील देवराम दुधाने नगरसेवक पुणे म न पा. यांनी व्यक्त केला आहे.
